ەلباسى ن. نازارباەۆتىڭ تىكەلەي تاپسىرماسىمەن جانە ۇكىمەتتىڭ 2000 جىلعى 7 قاراشاداعى قاۋلىسىمەن قۇرىلعان «بالداۋرەن» رەسپۋبليكالىق وقۋ-ساۋىقتىرۋ ورتالىعىندا قىزىق كوپ. وسى جىلدار ارالىعىندا مۇندا 58 مىڭنان استام بالا تىنىعىپ, دەنساۋلىقتارىن تۇزەدى.
«بالداۋرەننىڭ» ديرەكتورى مۇحيتدين تولەپباەۆ ورتالىقتىڭ حالىقارالىق, رەسپۋبليكالىق مادەني-كوپشىلىك, عىلىمي-پراكتيكالىق وليمپيادالار مەن كونفەرەنتسيالار وتكىزۋ ورنىنا اينالعانىن ايتادى. ماسەلەن, بىلتىرعى شىلدە ايىندا حالىقارالىق 51-ءشى ماتەماتيكا وليمپياداسى وتكىزىلىپ, ءبىلىم سايىسىندا ءجۇزى باسقا, جۇرەگى ءبىر 560 بالا باق سىناسىپتى. ياعني بۇل, بۋرابايعا ءوز وكىلدەرىن جىبەرگەن الەمنىڭ 98 مەملەكەتى باسقوسۋدىڭ تانىمدىلىعى مەن قازاقستاننىڭ عىلىمي الەۋەتى جايلى قانىقتى دەگەن ءسوز.
جوعارىدا «بالداۋرەننىڭ» قىزىعى كوپ دەدىك. بۇگىنگى كۇننىڭ شىندىعى قۋانىشتىڭ ورتايمايتىندىعىن ايعاقتايدى. ءسۇيىنىشتىسى, ونى ەسەلەۋگە مەملەكەت قانا ەمەس, بۇكىل قوعام, ايتۋلى ازاماتتار دا اتسالىسىپ وتىرعاندىعىندا. كۇنى كەشە مۇندا قىزىعى بولەك وقيعا بولدى. رەسپۋبليكالىق «ساۋال» قوعامدىق قورىنىڭ جانە تاەكۆوندو سپورت كلۋبىنىڭ پرەزيدەنتى, اۋعان سوعىسى ارداگەرلەرى اسسوتسياتسياسى توراعاسىنىڭ ورىنباسارى باقىتبەك سماعۇلوۆ پەن وڭىرگە بەلگىلى كاسىپكەر اباي سادىقوۆ بالالار الەمىنىڭ قۋانىشتى قۇشاعىنا بولەندى.اقىن, سازگەر باقىتبەك سماعۇلوۆ بەيبىت كۇننىڭ قىمباتتىلىعى, سوعىستىڭ زۇلماتتىلىعى جايىندا تەبىرەنە ءان شىرقادى, قازاقستان تاۋەلسىزدىگىنىڭ ارداقتىلىعى حاقىندا جالىندى جىرلار وقىدى. «بالداۋرەننىڭ» كىتاپحاناسىنا «اۋعاننىڭ وت جالىنى», «مەن كورگەن سوعىس», «قان كەشكەن كۇندەر», «نامىستىڭ ق ۇلى, الاشتىڭ ۇلى», «قاھارمان» اتتى تۋىندىلارىن سىيلادى.
ال كاسىپكەر اباي سادىقوۆ بۇل جولى دا جومارتتىقتىڭ عاجاپ ءۇلگىسىن جاسادى. ول كول جاعاسىنداعى قوس قاباتتى مەيماندار ءۇيىن قازاقستان بالالارىنىڭ باقىت ورداسىنا تەگىن سىيلايتىنىن مالىمدەپ, مەنشىك قۇجاتىن تابىستادى. ەندى ەلىمىزدىڭ تۇكپىر-تۇكپىرىنەن بالالارىنان حابار الۋعا كەلگەن اتا-انالار مەن قوناقتار جايلى قونىسقا ورنالاستىرىلاتىن بولادى.
باقبەرگەن امالبەك, اقمولا وبلىسى.