تاراز. 20 ءساۋىر. تاراز مەملەكەتتىك پەداگوگيكالىق ينستيتۋتىندا «مەملەكەت جانە قوعام قايراتكەرى م.جولداسبەكوۆ اكادەميالىق ۇتقىرلىق جانە حالىقارالىق بايلانىستار» ورتالىعىنىڭ اشىلۋ ءراسىمى ءوتتى. بۇل تۋرالى egemen.kz ءتىلشىسى حابارلادى.
«وتانىنىڭ پاتريوتى رەتىندە ساياسي-ديپلوماتيالىق جولدار ارقىلى قازاقستاننىڭ حالىقارالىق بەدەلىن, مەملەكەتتىك مۇددەلەرىن قويا بىلگەن م. جولداسبەكوۆتىڭ ەرەڭ ەڭبەگىن كەيىنگى ۇرپاق بىلە ءجۇرسىن دەگەن ماقساتپەن ينستيتۋتىمىزدا يگى ءىس جاسالىپ وتىر. ينستيتۋتىمىزدا «مەملەكەت جانە قوعام قايراتكەرى م.جولداسبەكوۆ اتىنداعى اكادەميالىق ۇتقىرلىق جانە حالىقارالىق بايلانىستار» ورتالىعى اشىلدى. بۇل ورتالىقتىڭ نەگىزگى مىندەتى ينستيتۋت شەت ەلدىڭ جەتەكشى جوعارى وقۋ ورىندارىمەن, عىلىمي-زەرتتەۋ ينستيتۋتتارىمەن ىلعي دا بايلانىستار ورناتىپ, ءبىلىم بەرۋ سالاسىن كەمەلدەندىرۋ ماسەلەلەرى بويىنشا سەرىكتەستىك قاتىناستارىن نىعايتىپ وتىرۋ», دەدى بۇل جونىندە تاراز مەملەكەتتىك پەداگوگيكالىق ينستيتۋتىنىڭ رەكتورى داريا قوجامجاروۆا.
بۇگىنگى تاڭدا تاراز مەملەكەتتىك پەداگوگيكالىق ينستيتۋتى الىس جانە جاقىن شەتەلدىڭ 22 ەلىنىڭ (گەرمانيا, ۇلىبريتانيا, فرانتسيا, يسپانيا, قىتاي, تۇركيا, پولشا, لاتۆيا, ليتۆا, اۆستريا, چەحيا, اقش, مالايزيا, بولگاريا, رەسەي, ۋكراينا, بەلارۋس, ارمەنيا, ازەربايجان, تاجىكستان, وزبەكستان جانە قىرعىزستان) 50 جوعارى وقۋ ورىندارىمەن, ۇيىمدارىمەن جانە دە عىلىمي-زەرتتەۋ ينستيتۋتتارىمەن ەكى-جاقتى كەلىسىم-شارتتار مەن مەموراندۋمدار جاسادى. جيىن سوڭىندا عالىمنىڭ ءومىرجولى تۋرالى دەرەكتى فيلم كورسەتىلدى.
ورالحان ءداۋىت.
دەرەك, فوتو: egemen.kz