قازاقستاننىڭ تۇركياداعى ەلشىلىگىنىڭ قولداۋىمەن قازاقستاننىڭ ەڭبەك سىڭىرگەن قايراتكەرى, جازۋشى-دراماتۋرگ احمەتجان ءاشيريدىڭ تۇرىك تىلىنە اۋدارىلعان «يديكۋت» رومانىنىڭ تۇساۋكەسەر ءراسىمى ءوتتى.
قازاق پەن ۇيعىر ادەبيەتشىلەر قاۋىمىنان جوعارى باعا العان اتاقتى شىعارما – «يديكۋت» رومانى ەۋرازيا جازۋشىلار قاۋىمداستىعىنا قاراستى «بەنگۋ» باسپاسىنان جارىق كوردى. كىتاپتى اۋدارعان ءومىر بىلگەن, باسپاعا ۇسىنىپ دايىنداعان قازاقستاننىڭ تۇركسوي-داعى وكىلى مالىك وتارباەۆ.
تۇساۋكەسەر راسىمىنە قازاقستاننىڭ تۇركياداعى ەلشىسى جانسەيىت تۇيمەباەۆ, ەۋرازيا جازۋشىلار قاۋىمداستىعىنىڭ توراعاسى ياكۋب وماروعلى, گازي ۋنيۆەرسيتەتى تۇركيات زەرتتەۋ ورتالىعىنىڭ ديرەكتورى, پروفەسسور, عىلىم دوكتورى حۋليا كاساپوعلى چەنگەل, گازي ۋنيۆەرسيتەتىنىڭ پروفەسسورى, عىلىم دوكتورى ايسۋن دەميرەز گيۋنەري جانە انكارا قالاسىنداعى شىعارماشىلىق ءھام مادەني ورتالىقتاردىڭ باسشىلارى, ديپلوماتيالىق جانە مەملەكەتتىك مەكەمەلەردىڭ وكىلدەرى, بەلگىلى تۇرىك قالامگەرلەرى مەن جۋرناليستەر قاتىستى.
انادولى جۇرتىن تۇگەل ءتۇركىنىڭ ۇلى كۇنى – ناۋرىز مەرەكەسىمەن قۇتتىقتاپ, تۇساۋكەسەر ءراسىمىن اشقان ەلشى جانسەيىت تۇيمەباەۆ ەلباسى نۇرسۇلتان نازارباەۆتىڭ باستاماسىمەن قۇرىلىپ, بۇگىنگى كۇندە بەيبىت قاتار ءومىر ءسۇرۋ مادەنيەتىن قالىپتاستىرۋ ماقساتىندا قىزمەت ەتىپ, بۇكىل الەمگە ۇلگى بولىپ وتىرعان قازاقستان حالقى اسسامبلەياسىنىڭ جۇمىسىمەن تانىستىرىپ, قازاقستانداعى ۇلتارالىق كەلىسىم مەن ەلدىڭ بەرەكە-بىرلىگىنە نازار اۋداردى. سونداي-اق, قازاق پەن ۇيعىر ادەبيەتىنىڭ ەجەلدەن ارالاسىپ, تۇركى ادەبيەتىنىڭ قالىپتاسۋىنا وراسان زور ۇلەس قوسقاندىعىن جانە ادەبيەت وكىلدەرى اراسىنداعى قارىم-قاتىناستىڭ جوعارى دەڭگەيدە دامىپ وتىرعاندىعىن جەتكىزدى. «قازاقستان جازۋشىلار وداعىنىڭ مۇشەسى, بەلگىلى جازۋشى, ۇيعىر ادەبيەتىنىڭ بەلدى وكىلى احمەتجان اشيري تۇركى ادەبيەتى مەن ءسوز ونەرىنىڭ دامۋىنا, سونىڭ ىشىندە ۇيعىر ادەبيەتىنە, قازاق ادەبيەتىنە زور ۇلەس قوستى. ەكى تۋىسقان حالىقتىڭ اراسىندا كوپىر بولدى; ەلدى ەلدەستىردى, ۇلتتى ۇيىستىردى. ەلباسى نۇرسۇلتان نازارباەۆتىڭ جۇرگىزىپ وتىرعان سارابدال ساياساتى تۋراسىندا قالام تەربەدى. تاريحي روماندار جازىپ, شىنايى شىعارمالاردى دۇنيەگە اكەلدى. سوندىقتان ءتۇرىك تىلىنە اۋدارىلعان كىتاپتىڭ شىعۋىنا قولداۋ ءبىلدىرىپ, تۋىسقان انادولى جەرىندە كەڭىنەن ناسيحاتتالۋىنا اتسالىستىق. كىتاپتىڭ جولى بولسىن, وقىرمانى كوبەيسىن!» – دەپ ەلشى جۇرەكجاردى تىلەگىن ايتتى.
ەۋرازيا جازۋشىلار قاۋىمداستىعىنىڭ توراعاسى ياكۋب وماروعلى كىتاپتىڭ شىعۋىنا جانە دە تۇساۋكەسەر جيىنىنىڭ وتۋىنە تىكەلەي قولداۋ كورسەتكەن ەلشى جانسەيىت تۇيمەباەۆقا انادولى جۇرتى اتىنان, تۇگەل تۇركى باۋىرلارى اتىنان العىس ايتىپ, احمەتجان اشيريگە شىعارماشىلىق تابىستار تىلەدى.
تۇركياداعى ۇيعىر ادەبيەتىنىڭ زەرتتەۋشى عالىمدارى – پروفەسسور حۋليا كاساپوعلى چەنگەل مەن پروفەسسور ايسۋن دەميرەز گيۋنەري ۇيعىر ادەبيەتىنىڭ قالىپتاسۋ تاريحىن, ۇيعىر ادەبيەتشىلەردىڭ تۇركى مادەنيەتى مەن ونەرگە قوسقان زور ۇلەسىن, قازاق پەن ۇيعىر ادەبيەتى اراسىنداعى بايلانىس پەن دامۋ كەزەڭدەرىن, زيا سامەدي, حيزمەت ابدۋللين, احمەتجان اشيري سىندى ۇيعىر قالامگەرلەرىنىڭ سىڭىرگەن ەڭبەكتەرىن, «يديكۋت» رومانىنىڭ كوركەمدىگى مەن كوتەرگەن سالماعىن ەگجەي-تەگجەي بايانداپ بەردى.
جيىن سوڭىندا ەلشى جانسەيىت تۇيمەباەۆ جازۋشى احمەتجان ءاشيريدى قازاقستان مەن تۇركيا اراسىنداعى دوستىقتىڭ نىعايۋىنا قوسقان ۇلەسى ءۇشىن «قازاقستان-تۇركيا دوستىعى» مەدالىمەن ماراپاتتادى.
«ەگەمەن-اقپارات».