استانا. 22 ءساۋىر. باس پروكۋرور اسحات داۋىلباەۆ پەن بالا قۇقىقتارى جونىندەگى ۋاكىل زاعيپا باليەۆا كامەلەتكە تولماعانداردىڭ قۇقىقتارىن قورعاۋ ماسەلەلەرى بويىنشا ءوزارا ىنتىماقتاستىق تۋرالى مەموراندۋمعا قول قويدى. بۇل تۋرالى باس پروكۋراتۋرانىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
كەلىسىمگە قول قويۋدىڭ ماڭىزدىلىعىن جەتكىزە وتىرىپ, اسحات داۋىلباەۆ بالالاردىڭ اماندىعىن جانە قورعالۋىن قامتاماسىز ەتۋ مەملەكەتتىڭ نەگىزگى ۇلتتىق باسىمدىقتارىنىڭ ءبىرى بولىپ تابىلاتىنىن اتاپ كورسەتتى. سونداي-اق, باس پروكۋرور: «بالا قۇقىقتارى جونىندەگى ۋاكىل ينستيتۋتىن قۇرۋ بالالىقتىڭ ءسوزسىز قورعالۋى كەرەكتىگى تۋرالى كونستيتۋتسيالىق نورمانى جۇزەگە اسىرۋدىڭ كەزەكتى ءبىر قاجەتتى قادامى», – دەدى.
مەموراندۋم اياسىندا تاراپتار كامەلەتكە تولماعانداردىڭ قۇقىقتارى مەن مۇددەلەرىن قورعاۋ سالاسىنداعى كوكەيكەستى ماسەلەلەردى شەشۋگە, پروبلەمالىق سۇراقتاردى انىقتاۋعا جانە ولاردى شەشۋ جولىنداعى كەشەندى شارالاردى قابىلداۋعا باعىتتالعان كۇش-جىگەردى بىرىكتىرۋگە نيەتتى.
قۇجاتتىڭ نەگىزگى ماقساتى ءىس-ارەكەتتىڭ اشىقتىعى جانە تيىمدىلىگى قاعيدالارى نەگىزىندە بالالار قۇقىقتارىنىڭ كەپىلدىگى مەن زاڭدى مۇددەلەرىن قامتاماسىز ەتۋ, ولاردىڭ بۇزىلعان قۇقىقتارى مەن بوستاندىقتارىن قالپىنا كەلتىرۋ بويىنشا بىرلەسكەن جانە كەلىسىلگەن ارەكەتتەر جاساۋ بولىپ تابىلادى.
جۇرگىزىلىپ وتىرعان جۇمىستاردىڭ تيىمدىلىگىن ارتتىرۋ جونىندەگى ورتاق ۇسىنىستاردى جۇزەگە اسىرۋ ءۇشىن تاراپتار ءوزارا ءىس-قيمىلدىڭ ءارتۇرلى فورمالارىن پايدالانۋعا, اقپاراتپەن تۇراقتى الماسۋدى جولعا قويۋعا كەلىستى.
اتاپ ايتقاندا, ىنتىماقتاستىقتى كامەلەتكە تولماعانداردىڭ قۇقىقتارى مەن زاڭدى مۇددەلەرىن قوزعايتىن ارەكەت ەتۋشى زاڭنامانى تالداۋ جانە ولاردى جەتىلدىرۋ بويىنشا ۇسىنىستار ەنگىزۋ, بالالاردىڭ قۇقىقتارىن قورعاۋ سالاسىنداعى اقپاراتپەن تۇراقتى الماسۋ, ازاماتتىق قوعام وكىلدەرىمەن بايلانىستى كەڭەيتۋ باعىتتارىندا ىسكە اسىرۋ جوسپارلانۋدا.
سونداي-اق, باس پروكۋرور كامەلەتكە تولماعانداردىڭ قۇقىقتارىن قورعاۋ پروكۋراتۋرا قىزمەتىنىڭ باسىم باعىتتارىنىڭ ءبىرى بولىپ تابىلاتىنىن اتاپ كورسەتتى.
2015 جىلى كامەلەتكە تولماعاندار تۋرالى زاڭنامانىڭ قولدانىلۋىن قاداعالاۋ سالاسىندا 2 278 تەكسەرىس جۇرگىزىلدى, 91 614 زاڭ بۇزىشىلىق انىقتالدى, 2 498 ۇسىنىس قارالدى, 181 نارازىلىق قاناعاتتاندىرىلدى, ىقپال ەتۋ شارالارى بويىنشا 354 زاڭسىز اكتىنىڭ كۇشى جويىلدى جانە وزگەرتىلدى, 1 209 زاڭدى ءتۇسىندىرۋ جۇرگىزىلدى, 715 الدىن-الا ەسكەرتۋ جاريالاندى.
پروكۋرورلىق قاداعالاۋ شارالارىمەن 8 302 تۇلعا تارتىپتىك, 2 707-اكىمشىلىك, 323-ماتەريالدىق جاۋاپكەرشىلىككە تارتىلدى, 54 قىلمىستىق قۇقىق بۇزۋشىلىق بويىنشا سوتقا دەيىنگى تەرگەۋ باستالدى.
تالعات رايىمبەك.
دەرەك, فوتو: باس پروكۋراتۋرانىڭ ءباسپاسوز قىزمەتى.