«وكىلەتتى ەلشى»
سوڭعى جىلدارى ش.ايمانوۆ اتىنداعى «قازاقفيلم» كينوستۋدياسى ۇلت مۇددەسى مەن تۇتاستىعىنا ساي ساۋاپتى جوبالاردى جۇزەگە اسىرا باستادى. سونىڭ ءبىرى – قازاقتان شىققان تۇڭعىش ەلشى ءنازىر تورەقۇلوۆ جايىندا تۇسىرىلگەن دەرەكتى فيلم. سەيسەنبى كۇنى الماتىداعى «يسكرا» كينوتەاترىندا رەجيسسەر بولات ءشارىپوۆتىڭ «وكىلەتتى ەلشى» اتتى دەرەكتى ءفيلمىنىڭ تۇساۋى كەسىلىپ, جۇرت نازارىنا ۇسىنىلدى.
دەرەكتى فيلم قازاقتان شىققان تۇڭعىش كاسىبي ەلشى ءنازىر تورەقۇلوۆ تاعدىرىنىڭ تاريحقا ءمالىم تۇستارىن كەڭىنەن قامتيدى. فيلمدە ساياسي قۋعىن-ءسۇرگىن سالدارىنان ادىلەتسىز اجال قۇشقان ەلشىنىڭ كەڭەس وداعى كەزىندە سىڭىرگەن ەڭبەگى, يسلام الەمىندەگى العاشقى ديپلومات رەتىندەگى ولشەۋسىز ءرولى ايتىلادى. سونداي-اق ءستاليننىڭ, كىشى ەلدەرگە جۇرگىزىلگەن كەڭەس وداعىنىڭ سولاقاي ساياساتى باياندالادى.
«ءفيلمدى تۇسىرۋگە 9-10 ايداي ۋاقىت كەتتى. ماتەريالدار تابۋدا قيىندىقتار دا بولدى. ءوزىمىزدىڭ, رەسەيدىڭ مۇراعاتتىق ماتەريالدارىن پايدالاندىق. ءبىرقاتار دەرەكتەردى تايىر مانسۇروۆتىڭ ءنازىر تورەقۇلوۆ جايىندا جازعان كىتابىنان الدىق. ەلشى قىزمەت ەتكەن اراب امىرلىگىنەن ءبىز بىلمەيتىن دەرەكتەر تابىلسا, دەرەكتى فيلم تولىعا تۇسەر ەدى. تۋىندىنىڭ ستسەناريىن ءوزىم جازدىم. بۇل ءفيلمدى تۇسىرۋدەگى ماقسات – حالقىمىزدىڭ ۇلى پەرزەنتى, قازاقتىڭ نار ازاماتى, مەملەكەتتىك قايراتكەر, ديپلومات, وكىنىشكە قاراي, كەزىندە ەلەۋسىز قالعان تۇلعانىڭ اتىن, ەسىمىن كەلەشەك ۇرپاققا, جاستارعا جەتكىزۋ بولىپ تابىلادى», – دەدى اتالمىش ءفيلمنىڭ رەجيسسەرى بولات ءشارىپوۆ.
ش.ايمانوۆ اتىنداعى «قازاقفيلم» كينوستۋدياسىنىڭ باس رەداكتورى ديدار امانتايدىڭ ايتۋىنشا, اتالمىش دەرەكتى فيلم مادەنيەت مينيسترلىگىنىڭ تاپسىرىسى بويىنشا تۇسىرىلگەن.
ول «قازاقفيلم» كينوستۋدياسى 2009 جىلى 30-عا تارتا دەرەكتى ءفيلمدى وندىرىسكە جىبەرگەنىن, 2010 جىلى 40-تان استام دەرەكتى فيلم جاساپ شىعارعانىن اتادى. «ونىڭ ىشىندە باۋىرجان مومىش ۇلى, رىمعالي نۇرعاليەۆ, بيبىگۇل تولەگەنوۆا, مۇحتار ماعاۋين, ءابىش كەكىلباەۆ, «قورقىت» تۋرالى دەرەكتى فيلمدەر بار. بۇل فيلمدەردىڭ بارلىعى دايىن بولىپ, ديسكىگە جازىلدى. وتكەن جىلى وندىرىسكە جىبەرىلگەن ءشامشى قالداياقوۆ پەن ءمىرجاقىپ دۋلاتوۆ جايىنداعى فيلمدەر اياقتالۋعا جاقىن. ال, بيىل كەنەسارى قاسىموۆ, ءازىربايجان مامبەتوۆ تۋرالى, «اشتىق» تۋرالى فيلمدەردى جاساۋدى جوسپارلاپ وتىرمىز. الداعى ۋاقىتتا دا قازاق الەمىنە ۇلكەن ەڭبەك سىڭىرگەن, ءبىرتۋار تۇلعالارىمىز جايىندا فيلمدەردى ءتۇسىرۋدى ودان ءارى جالعاستىرا بەرەمىز», – دەيدى ۇلتتىق كينوستۋديانىڭ باس رەداكتورى.
كينوستۋديادان شىققان بارلىق دەرەكتى فيلدەر بەينەتاسپا تۇرىندە شىعارىلىپ, كوگىلدىر ەكران ارقىلى كورەرمەندەر نازارىنا ۇسىنىلماق. ۇلتتىق كينوستۋديا بۇل تۋرالى تەلەارنالارمەن بىرقاتار كەلىسىم-شارتتارعا قول جەتكىزگەن.
ايناش ەسالي, الماتى.