Qazaqstan ۇلتتىق ارناسىنىڭ تەلەجۇرگىزۋشىسى, كونستيتۋتسيالىق كوميسسيا مۇشەسى ەرقانات كوپجاسار ۇلى جاڭا كونستيتۋتسيا جوباسىنداعى ءسوز ەركىندىگى تۋرالى باپتاردىڭ ماڭىزى جونىندە پىكىر ءبىلدىردى, دەپ حابارلايدى Egemen.kz.
كوميسسيا مۇشەسى اتا زاڭ جوباسىنداعى ءسوز بوستاندىعى مەن عىلىمي-تەحنيكالىق, كوركەم شىعارماشىلىق ەركىندىگىنە قاتىستى باپتارعا توقتالدى.
«ەركىن ويسىز ەل كوسەگەسى كوگەرمەيدى, اشىق پىكىر الماسۋسىز العا باسپايدى. جاڭا جوبادا ءسوز بوستاندىعىن شەكتەۋگە قاتىستى نورما جوق. باستى ماقسات – جاۋاپكەرشىلىك جۇگىن كۇشەيتۋ, ارانداتۋشىلىق ارەكەتتەردىڭ الدىن الۋ. سونداي-اق, جوبادا اقپاراتتى ەركىن الۋ مەن تاراتۋ قۇقىعىنىڭ ايقىن بەكىتىلۋى – وركەنيەتكە ۇمتىلعان جۇرتقا لايىق باتىل قادام», دەدى جۋرناليست كونستيتۋتسيالىق كوميسسيانىڭ توعىزىنشى وتىرىسىندا.
ونىڭ ايتۋىنشا, اقپاراتقا قول جەتكىزۋ قۇقىعىنىڭ ناقتى تەتىكتەرمەن بەكىتىلۋى ءباسپاسوزدىڭ دەمىن اشىپ, مەملەكەتتىك ورگانداردىڭ جاۋاپكەرشىلىگىن ارتتىرادى.
«ەڭ ماڭىزدىسى, ەركىندىك پەن جاۋاپكەرشىلىكتىڭ ءبىر ارناعا توعىسۋى. ادامنىڭ ار-نامىسى مەن ابىرويىن بيىك قويۋ, ۇلتتىق قۇندىلىقتاردى قادىرلەۋ – ەركىندىكتى جەلبۋازدىققا اينالدىرماۋدىڭ, ونى ەل مۇددەسىنە قىزمەت ەتكىزۋدىڭ پاراساتتى قادامى. مۇنداعى ەركىندىك – جۇگەنسىزدىك ەمەس, مەملەكەتتىك ساناعا نەگىزدەلگەن جاۋاپكەرشىلىك. وسى زاڭنامالىق ۇستانىم پىكىر الۋاندىعىنىڭ تىنىسىن اشىپ, سالاۋاتتى سىننىڭ ءورىسىن كەڭەيتەدى. ەل بىرلىگىنە سىزات تۇسىرەتىن جونسىزدىككە توسقاۋىل قويادى», دەپ تولىقتىردى ەرقانات كوپجاسار ۇلى.
ەرلان قارين: ەلىمىز العاشقىلاردىڭ ءبىرى بولىپ تسيفرلىق دەرەكتەردى قورعاۋ نورماسىن اتا زاڭعا ەنگىزىپ وتىر
ءسوز سوڭىندا ول ۇسىنىلىپ وتىرعان كونستيتۋتسيالىق وزگەرىستەر جۋرناليستيكانىڭ باستى ميسسياسىن – قوعام مەن بيلىك اراسىنداعى التىن كوپىر بولۋدى, اقيقاتتى اينا-قاتەسىز جەتكىزۋدى, سىندارلى سۇحبات مادەنيەتىن قالىپتاستىرۋدى جۇزەگە اسىرۋعا مۇمكىندىك بەرەتىنىن اتاپ ءوتتى.