روزاقۇل حالمۇرادوۆ,
قازاقستان حالقى اسسامبلەياسىنىڭ مۇشەسى, قوعام قايراتكەرى:
– قازاقستان حالقى اسسامبلەياسىن العاش ويعا العان كەزدە ەلباسىمىز ەلىمىزدە ءومىر سۇرەتىن 130-دان استام ۇلت وكىلدەرىنىڭ باسىن ءبىر شاڭىراقتىڭ استىنا جيىپ, ايرانداي ۇيىعان مەملەكەت قۇرۋدى ارمانداعان. سەبەبى, كەڭەس وداعى تاراعان العاشقى جىلداردا ءارتۇرلى اڭگىمەلەر ايتىلىپ, سول كەزدە قوردالانىپ قالعان ۇلتارالىق ماسەلەلەر ۋشىعا باستادى. ءتىپتى, كەيبىر بۇرىنعى وداقتاس ەلدەردە قاقتىعىستار بولىپ تا جاتتى. سونداي داۋ-جانجالعا بارماس ءۇشىن پرەزيدەنتىمىز اسسامبلەيانى قۇرىپ, بىرلىك پەن ىنتىماقتىڭ ۇلگى-ونەگەسىن كورسەتتى. مىنە, ەلباسىنىڭ وسىنداي كورەگەندىلىگىنىڭ ارقاسىندا ءبىز 25 جىل بويى تاۋەلسىز ەلدە تاتۋ-ءتاتتى ءومىر ءسۇرىپ كەلەمىز.
بىلتىر قازاقستان حالقى اسسامبلەياسىنىڭ جىلى دەپ جاريالانىپ, سونىڭ اياسىندا ايتارلىقتاي جۇمىستار اتقارىلدى. سول كەزدە دە بۇل قۇرىلىمنىڭ حالىقتى بىرىكتىرەتىن كۇش ەكەنىنە تاعى ءبىر كوز جەتكىزدىك. قازىرگىدەي تۇراقسىز گەوساياسي جاعداي كەزىندە مۇنداي كۇش ەرەكشە ءرول اتقارادى. سەبەبى, بۇگىندە اقشاسى بار ينۆەستورلار قانشا جەردەن قازبا بايلىعى كوپ بولسا داۋى ءورشىپ تۇرعان ەلدەرگە بارمايدى. ولارعا قازاقستان سياقتى بەيبىت, تىنىش مەملەكەت كەرەك. سوندىقتان, ءبىز وسى باسىمدىعىمىزدى الدىڭعى لەككە قويۋ ارقىلى الەمدە بولىپ جاتقان وقيعالاردى ءوز يگىلىگىمىزگە پايدالانۋىمىز ورىندى. بۇگىنگى سەسسيادا اتالعان ماقساتتا قانداي تەتىكتەردى ىسكە قوسۋىمىز كەرەكتىگى ايتىلىپ, وزەكتى ماسەلەلەر تالقىلاندى. سول سەبەپتى دە, بۇل جيىننىڭ ەلگە بەرەرى مول.
دانيلبەك ساراتوۆ,
«ۆايناح» چەشەن-ينگۋش مادەني-اعارتۋ قوعامى» قوعامدىق بىرلەستىگىنىڭ توراعاسى (ورال):
– قازاقستان حالقى اسسامبلەياسى – ەلباسىنىڭ قۇرعان ەڭ سەنىمدى قوعامدىق ينستيتۋتى. وعان اسسامبلەيانىڭ العاشقى سەسسياسىنان باستاپ قاتىسقان كەزىمدە-اق انىق كوز جەتكىزگەن ەدىم. العاشقى جيىننان-اق قازاقستاندا تىرشىلىك كەشكەن ءاربىر ۇلت وكىلى ءوز ۇيلەرىنە, اينالاسىنداعى ادامدارعا جىلىلىقتىڭ, مەيىرىمدىلىكتىڭ, بەيبىتشىلىكتىڭ كىشكەنتاي ءبىر بولشەگىن الىپ قايتقانداي بولىپ ەدىك. 1995 جىلدان بەرى ءار سەسسيادا ەلباسىنىڭ ايتقان وي-پايىمدارىن ەلگە ناسيحاتتاپ كەلەمىز. ىنتىماق, بىرلىك, كەلىسىم, تۇراقتىلىق – بۇلار ەلىمىزدىڭ ەڭ باستى قۇندىلىعى. ءبىز قازىرگى تاڭدا دا وسى ويدى قوعام ىشىندە ناسيحاتتاپ كەلەمىز. قازاقستان حالقى اسسامبلەياسىنىڭ مۇشەلەرى پرەزيدەنتتىڭ سەنىمىنەن شىعۋعا بار كۇش-جىگەرىن سالادى دەپ ويلايمىن.
مەن ءوزىم قوستاناي وبلىسىندا دۇنيەگە كەلدىم. ءبىراز جىل الماتى وبلىسىندا تۇردىم, ال 1979 جىلدان بەرى ورال قالاسىن مەكەن ەتىپ كەلەمىن. جالپى, قازاقستاندا 30-40 مىڭعا تارتا چەشەن-ينگۋش ۇلتىنىڭ وكىلدەرى قونىستانعان. ءوزىم باسقاراتىن «ۆايناح» چەشەن-ينگۋش مادەني-اعارتۋ قوعامى» قوعامدىق بىرلەستىگىنىڭ قۇرامىندا شامامەن 580-گە تارتا ادام بار. بۇعان قوسا, ەلىمىزدىڭ ءاربىر وبلىسىندا دا چەشەن-ينگۋش مادەني ورتالىقتارى بار. ولاردىڭ بارلىعى قازاق جەرىنىڭ دامۋىنا, وركەندەۋىنە قال-قادەرىنشە ۇلەس قوسا الادى دەپ ويلايمىن.
بەللا گازديەۆا,
اقمولا وبلىسى, تسەلينوگراد اۋدانى, رودينا اۋىلدىق وكرۋگىنىڭ اكىمى:
– مەن ءۇشىن قازاقستان حالقى اسسامبلەياسىنىڭ ءار سەسسياسى – مەرەكە. بۇل جەردە ادامداردىڭ جۇزىنەن قۋانىشتى, سەنىمدى, كوتەرىڭكى كوڭىل-كۇيدى كورۋگە بولادى. ەلىمىزدەگى بارلىق ۇلت وكىلدەرى باس قوساتىن وسىناۋ جيىندى مەملەكەتىمىزدىڭ شاعىن ۇلگىسى دەپ ايتساق تا ارتىق ەمەس. سەبەبى, قازاقستاننىڭ ءار تۇكپىرىندە حالىقتار وسىنداي دوستىق قارىم-قاتىناستا ءومىر ءسۇرىپ وتىر.
ءبىزدىڭ بۇل تاجىريبەمىزگە بۇگىندە الەم قىزىعا قاراپ, كەيبىر مەملەكەتتەر وزدەرىندە وسىنداي ينستيتۋتتار قۇرۋدا. بىراق قازاقستان حالقى اسسامبلەياسىنىڭ اۋقىمى مەن ماقسات-مۇددەسى ولاردان الدەقايدا كەڭ ءارى وزىق تۇرعانىن ايتۋىمىز كەرەك.
تاعى ءبىر نازار اۋداراتىن جايت, بىلتىر اسسامبلەيانىڭ 20 جىلدىعىنا وراي رۋحاني, مادەني جانە ۇلتتىق قۇندىلىقتاردى ناسيحاتتايتىن بىرقاتار ءىس-شارالار ۇيىمداستىرىلدى. سونىڭ ىشىندە قازاق حالقى ءۇشىن بىرلىك پەن بەرەكەنىڭ ۇلگىسىندەي بولعان تايقازاندى سيمۆول ەتىپ, ەلدى ارالاۋ ارقىلى تۇتاستىعىمىزدى ودان ءارى بەكىتە تۇستىك. اتالعان يگى باستامالاردىڭ ناتيجەسىندە الەم اسسامبلەيانىڭ نە ەكەنىنە, بۇگىندە ەڭ وزەكتى ماسەلە سانالاتىن حالىقتار دوستىعىنىڭ نەگىزى ورتاق ماقسات-مۇراتپەن ساباقتاساتىنىنا جانە وسى تاجىريبەنى جۇزەگە اسىرۋ ارقىلى قازاقستاننىڭ ىنتىماق, بىرلىگى جاراسقان ەلگە اينالعانىنا كوز جەتكىزدى. بۇل, ارينە, ەل پرەزيدەنتىنىڭ سارا ساياساتىنىڭ جەمىسى.
ۆياچەسلاۆ سولوديلوۆ,
ورال قالاسىنداعى «ورال-يايك كازاكتارى» قوعامدىق بىرلەستىگىنىڭ وكىلى:
– قازىر الەمدىك قوعامداستىق قيىن كەزەڭدى باستان وتكەرۋدە. الپاۋىت ەلدەر اراسىنداعى قىرعيقاباق كۇشەيىپ, جەر بەتىن تۇراقسىزدىق جايلاپ تۇر. دەسەك تە, قازاقستان سول قوعامداستىقتىڭ ءبىر مۇشەسى بولعانىنا قاراماستان, بەيبىتشىلىك پەن بىرلىكتىڭ تۋىن تومەن تۇسىرمەي, وزگەلەرگە ۇلگى بولىپ قالا بەرۋدە. شىن مانىندە, قازىرگىدەي الماعايىپ زاماندا بۇلايشا بەرىك ۇستانىممەن ءبىر قالىپتا تۇرۋ وتە كوپ كۇشتى قاجەت ەتەدى. الايدا, ەلباسىنىڭ قاجىر-قايراتى مەن پاراساتىنىڭ ارقاسىندا بىزگە بۇل مۇمكىن بولىپ وتىر. وسى رەتتە, مەن ءوزىمنىڭ 1997 جانە 1998 جىلدارى وسىنداي دانا باسشىمەن ەكى رەت كەزدەسىپ, كازاك اتاماندارىنىڭ اتىنان پرەزيدەنتىمىزگە سىيلىق بەرگەنىمدى ماقتانىشپەن ايتقىم كەلەدى. سەبەبى, بۇل – مەنىڭ ومىرىمدەگى ەڭ جارقىن ساتتەردىڭ ءبىرى.
قازاقستانداعى بىرلىك پەن ىنتىماقتىڭ ساقتالۋىنا اسسامبلەيانىڭ قوسىپ وتىرعان ۇلەسىن سوزبەن جەتكىزۋ مۇمكىن ەمەس. بىرنەشە ۇلتتار مەن ەتنوستاردىڭ ءبىر ءۇيدىڭ بالاسىنداي ءومىر ءسۇرۋى سول اسسامبلەيا جۇمىسىنىڭ جەمىسى. سوندىقتان, ونىڭ جۇمىسىن ناسيحاتتاۋدان ەش جالىقپاۋىمىز كەرەك. سول ماقساتپەن كۇنى كەشە ەلوردامىزداعى ۇلتتىق مۋزەيدە قازاقستان حالقى اسسامبلەياسىنا ارنالعان زال اشىلدى. بۇل – وسكەلەڭ ۇرپاققا بىرلىكتىڭ, تاتۋلىقتىڭ, دوستىقتىڭ ۇلگىسىن پاش ەتەتىن كەرەمەت باستاما. الداعى ۋاقىتتا مۇنداي يگى ىستەر ءوز جالعاسىن تاۋىپ, كەيىنگى ۇرپاق بۇگىنگى اعا بۋىن سالىپ كەتكەن داڭعىل جولمەن جۇرەتىنىنە سەنىمدىمىن.
سانام بەشىروۆا,
«ۇيعىر ايەلدەرى» رەسپۋبليكالىق ەتنومادەني ورتالىعىنىڭ ءتورايىمى:
– سوڭعى ءتورت جىل قاتارىنان قازاقستان حالقى اسسامبلەياسىنىڭ سەسسياسىنا تۇراقتى قاتىسىپ كەلەمىن. بۇل جەردە بىرلىك پەن ىنتىماقتان بولەك, الەمدىك اۋقىمداعى ماسەلەلەر, ەكونوميكالىق جانە ساياسي تاقىرىپتار ءسوز بولادى. وسىدان-اق اتالعان جيىننىڭ ماڭىزى قانشالىقتى جوعارى ەكەنىن ۇعامىز.
جالپى, جىل سايىن ەلىمىزدەگى بارلىق ۇلت وكىلدەرىنىڭ وسىلاي باس قوسىپ, ءبىر ۇستەل باسىندا سۇحباتتاسۋى قازاقستانداعى تۇراقتىلىق پەن تاتۋلىقتىڭ بەلگىسىن كورسەتەدى. بۇل سەسسيا ءبىز سياقتى وزگە ۇلتتار ءۇشىن تاجىريبەمىزبەن ءبولىسىپ, پىكىرلەسەتىن ءتيىمدى الاڭ بولىپ تابىلادى. سوندىقتان, بىزدەر ءار جىلى وسى باسقوسۋدى اسىعا كۇتەمىز. كەيىن سەسسيادا ءسوز بولعان وزەكتى ماسەلەلەردى, ولاردىڭ شەشىمدەرىن اۋىل-ايماعىمىزداعى ءوز ۇلتىمىزدىڭ وكىلدەرىنە جەتكىزىپ, بەرىلگەن تاپسىرمالار مەن مىندەتتەردى ورىنداۋ بارىسىن تالقىلايمىز. ياعني, اسسامبلەياعا حالىقتار اراسىنداعى بىرلىكتى ساقتاپ وتىرعان, ءوزارا بايلانىستىڭ ۇتىمدىلىعىن قامتاماسىز ەتەتىن ەڭ ءتيىمدى عىلىمي ينستيتۋت دەپ باعا بەرۋگە ابدەن بولادى.
قازاقتا «بىرلىك بولسا, تىرلىك بولادى» دەگەن ءسوز بار. بۇل ءسوزدىڭ ءمان-ماعىناسى وتە تەرەڭدە. سەبەبى, بىرلىك بار جەردە بەرەكە بولادى. ونىڭ جارقىن ۇلگىسى رەتىندە قازاقستاندى ايتساق جەتكىلىكتى. بۇگىندە ءبىزدىڭ ەلدىڭ بۇل ارتىقشىلىعىن بۇكىل الەم مويىنداپ, قىزىعا ءارى قىزعانا قاراپ وتىر.
ودان بولەك, قازىرگى تاڭدا ەلىمىزدەگى بارلىق ۇلت وكىلدەرى قازاقستاندى وزدەرىنىڭ جالعىز وتانى سانايتىنىن ايرىقشا اتاپ وتكەن ءجون. ولار بالالارىن پاتريوتيزمگە تاربيەلەپ, قازاقتىڭ تىلىنەن باستاپ, سالت-ءداستۇرىن تەك قۇرمەتتەپ قانا قويماي, ۇيرەنۋگە ۇگىتتەۋدە. بۇل بىزگە جاسالعان جاقسىلىقتىڭ ءبىر قارىمتاسى عانا. ال ونى تولىق وتەۋ استە مۇمكىن ەمەس دەپ ويلايمىن.
ەرگاش سۇلتانوۆ,
ماڭعىستاۋ وبلىستىق «پاحتاكور» ەتنومادەني بىرلەستىگىنىڭ توراعاسى:
– قازاقستان حالقى اسسامبلەياسىنىڭ سەسسياسى بارشا قازاقستاندىققا سەنىم مەن جىگەر بەرەتىن اۋقىمدى ءىس-شارا. الەمدەگى قازىرگى قاقتىعىستاردىڭ كەيبىرى ۇلتارالىق ماسەلەلەرگە بايلانىستى ەكەنىن ەسكەرسەك, بۇل جيىندى سونداي كەلەڭسىزدىكتەردىڭ الدىن الاتىن باستى تەتىك دەسەك تە, ارتىق ەمەس. ونىڭ ۇستىنە, ءبىر شاڭىراق استىندا 130-دان استام ۇلت وكىلدەرىنىڭ اۋىزبىرشىلىكتە ءومىر ءسۇرۋى مۇمكىن ەمەستەي كورىنەتىن قازىرگى جاعدايدا ءبىز وسى جەتىستىگىمىزبەن ماقتانۋىمىز كەرەك. مۇنىڭ ءبارى وسىنشاما حالىقتىڭ ماقسات-مۇددەسىن ءبىر ارناعا توعىستىرعان ەلباسىنىڭ ەرەن ەڭبەگىنىڭ ناتيجەسى.
مەنى پرەزيدەنتىمىزدىڭ اسسامبلەيانىڭ جۇمىسىن تىكەلەي قاداعالاپ, ونىڭ اياسىنداعى ءاربىر ءىس-شارانى نازارىندا ۇستاپ وتىراتىنى قۋانتادى. ونى جىل سايىنعى حالىققا ارناعان جولداۋلارى مەن مەملەكەتتىڭ باعىت-باعدارىن ايقىنداپ بەرەتىن ستراتەگيالىق باعدارلامالارىنان دا كورۋگە بولادى. مىسالى, «100 ناقتى قادام» ۇلت جوسپارىندا بىرتەكتىلىك پەن بىرلىك ماسەلەسىنە ەرەكشە ءمان بەرىلىپ, قازاقستان حالقىنىڭ تۇتاستىعىن نىعايتاتىن بىرقاتار باسىم باعىتتار اتاپ كورسەتىلگەن.
سونىمەن قاتار, اسسامبلەيانىڭ تاعى ءبىر ارتىقشىلىعى رەتىندە ەلىمىزدەگى حالىقتاردىڭ مەملەكەتتىك ءتىلدى ۇيرەنۋىنە مۇرىندىق بولىپ وتىرعان جۇمىسىن ايتۋعا بولادى. بۇگىندە قازاقستانداعى بارلىق ەتنومادەني بىرلەستىكتەردىڭ جانىندا قازاق ءتىلىن ۇيرەتەتىن ارنايى مەكتەپتەر جۇمىس ىستەيدى. بۇل بىرىنشىدەن, بىزگە جارتى قۇرتىن جارىپ, ءبۇتىن قۇرتىن ءبولىپ بەرىپ وتىرعان قازاق حالقىنا دەگەن قۇرمەت بولسا, ەكىنشىدەن, كونستيتۋتسياعا بويۇسىنىپ, مەملەكەتتىك ءتىلدى مەڭگەرۋ ەكەنىن جەتكىزگىم كەلەدى.
ەلەنا كيم,
قىزىلوردا وبلىستىق «قازاقستان كورەيلەرى» قوعامدىق بىرلەستىگىنىڭ ءتورايىمى:
– قازىرگى تاڭدا قازاقستان الەمگە ءبىرلىگىمەن, تۇراقتىلىعىمەن, بەيبىتسۇيگىشتىگىمەن جانە تىنىشتىعىمەن تانىلعان مەملەكەت دەپ ايتۋعا تولىق نەگىز بار. اسسامبلەيانىڭ ارقاسىندا ەلىمىزدىڭ ءار وڭىرىنە دوستىق پەن تاتۋلىقتىڭ ساۋلەسى ءتۇسىپ, تامىر جايدى. سونىڭ ارقاسىندا اۋىل-ايماقتار مەن اۋدان, وبلىس ورتالىقتارى مىزعىماس بىرلىكتىڭ مەكەنىنە اينالدى. بۇل, ءوز كەزەگىندە, تۇتاس قازاقستاننىڭ گۇلدەنۋىنە كەپىل بەرەتىن قۇندىلىق.
اسسامبلەيانىڭ بيىلعى جيىنىندا دا ادەتتەگىدەي بىرقاتار وزەكتى ماسەلەلەر ءسوز بولىپ, حالىقتىڭ كوكەيىندە جۇرگەن ساۋالدارعا جاۋاپتار بەرىلدى. جالپى, بىزدەر, قىزىلوردا كورەيلەرى, جىل سايىن اسسامبلەيانىڭ سەسسياسىن اسىعا كۇتەمىز. سەبەبى, وسى باسقوسۋدا ەلىمىزدىڭ وزگە وڭىرىندە تۇراتىن كورەيلەرمەن, باسقا دا دوستارىمىزبەن كورىسىپ, سەسسيا بارىسىندا تالقىلاناتىن تاقىرىپتار اياسىندا پىكىر الماسىپ, تاجىريبەمىزبەن بولىسەمىز.
رەتى كەلگەندە, ءبىزدىڭ بىرلەستىكتىڭ جۇمىسى جونىندە قىسقاشا ايتا كەتەيىن. بىزدەر بىرلەستىك اياسىنداعى جۇمىستا ءوز ءتىلىمىزدى, ءدىلىمىزدى جانە سالت-ءداستۇرىمىزدى ساقتاۋعا باسىمدىق بەرگەنىمىزبەن, ءبىرىنشى كەزەككە مەملەكەتتىك ءتىلدى ۇيرەتۋدى شىعاردىق. بۇل بىزگە ۇلتتىق قۇندىلىعىمىزدى ساقتاپ قانا قويماي, ناسيحاتتاۋعا بارلىق جاعدايدى جاساپ وتىرعان قازاق حالقىنا دەگەن قۇرمەتىمىز. بۇگىندە بىرلەستىك جانىندا قازاق ءتىلىن ۇيرەتەتىن جەكسەنبىلىك مەكتەپ جۇمىس ىستەيدى.
نەگىزى سىر وڭىرىندە تۇراتىن كورەيلەر قازاق ءتىلىن ايتارلىقتاي دەڭگەيدە بىلەدى. اسىرەسە, اۋىلدىق جەرلەردە تۇراتىندار مەملەكەتتىك تىلدە ەركىن سويلەيدى. بۇعان مىسال رەتىندە ەكى دۇركىن وليمپيادا چەمپيونى يليا ءيليننىڭ العاشقى جاتتىقتىرۋشىسى, اۋىر اتلەتيكادان ەلىمىزگە بەلگىلى مامان ۆيلوري پاكتى ايتۋعا بولادى.
مىنە, وسىنداي جۇمىستارىمىزدى كورگەن وڭتۇستىك كورەيادان كەلەتىن تۋىستارىمىز ءاردايىم ەرەكشە تاڭدانىستارىن ءبىلدىرىپ كەتەدى. ولار قازاقستاندى بەيبىتشىلىكتىڭ جانە مۇمكىندىكتەردىڭ ورداسى دەپ سانايدى.
ۆلاديمير تولوكوننيكوۆ,
قازاقستان حالقى اسسامبلەياسى جانىنداعى ورىس قوعامداستىعى قىزىلوردا وبلىستىق فيليالىنىڭ باسشىسى:
– مەملەكەت باسشىسى ايتقانداي, تەك اۋىزبىرلىگى جاراسقان ەل عانا كەز كەلگەن تار جول, تايعاق كەشۋدەن قينالماي وتەدى. وسى سوزگە قاراپ قازاقستان حالقى اسسامبلەياسىنىڭ اتقارىپ وتىرعان جۇمىسىن باعامداي بەرۋگە بولادى. بۇل قۇرىلىم ءبىزدىڭ بەيبىتشىلىگىمىز بەن بىرلىگىمىزدىڭ ەڭ باستى ۇستىنى.
قازىر الەمدە بولىپ جاتقان قاقتىعىستار مەن جانجالداردىڭ كوپشىلىگى بىرلىك پەن ورتاق كەلىسىمنىڭ بولماۋىنان تۋىنداپ جاتىر. سوندىقتان, حالىقتاردىڭ ىنتىماعىن تۇراقتىلىق پەن قارقىندى دامۋدىڭ كەپىلى دەپ ايتساق, قاتەلەسپەيمىز. وسى ماسەلەلەردىڭ بارلىعىن تەرەڭنەن زەرتتەپ, ونىڭ الدىن الۋ جولدارىن ويلاستىرعان ەلباسى بۇدان 21 جىل بۇرىن اسسامبلەيانىڭ قۇرىلۋىنا تۇرتكى بولدى. مەنىڭشە, نۇرسۇلتان نازارباەۆ بۇل شەشىمىمەن تەك قازاقستانداعى بەيبىتشىلىك پەن وركەندەۋدىڭ العىشارتىن بەكىتكەن جوق, بۇكىل الەمنىڭ بولاشاعى ءۇشىن يگى قادام جاسادى. ولاي دەيتىن سەبەبىم, بۇگىندە ەشقانداي ناتيجە بەرمەيتىن ۇلتارالىق جانە دىنارالىق قاقتىعىستاردان شارشاعان الەم قازاقستاننىڭ وسى ءبىر تاجىريبەسىنە نازار اۋدارىپ, ۇلگى الۋدا.
دەگەنمەن, ەشقاشان قازىرگى جەتىستىكپەن توقمەيىلسۋگە بولمايدى. ءالى دە بولسا تاتۋلىق پەن تۇراقتىلىقتىڭ ىرگەسىن نىعايتۋ جولىندا جۇمىس ىستەۋىمىز كەرەك. سەبەبى, بۇگىندە ءدىننىڭ اتىن جامىلعان توپتار وزدەرىنىڭ ارام پيعىلدارىن جۇزەگە اسىرۋ ءۇشىن ەش نارسەدەن تايىنبايتىنىن بىرنەشە رەت دالەلدەدى. ونداي جانكەشتىلەرگە ءوزىمىزدىڭ بىرلىگىمىزبەن, ىنتىماعىمىزبەن عانا توسقاۋىل بولا الامىز. ەگەر اركىم ءوز جولىن تاڭداپ, تەررورشىلارمەن وزىنشە كۇرەسسە, ونىڭ ناتيجەسىز بولىپ شىعۋى دا ابدەن مۇمكىن. ال قازىرگىدەي كەز كەلگەن كەدەرگىدەن جۇدىرىقتاي جۇمىلىپ وتسەك, ءىس-ارەكەتىمىز ناتيجەلى بولماق. سوندىقتان, وسىنداي الەمدى الاڭداتقان وزەكتى ماسەلەلەردى دە قامتيتىن اسسامبلەيانىڭ اتقارعان جۇمىسىنان الداعى ۋاقىتتا اتقاراتىن جۇمىسىنىڭ اۋقىمى كەڭ ەكەنىن ەشقاشان ەستەن شىعارماۋىمىز كەرەك.
ەلەنا ماششينسكايا,
اقمولا وبلىستىق چۋۆاش ەتنو-مادەني ورتالىعىنىڭ ءتورايىمى:
– قازاقستان حالقى اسسامبلەياسىنىڭ سەسسياسىنا وسىمەن ءتورتىنشى رەت قاتىسىپ وتىرمىن. ءبىزدىڭ ورتالىق وسىدان 2 جىل بۇرىن قۇرىلدى. ونى قۇرۋداعى باستى ماقسات – چۋۆاش حالقىنىڭ مادەنيەتىن, سالت-ءداستۇرىن, ادەت-عۇرپىن ساقتاۋ, كەيىنگى ۇرپاققا اماناتتاۋ. ورتالىقتىڭ جانىندا ارنايى مەكتەپ جۇمىس ىستەيدى, وندا چۋۆاش ۇلتىنىڭ ءتىلى مەن ادەت-عۇرپى ۇيرەتىلىپ, ناسيحاتتالادى. جالپى, قازاقستانداعى بارلىق ەتنومادەني ورتالىقتاردىڭ مىندەتى – ءوز ءتىلى مەن ءدىلىن, ادەت-عۇرپىن عانا ساقتاۋ عانا ەمەس, ءبىزدىڭ مىندەتىمىز – بەيبىتشىلىكتى ناسيحاتتاۋ. جالپى, اقمولا وبلىسىندا چۋۆاش ۇلتىنىڭ مىڭعا تارتا وكىلى بار. ال رەسپۋبليكا بويىنشا حالىقتىڭ 0,3 پايىزىن قۇرايدى. ءبىز از بولساق تا قازاق جەرىنىڭ دامۋىنا, گۇلدەنۋىنە, بەيبىتشىلىك تۇعىرىنىڭ بەرىك ورنىعۋىنا كۇش-جىگەرىمىزدى جۇمساي بەرەتىن بولامىز.