تاۋەلسىزدىك تارتۋى بۇگىنگى ەل تاۋەلسىزدىگىنە بەرىك نەگىز قالاعان بابالار رۋحى اسقاقتاپ, ۇرپاقتارى ەسىمدەرىن ۇلىقتاپ كەلەدى. وسىنداي مەرەي ءساتتىڭ جاراستى جالعاستىعى جەتىسۋ جەرىندە كورىنىس تاپتى. ەلى مەن جەرىن باسقىنشى جاۋلاردان قورعاپ, حالقىنىڭ بىرلىگى ءۇشىن تەر توگىپ, قازاق حاندىعىنىڭ نەگىزىن قالاۋعا ۇلەس قوسقان كەرەي مەن جانىبەك بابالارعا ەسىك قالاسىندا ەسىمدەرى ايشىقتالا جازىلعان ەسكەرتكىش-بارەلەف ورناتىلدى.
جينالعاندار الدىندا كەرەي مەن جانىبەكتىڭ تاريحتا قالعان ەرلىگى مەن مامىلەگەرلىگى, باسقا دا قۇندى دەرەكتەر جايىنا اۋدان اكىمى ءاليحان تويباەۆ جان-جاقتى توقتالدى. جاس ۇرپاققا ۇلگى-ونەگە بولعان تۇعىردىڭ تياناعىن كەلتىرگەن اۋداندىق ءماسليحات دەپۋتاتتارى مەن حانداردىڭ بەينەسىن ءتۇسىرىپ, ارلەگەن ساۋلەتشى ابدىكەرىم ابدۋاليۆكە جانە حالىقتىڭ بىرلىگىن مۇرات تۇتقان باھادۇرلەردىڭ ەسكەرتكىشىن جاساۋعا قاراجات بولگەن اتىمتاي جومارت, تۇرىك ازاماتى زيادين قاسانوۆقا اق العىسىن جەتكىزدى.
تاۋەلسىز ەلىمىزدەگى بۇگىنگى قول جەتكەن تابىستار جايلى تەبىرەنە سويلەگەن قازاقستان حالقى اسسامبلەياسىنىڭ مۇشەسى, اكادەميك قازاقباي قاسىموۆ, ۇلى وتان سوعىسىنىڭ ارداگەرى جولدان يمانقۇلوۆ, №6654 اسكەري ءبولىم كومانديرىنىڭ ورىنباسارى جاسقايرات دابىلبەكوۆ, ابىلاي حان اتىنداعى ورتا مەكتەپتىڭ وقۋشىسى اباي سەيدىن جانە باسقالار حانداردىڭ تاعىلىمىن ۇرپاققا ۇران ەتىپ, جاستارعا ۇلگى ەتۋ, ەل بولاشاعىنىڭ جارقىندىعىن بابالار وسيەتىمەن سۋسىنداتۋ قاجەتتىگىن باياندادى. سونداي-اق, ولار جينالعانداردى ەلباسىمەن بىرگە بولۋعا شاقىردى. اسكەري بورىشىن وتەۋ كەزىندەگى قىراعىلىعى ءۇشىن ەلباسى جارلىعىمەن «جاۋىنگەرلىك ەرلىگى ءۇشىن» مەدالىن يەلەنگەن ءدىلشات يمامۇسەن ۇلىنىڭ ەرلىگى دارىپتەلىپ, جاستارعا ۇلگى ەتىلدى.
كۇمىسجان بايجان,
الماتى وبلىسى.