اقش قارجى ءمينيسترىنىڭ مالىمدەۋىنشە, ەلدىڭ مەملەكەتتىك قارىزى 14 تريلليون دوللارعا جەتكەن. ورتاشا ەسەپپەن بۇل سوما ەل تۇرعىندارىنىڭ ارقايسىسىنا 45 مىڭ دوللاردان كەلەدى.
Associated Press اگەنتتىگىنىڭ اقپاراتتارىنا قاراعاندا, 2010 جىلدىڭ ماۋسىمىندا قارجى ءمينيسترى تيموتي گايتنەر اقش-تىڭ مەملەكەتتىك قارىزى جىل سوڭىنا دەيىن 13,6 تريلليون دوللارعا جەتەتىنىن, ال 2015 جىلعا قاراي ول 19,6 تريلليون دوللارعا جاقىندايتىنىن حابارلاعان. ەگەر ناقتى شەشىمدەر قابىلدانبايتىن بولسا, بۇل اقش ەكونوميكاسىن دەفولتقا سوقتىرۋى مۇمكىن.
ەكس-پرەزيدەنت ەلىنە ورالدى
گايتيدىڭ بۇرىنعى پرەزيدەنتى, ديكتاتور جان-كلود ديۋۆالە 25 جىلدان سوڭ وتانىنا ورالدى. ول بيلىكتى 20 جاسىندا ءوز اكەسىنەن مۇراگەر رەتىندە العان بولاتىن.
اقپارات قۇرالدارىنىڭ تاراتقان اقپاراتتارى بويىنشا, «بەبي دوكا» دەگەن لاقاپ اتقا يە وعان كەزىندە جەمقورلىققا سالىندى جانە ادام قۇقىعىن بۇزدى دەگەن سەكىلدى كوپتەگەن ايىپتار تاعىلعان. بيلىكتەن تايدىرىلعاننان كەيىن ول فرانتسيادان باسپانا تاپتى. بىرقاتار ساراپشىلاردىڭ پىكىرىنشە, ديۋۆالەنىڭ ەلىنە ورالۋى جاقىندا وتەتىن پرەزيدەنتتىك سايلاۋدىڭ ەكىنشى تۋرىنا تىكەلەي بايلانىستى.
قۇرباندىقتار سانى 630-دان استى
رەسەيدىڭ «جاڭالىقتار» اقپارات اگەنتتىگىنىڭ حابارلاۋىنشا, برازيليانىڭ ريو-دە-جانەيرو شتاتىنداعى جويقىن توپان سۋ باسۋ جانە جەر كوشۋى سالدارىنان كەمىندە 631 ادام قۇربان بولعان.
اتالعان شتاتتىڭ تاۋلى ايماعىنا ورنالاسقان بىرقاتار قالالاردا جاۋعان نوسەردىڭ سوڭى الاپات تاسقىنعا ۇلاسقان. سونىڭ سالدارىنان, اسىرەسە, نوۆا-فريبۋرگۋ, تەرەزوپوليس, سۋميدوۋرۋ جانە پەتروپوليس قالالارى قاتتى زارداپ شەككەن. قازىرگى كەزدە وپات بولعان ادامداردى ىزدەستىرۋ شارالارى تاۋلىك بويى جۇرگىزىلىپ جاتىر.
تۋنيستە مەملەكەتتىك توڭكەرىس جاسالدى
«امەريكا داۋىسى» جاڭالىقتار قىزمەتىنىڭ حابارلاۋىنشا, وتكەن جۇما كۇنى تۋنيستە مەملەكەتتىك توڭكەرىس جاسالعان. ەلدى 23 جىل باسقارعان پرەزيدەنت زين ءال-ابيدين بەن الي ساۋد ارابياسىنا قاشىپ كەتكەن.
پرەزيدەنتتىك مىندەتتى الدىمەن ەلدىڭ پرەمەر-ءمينيسترى موحاممەد گاننۋچي ۋاقىتشا العان ەدى. بۇعان كوتەرىلىسشىلەر قاناعاتتانبادى. سودان كەيىن ەل بيلىگى پارلامەنت سپيكەرى فۋەد لەبازعا جۇكتەلدى. كەيبىر دەرەك كوزدەرىنە قاراعاندا, ءتارتىپسىزدىكتەر كەزىندە ادام ءولىمى بولعان. توڭكەرىستىڭ ءتۇپ نەگىزى جۇمىسسىزدىق پەن ازىق-ت ۇلىك باعالارىنىڭ جوسىقسىز وسىرىلۋىندە جاتسا كەرەك.
تۇركىمەنستاندى بسۇ-عا كىرۋگە شاقىردى
بي-بي-سي اگەنتتىگىنىڭ حابارلاۋىنشا, بۇل ماسەلە ەۋروپالىق كوميسسيانىڭ توراعاسى جوزە مانۋەل بارروزۋ مەن تۇركىمەنستان پرەزيدەنتى گۋربانگۋلى بەردىمۇحامەدوۆتىڭ اشعابادتاعى كەزدەسۋى كەزىندە قوزعالعان.
ەۋروپالىق كوميسسيانىڭ توراعاسى تۇركىمەنستان ەۋرووداقتىڭ نەگىزگى ساۋدا ارىپتەسى بولىپ تابىلاتىندىعىن جانە تۇركىمەنستاننىڭ بسۇ-عا مۇشەلىككە كىرۋى ەۋرووداقپەن ساۋدا قاتىناستارىن جاقسارتاتىنىن اتاپ وتكەن. كەزدەسۋ بارىسىندا ەۋروكوميسسيا توراعاسى تۇركىمەنستان گازىن ەۋروپاعا جەتكىزۋدى باستاۋدى تەزدەتۋگە شاقىرىپتى. ويتكەنى, بۇگىندە ەۋروپا رەسەي گازىنا وتە تاۋەلدى.
لۋجكوۆتىڭ لاتۆيادا تۇرعىسى بار
ماسكەۋدىڭ ەكس-مەرى يۋري لۋجكوۆ لاتۆياعا قونىس اۋدارۋدى قولايلى كورىپ وتىر. لاتۆيا باق-تارىنىڭ مالىمدەۋىنشە, جاڭا جىل قارساڭىندا ماسكەۋدىڭ بۇرىنعى باسشىسى رەسەيدەگى لاتۆيا ەلشىلىگىنە لاتۆيادا تۇرۋ جونىندە ءوتىنىش بەرگەن كورىنەدى.
بىرقاتار اقپاراتتارعا قاراعاندا, لۋجكوۆتىڭ زايىبى ەلەنا باتۋرينا بۇل اقپاراتقا قاتىستى ەشقانداي پىكىر بىلدىرگەن جوق. لاتۆيانىڭ TV-3 تەلەارناسىنىڭ حابارلاۋىنشا, لۋجكوۆ وسى ەلدە تۇرۋعا مۇمكىندىك بەرەتىن لاتۆيانىڭ زاڭىنا سايكەس بۇل ەلگە 11,4 ميلليون رۋبلگە جۋىق قارجى سالعان. ەكس-مەردىڭ لاتۆيادا قوزعالمايتىن م ۇلىكتەرى دە بار.
قايتا-قايتا شاقىرا باستادى
ۋكراينانىڭ بۇرىنعى پرەمەر-ءمينيسترى, «باتكيۆششينا» پارتياسىنىڭ ليدەرى يۋليا تيموشەنكونى كەشە باس پروكۋراتۋرانىڭ تەرگەۋ باسقارماسى تاعى دا شاقىرتتى.
ForUm اگەنتتىگىنىڭ تاراتقان اقپاراتتارىنا قاراعاندا, يۋليا تيموشەنكونى تەرگەۋ باس باسقارماسىنىڭ تەرگەۋشىسى كۇن سايىن ساعات 10.00-دەن 17.00-گە دەيىن وزىنە قاتىستى قىلمىستىق ءىس ماتەريالدارىمەن تانىسۋعا مىندەتتەگەن. ال ەكس-پرەمەردىڭ ايتۋىنشا, بۇل ءىس-ارەكەت ونىڭ جۇمىس ىستەۋىنە جانە قوعامداستىقپەن كەزدەسۋلەر وتكىزۋىنە مۇمكىندىك بەرمەۋ ءۇشىن ادەيى جاسالىپ وتىر. بۇگىندە وعان 380 ميلليون ەۋرونى ماقساتسىز جۇمسادى دەگەن ايىپ تاعىلعان.
ينتەرنەت ماتەريالدارى نەگىزىندە ازىرلەندى.