اقتوبە. 8 ءساۋىر. وبلىسقا ەكى كۇندىك ساپارمەن كەلگەن قازاقستان رەسپۋبليكاسىنىڭ حالىق قاھارمانى ايدىن ايىمبەتوۆ تالعات بيگەلدينوۆ اتىنداعى اۋە قارۋلى كۇشتەرى اسكەري ينستيتۋتىندا, فيزيكا-ماتەماتيكا باعىتىنداعى نازارباەۆ زياتكەرلىك مەكتەبىندە بولىپ, وقىپ جاتقان جاستارمەن بىرنەشە كەزدەسۋ ۇيىمداستىردى. بۇل تۋرالى egemen.kz ءتىلشىسى حابارلادى.
سونىمەن بىرگە ۇشقىش -عارىشكەر العا اۋدانىنىڭ جاستارىمەن دە كەزدەستى. نازارباەۆ زياتكەرلىك مەكتەبىندە قۇرمەتتى قوناققا وقۋ بولمەلەرىنە ەكسكۋرسيا ۇيىمداستىرىلدى, ونى شىعارماشىلىق جانە عىلىمي-زەرتتەۋ جۇمىستار كورمەسىمەن تانىستىردى.
ۇشقىش-عارىشكەردى سەگىزىنشى سىنىپ وقۋشىسى ءلاززات داناەۆا ازىرلەگەن ەلەكتروماگنيتتى تولقىننىڭ كومەگىمەن عارىش اپپاراتتارىن ۇشىرۋ جونىندەگى جوبالار قىزىقتىردى. مەكتەپ وقۋشىسىنىڭ ايتۋىنشا, مۇنداي تەحنولوگيالاردىڭ بولاشاعى زور, ەلەكتروماگنيتتى تولقىندارعا قاتىستى جوبالار ەكونوميكالىق تۇرعىدان عانا ءتيىمدى ەمەس, سونىمەن قاتار ەكولوگيالىق جاعىنان قاۋىپسىز. نازارباەۆ زياتكەرلىك مەكتەبىنىڭ وقۋشىلارىنىڭ عىلىمي جوبالارىمەن تانىسقان ايدىن ايىمبەتوۆ ولاردىڭ ءبىلىمى مەن وقۋعا دەگەن قۇلشىنىسىنا ريزاشىلىعىن ءبىلدىردى. نازارباەۆ زياتكەرلىك مەكتەبىنەن كەيىن ايدىن ايىمبەتوۆ ادام بالاسىنىڭ عارىشتى باعىندىرۋىنا 55 جىل تولۋىنا وراي ۇيىمداستىرىلعان عارىش اپتالىعىنىڭ اشىلۋ سالتاناتىنا قاتىستى. شارا ت.احتانوۆ اتىنداعى وبلىستىق دراما تەاترىندا ءوتتى.
ساتىبالدى ءساۋىرباي.
دەرەك: egemen.kz
سۋرەت: حايرەدەن راۋشانوۆ.