قازاق سپورتشىلارى وليمپيادانىڭ العاشقى كۇنىندە قالاي ونەر كورسەتتى؟

ءبىرىنشى كۇننىڭ باعدارلاماسىندا ايەلدەر اراسىندا سكياتلون سايىسى (10 شاقىرىم + 10 شاقىرىم) ءوتتى. قازاقستان قۇراماسىنىڭ اتىنان ەكى سپورتشى جارىس جولىنا شىقتى. كسەنيا شالىگينا 53-ورىنعا تابان تىرەسە, نادەجدا ستەپاشكينا 60-ورىندى يەلەندى.

تاعى ءبىر جارىس ءتۇرى – كونكيمەن جۇگىرۋدەن ايەلدەر اراسىندا 3000 مەتر قاشىقتىقتا جۇلدەلەر ساراپقا سالىندى. بۇل باعدارلامادا قازاقستان اتىنان ەكى سپورتشى ونەر كورسەتتى. ەكەۋى دە ۇزدىك وندىقتىڭ قاتارىنا ەندى.

نادەجدا موروزوۆا 4:01.200 ۋاقىت كورسەتكىشىمەن التىنشى بولىپ مارەگە جەتتى. ال ەليزاۆەتا گولۋبەۆا 4:03.300 ۋاقىت كورسەتكىشىمەن ونىنشى ورىنعا تۇراقتادى.

ەسكە سالايىق, 2026 جىلعى وليمپيادا ويىندارى 6-22 اقپان ارالىعىندا يتاليانىڭ ميلان جانە كورتينا-د’امپەتستسو قالالارىندا وتەدى. بايراقتى باسەكەدە 16 سپورت ءتۇرى بويىنشا 116 مەدال جيىنتىعى ساراپقا سالىنادى. 

بۇعان دەيىن حابارلاعانىمىزداي, ميلان-كورتينا وليمپياداسىندا ەل نامىسىن 10 ديستسيپلينادا 36 سپورتشى (18 ەر, 18 ايەل) قورعايدى. جالپى دوداعا 93 مەملەكەتتەن 3000-عا جۋىق اتلەت قاتىسادى.