قايراتكەردىڭ رۋحىنا تاعزىم ەتتى. وتكەن سارسەنبىدە وبلىس اكىمى قانات بوزىمباەۆ باستاعان ءوڭىر جۇرتشىلىعىنىڭ ءبىر توپ وكىلدەرى تاراز قالاسىنىڭ ورتالىعىنداعى د. ا. قوناەۆ اتىنداعى كوشەگە قويىلعان قازاق حالقىنىڭ اياۋلى پەرزەنتى, كورنەكتى مەملەكەت جانە قوعام قايراتكەرىنىڭ ەسكەرتكىش-بيۋستىنە گۇل شوقتارىن قويىپ, رۋحىنا ءۇنسىز تاعزىم ەتتى.
سونداي-اق, كەلەر جىلى تۋعانىنا 100 جىل تولاتىن ەل اعاسىنىڭ مەرەيتويىن لايىقتى اتاپ ءوتۋ ماقساتىندا وبلىستا ءتۇرلى مادەني-ءىس شارالار وتكىزۋ دە جوسپارلانۋدا. «عاسىرلار توعىسىندا» اتتى كىتابىندا ەلباسى نۇرسۇلتان نازارباەۆ: «د. قوناەۆ قازاقستان تاريحىندا ءىرى تۇلعا بولىپ قالارى داۋسىز. ول جايىنداعى اڭگىمە – ءوز الدىنا تاقىرىپ» دەپ ەسكە العانى بەلگىلى.
كوسەمالى ساتتىباي ۇلى. جامبىل وبلىسى.
مەملەكەتارالىق ءماجىلىستىڭ ارقاۋى – سۋ. شىمكەنتتە ورتالىق ازيا ەلدەرى اراسىنداعى مەملەكەتارالىق سۋ شارۋاشىلىعىن ۇيلەستىرۋشى كوميسسيانىڭ 56-شى وتىرىسى ءوتتى. ماجىلىستە ءتورت مەملەكەتتىڭ ۇكىمەتتەرى اراسىندا سىرداريا وزەنىنىڭ سۋ جانە ەنەرگەتيكا رەسۋرستارىن پايدالانۋ تۋرالى كەلىسىمىنىڭ جوباسى تالقىلاندى. وسىندا قارالعان 5 ماسەلەنىڭ 4-ءۋى بويىنشا تاراپتار ورتاق بىتىمگە كەلىپ, قۇجاتتارعا قول قويىلدى. ال, بەسىنشى ماسەلە مەن وعان قاتىستى ۇسىنىستار كوميسسيا مۇشەلەرىنىڭ قاتىسۋىمەن ەكىنشى توقساندا قايتا قارالىپ, تولىقتىرىلاتىن بولادى.
باقتيار تايجان. وڭتۇستىك قازاقستان وبلىسى.
«سەمەي تاڭىنىڭ» قوسىمشاسى. قازىردە ۇستازدار قاۋىمىنا قاي باسىلىم بولسا دا ءدان ريزا. ويتكەنى, قازاق باسىلىمدارى وقىرماندارىنىڭ باسىم بولىگىن سولار قۇراپ وتىرعانى شىندىق. سونىڭ ايعاعىنداي, قالالىق «سەمەي تاڭى» گازەتىنىڭ بيىلعى تارالىمى دا ءبىرشاما ارتىپ, الىستاعى اۋىلدىق اۋداندارعا دا تاراپ جاتىر. وسىنى ەسكەرگەن گازەت ۇجىمى ءار ايدىڭ ءۇشىنشى اپتاسىندا «ۇستاز تاڭى» دەگەن اتپەن ءوز قوسىمشاسىن شىعارۋعا بەكىنىپ وتىر. ۇستازدارعا ارنالعان تەگىن قوسىمشادا مەكتەپ ءومىرىنىڭ تىنىس-تىرشىلىگىمەن بىرگە, مۇعالىمدەردىڭ تانىمدىق, تاعىلىمدىق ماڭىزى زور ماقالالارى دا جاريالانباق. ونىڭ العاشقى سانى تاقاۋ كۇندەرى ۇستازدار قولىنا تيمەك.
داۋلەت سەيسەن ۇلى. سەمەي.
قىرعىز باۋىرىمىزدىڭ مەرەيتويى. كەڭەس وداعىنىڭ حالىق ءارتىسى, كسرو مەملەكەتتىك سىيلىعىنىڭ لاۋرەاتى, قىرعىزستان مەن قازاقستاننىڭ ەڭبەك سىڭىرگەن مادەنيەت قايراتكەرى بولوتبەك شامشيەۆتىڭ ەسىمى كينوسۇيەر قاۋىمعا جاقسى تانىس. اتاعىنان ات ۇركەتىن تالانتتى كينورەجيسسەردىڭ كوپتەگەن قويىلىمدارى كينەماتوگرافيانىڭ التىن قورىندا ساقتاۋلى. بۇگىندە س.مۇقانوۆ اتىنداعى وبلىستىق قازاق سازدى-دراما تەاترىندا ەڭبەك ەتىپ جاتقان قىرعىز باۋىرىمىزدىڭ 70 جىلدىق مەرەيتويى «قازاقستان» كينوتەاترىندا كەڭىنەن اتالىپ ءوتتى. مەرەيتوي يەگەرىن وبلىس اكىمىنىڭ ورىنباسارى فارحاد قۋانعانوۆ قۇتتىقتاپ, ايماق باسشىسى اتىنان سىيلىق تارتۋ ەتتى. مادەنيەت جانە اقپارات ءمينيسترى مۇحتار قۇل-مۇحاممەدتىڭ قۇتتىقتاۋ حاتى وقىلدى.
ءومىر ەسقالي. سولتۇستىك قازاقستان وبلىسى.
16 وتباسى پاتەرگە يە بولدى. كاتونقاراعاي اۋدانىنىڭ ورتالىعى – ۇلكەن نارىن اۋىلىندا جاقىندا كوپ پاتەرلى تۇرعىن ءۇي پايدالانۋعا بەرىلدى. اۋدان اكىمى ارمان بەكبوسىنوۆ ۇلى وتان سوعىسىنىڭ ارداگەرى مەن دەنساۋلىعى ناشار جاندارعا, ەتباۋىر تۋىستارى جوق جەتىمدەر مەن ەڭبەك جولىن ەندى باستاعان جاستارعا – بارلىعى 16 ادامعا پاتەر كىلتتەرىن سالتاناتتى جاعدايدا تابىس ەتتى. ءوز كەزەگىندە قۋانىشقا بولەنگەن جاندار اتالمىش تۇرعىن ءۇيدى بىتىرۋگە مۇرىندىق بولعان وبلىس اكىمى بەردىبەك ساپارباەۆقا, اۋدان باسشىلارىنا العىستارىن ايتتى. بالالىق شاعىن جەتىمدەر ۇيىندە وتكىزگەن, قازىر «نارىن» كاسىپورنىندا جۇمىسشى بولىپ جۇرگەن ا. كوروتكوۆقا ارمان ءىلياس ۇلى ۇيىنە كورىمدىك رەتىندە ءتۇرلى-ءتۇستى تەلەديدار ۇسىندى.
وڭداسىن ەلۋباي. شىعىس قازاقستان وبلىسى.
فيلم وزەگى – كالاشنيكوۆ اۆتوماتى. ورالدىق كاسىپكەر مۇرات جاكىباەۆتىڭ پروديۋسەرلىك ورتالىعى «ماتاي. اڭىزدىڭ باستاۋى» اتتى دەرەكتى ءفيلمدى كورەرمەندەر نازارىنا ۇسىندى. ونىڭ باستى كەيىپكەرى الەمگە ايگىلى قارۋدى ومىرگە اكەلگەن كونسترۋكتور – ميحايل كالاشنيكوۆ. اتالعان قارۋدىڭ العاشقى ۇلگىسى قازاقستاندا – الماتى وبلىسى اۋماعىنداعى ماتاي ستانساسىندا جاسالعان. تۋىندىعا ارحيۆتىك ماتەريالدار مەن سوعىسقا دەيىن ماتاي لوكوموتيۆ دەپوسىندا توكار بولىپ ىستەگەن م.كالاشنيكوۆتى كورە قالعان تۇرعىنداردىڭ اڭگىمەلەرى جەلى بولىپ تارتىلعان. فيلمدە ۇلى وتان سوعىسى كەزىندە جاۋدى جەڭۋ ءۇشىن ارمانداي بولعان اۆتوماتتىڭ قارۋ-جاراق وندىرىسىنە كەيىن قالاي ەنگەنى جان-جاقتى كورىنىس تاپقان. اتالعان قارۋ تاريحىنىڭ قازاقستانعا قاتىستى تۇستارىنا باسىمدىق بەرىلۋى – دەرەكتى دۇنيەنىڭ باستى جەتىستىگى.
تەمىر قۇسايىن. ورال.
ناۋم شافەر جيناعان كۇيتاباقتار... وتكەن اپتادا وبلىس ورتالىعىنداعى «شاڭىراق» حالىق شىعارماشىلىعى ۇيىندە مۋزىكاتانۋشى, سازگەر, كۇيتاباقتاردىڭ سيرەك كوللەكتسياسىن جيناقتاۋشى ناۋم شافەردىڭ 80 جىلدىق مەرەيتويى ءوتتى. كەشكە وبلىس اكىمى باقىتجان ساعىنتاەۆ قاتىسىپ, توي يەسىن «وبلىس الدىندا سىڭىرگەن ەڭبەگى ءۇشىن» بەلگىسىمەن ماراپاتتادى. ال شافەر باقىتجان ءابدىر ۇلىنا ءوز قورىندا ساقتالعان جامال وماروۆانىڭ ءان جيناعىن تابىس ەتىپ, العىسىن ءبىلدىردى. كەشتە «ۆەچەرنىي ۆالس», «پريۆەت دۋناەۆسكومۋ», «تسيركوۆايا پەسەنكا» اتتى مەرەيتوي يەسىنىڭ ءوزى شىعارعان اندەرى ورىندالدى. 27 مىڭ كۇيتاباق كوللەكتسياسىن جيناعان شافەردىڭ مۋزەيىندە كۇلاش, بيبىگۇل, روزا باعلانوۆا, جامال وماروۆا, ەرمەك سەركەباەۆتىڭ شىرقاعان اندەرىنىڭ دە جازبالارى ساقتالعان.
فاريدا بىقاي. پاۆلودار.