سەنات جانىنداعى ينكليۋزيا جونىندەگى كەڭەستىڭ توراعاسى ءلاززات قالتاەۆا جاڭا كونستيتۋتسيا جوباسىن قولداپ, وندا مۇگەدەكتىگى بار ازاماتتاردىڭ قۇقىقتارى مەن مۇددەلەرى تولىق قامتاماسىز ەتىلگەنىن اتاپ ءوتتى, دەپ حابارلايدى Egemen.kz.
كونستيتۋتسيالىق كوميسسيانىڭ توعىزىنشى وتىرىسىندا ول جاڭا كونستيتۋتسيا ادامنىڭ قۇقىقتارى مەن بوستاندىقتارىنىڭ ەڭ جوعارى قۇندىلىق ەكەنىنە ماڭىز بەرەتىنىن ايتتى. بۇل پرينتسيپ تىكەلەي مۇگەدەكتىگى بار ادامدارعا دا قاتىستى.
«جاڭا كونستيتۋتسيا جوباسى ازاماتتاردى جاسىنا, اۋرۋىنا, مۇگەدەكتىگىنە نەمەسە باسقا زاڭدى نەگىزدەرگە بايلانىستى الەۋمەتتىك قامتاماسىز ەتۋ كەپىلدىكتەرىن قامتيدى. سونىمەن بىرگە مەملەكەت پەن قوعامنىڭ مۇگەدەكتىك ماسەلەلەرىنە كوزقاراسى تەك زاڭنامالىق دەڭگەيدە عانا ەمەس, ءىس جۇزىندە دە - تەڭ قۇقىقتاردى مويىنداۋ جانە تەڭ مۇمكىندىكتەر جاساۋ قاعيداسىنا سۇيەنۋى قاجەت», دەدى ءلاززات قالتاەۆا.
ول جاڭا كونستيتۋتسيا جوباسىنىڭ كەز كەلگەن ديسكريميناتسياعا جول بەرمەۋ ءپرينتسيپىن ساقتايتىنىنا ەرەكشە توقتالدى. وسى تۇرعىدا مۇگەدەكتىگى بار ادامدار ءۇشىن تەڭ قولجەتىمدىلىكتى قامتاماسىز ەتۋ – ادام قۇقىقتارىن ىسكە اسىرۋدىڭ اجىراماس بولىگى سانالادى.
باقىت نۇرمۇحانوۆ: جاڭا كونستيتۋتسيانىڭ جوباسىنا تەڭگەنى ۇلتتىق ۆاليۋتا رەتىندە بەكىتەتىن نورما ەنگىزىلدى
«قازاقستان رەسپۋبليكاسىنىڭ مۇگەدەكتەردىڭ قۇقىقتارى جونىندەگى كونۆەنتسيادان تۋىندايتىن مىندەتتەمەلەرى جاڭا كونستيتۋتسيا قابىلدانعان جاعدايدا تولىق كولەمدە ساقتالادى», دەدى سەنات جانىنداعى ينكليۋزيا جونىندەگى كەڭەستىڭ توراعاسى.
ونىڭ ايتۋىنشا, جاڭا كونستيتۋتسيا جوباسىنىڭ العاشقى باپتارىندا-اق, كونستيتۋتسيالىق قۇرىلىم نەگىزدەرىنە ارنالعان بولىمدە, ازاماتتاردىڭ جاعدايىن ناشارلاتاتىن نورمالاردىڭ كەرى كۇشىن قولدانۋعا جول بەرمەۋ قاعيداتى بەكىتىلگەن.
ءلاززات قالتاەۆا بۇل ءتاسىلدى قۇقىق قولدانۋ تاجىريبەسىندە دە بىرتىندەپ جۇزەگە اسىرۋ قاجەت ەكەنىن ايتتى.
«الدىڭعى وتىرىستاردا جاڭا كونستيتۋتسيا جوباسىن رەسپۋبليكالىق رەفەرەندۋمعا شىعارۋ ماسەلەسى قارالدى. بۇل – مەملەكەت ءۇشىن اتا زاڭ سانالاتىن قۇجات. ءاربىر ازامات ءوز پىكىرىن تەڭ ءبىلدىرۋى ءتيىس», دەدى ول.
سونداي-اق ءلاززات قالتاەۆا جاڭا كونستيتۋتسيا ءماتىنىن ينكليۋزيۆ فورماتتارعا: كورۋ مۇمكىندىگى شەكتەۋلى ادامدار ءۇشىن – برايل قارپىمەن, ينتەللەكتۋالدىق دامۋىندا قيىندىقتارى بار ادامدار ءۇشىن – تۇسىنىكتى تىلگە اۋدارۋ قاجەتتىگىن اتاپ ءوتتى.
«ۆولونتەرلىك» ۇعىمىن كونستيتۋتسيادا بەكىتۋ ۇسىنىلدى
قورىتىندىلاي كەلە, ول جاڭا كونستيتۋتسيا جوباسىندا ازاماتتاردىڭ مەملەكەتتىك باسقارۋعا قاتىسۋىن كەڭەيتۋگە باعىتتالعان نورمالار بار ەكەنىن اتاپ ءوتتى. بۇل الەۋمەتتىك تۇرعىدان وسال توپتاردىڭ قۇقىقتارىن قورعاۋدى جانە ينكليۋزيانى ءتيىمدى جۇزەگە اسىرۋعا قوسىمشا مۇمكىندىكتەر بەرەدى.
«اتالعان تاسىلدەردى, سونداي-اق ساراپشىلار, ازاماتتىق قوعام وكىلدەرى مەن حالىق پىكىرى نەگىزىندە ايتىلعان كونسترۋكتيۆتى ۇسىنىستاردى ەسكەرە وتىرىپ, جاڭا كونستيتۋتسيا جوباسىن قۇقىقتىق جانە الەۋمەتتىك دامىعان مەملەكەتتىڭ ماڭىزدى نەگىزى رەتىندە قولداۋعا بولادى دەپ ەسەپتەيمىن», دەپ تۇيىندەدى ءلاززات قالتاەۆا.
ايتا كەتەيىك, بۇگىن, 7 اقپاندا قازاقستاندا كونستيتۋتسيالىق رەفورما جونىندەگى كوميسسيانىڭ كەزەكتى ءوتىرىسى وتتى.