سەمەيدەگى وبلىستىق ولكەتانۋ مۇراجايى سوڭعى كەزدە ولكە تاريحىن كەڭىنەن ناسيحاتتاۋ ماقساتىمەن يگى ىستەرگە مۇرىندىق بولۋدا. ايتالىق, جۋىردا اتالعان مۇراجايدىڭ باستاماسىمەن مەكتەپ مۇراجايلارى اراسىندا بايقاۋ وتكىزىلدى. وعان قالامەن بىرگە, قالا ماڭىنداعى اۋىلداردان بارلىعى 15 مەكتەپ مۇراجايى قاتىستى.
ءبىرىنشى ورىندى ءشۇلبى كەنتىندەگى مەكتەپ-كەشەن مۇراجايى جەڭىپ الدى. ال ونىڭ دا سەبەبى جوق ەمەس-ءتى. ويتكەنى, بىرىنشىدەن, بۇل مۇراجاي جارىق تا كەڭ, سونداي-اق جىلى بولمەگە ورنالاستىرىلعان. ەكىنشىدەن, مۇراجايدا مەكتەپ تاريحىمەن بىرگە, وسىنداعى ءشۇلبى گەس-ءىنىڭ وتكەنى مەن بۇگىنى كەڭىنەن قامتىلعان. مۇراجايدا وسى وڭىردەن تابىلعان ارحەولوگيالىق قۇندى جادىگەرلەر مەن كونە دۇنيەلىكتەر دە بارشىلىق. جەرگىلىكتى سوعىس ارداگەرلەرى تۋرالى دەرەكتەر دە مول. ال اباي, شاكارىم, مۇحتار سىندى ۇلىلارعا ارنالعان ءبولىم ءوز الدىنا بولەك جاساقتالعان.
جاس ۇرپاقتىڭ تۋعان جەرگە, كەڭ بايتاق وتانعا دەگەن ءسۇيىسپەنشىلىگى وسىنداي شارالاردان باستالسا كەرەك. سوندىقتان ءوڭىردىڭ باس مۇراجايىنىڭ مۇنداي باستاماسىن قۇپتاماسقا بولمايدى.
داۋلەت سەيسەن ۇلى,سەمەي.