الەم-جالەم الەم
اقش-تا پرەزيدەنتتىكتەن ۇمىتكەر حيللاري كلينتونمەن, سونداي-اق, اكتەر دجوردج كلۋنيمەن جانە ونىڭ ادۆوكات ايەلى امالمەن قايىرىمدىلىق كەشىندە داستارقانداس بولىپ وتىرعىسى كەلەتىندەرگە 353 400 دوللار اقى تولەۋ ۇسىنىلدى.
اتالمىش شارا 15 ءساۋىر كۇنى كاليفورنيادا تۇراتىن كاسىپكەر شەرۆين پيشەۆاردىڭ ۇيىندە وتەدى. ەرتەڭىنە كلينتون مەن ەرلى-زايىپتى كلۋنيلەر بۇلاردىڭ سوڭعىلارىنىڭ وتباسىندا كەزدەسەدى. سول كۇنى گولليۆۋد جۇلدىزىمەن ءبىر ۇستەلدىڭ ۇستىندە وتىرۋعا قۇشتارلار تاعى 33 مىڭ دوللاردان تولەۋلەرى ءتيىس.
يتاليا تۇرمەسىندە ءدامدى تاعامدار رەستورانى اشىلدى
ميلان پروۆينتسياسىنداعى بوللاتە دەپ اتالاتىن تۇرمەنىڭ عيماراتىندا الۋان ءتۇرلى ءدامدى تاعامدار دايىندايتىن رەستوران پايدا بولدى.
InGalera («كاتورگادا») دەگەن اتاۋ بەرىلگەن قوعامدىق تاماقتاندىرۋ مەكەمەسى ءوزىنىڭ وسى اتىن تولىق اقتايدى. مۇنىڭ ءمانى – رەستوراننىڭ بارلىق جۇمىستارى تۇرمەدە جازالارىن وتەپ جاتقانداردىڭ يىقتارىنا ىلىنگەن. تۇرمە باسشىلىعى مۇنىڭ قاماۋدا وتىرعانداردىڭ قوعاممەن قارىم-قاتىناسىن ورنىقتىرىپ, وزدەرىن دۇرىس جولعا سالىپ جىبەرۋ ءۇشىن جاسالىپ وتىرعانىن ايتادى.
«نوۋ كامپ» يوحان كرويفتىڭ قۇرمەتىنە بەرىلۋى ءتيىس
يسپانيانىڭ «بارسەلونا» كلۋبىنىڭ جانكۇيەرلەرى الەۋمەتتىك جەلى ارقىلى «نوۋ كامپ» ستاديونىنا اتى اڭىزعا اينالعان فۋتبولشى يوحان كرويفتىڭ ەسىمىن بەرۋدى تالاپ ەتىپ جاتىر.
ناۋرىزدىڭ 24-ءى كۇنى 68 جاسىندا باقيلىق بولعان گوللاند فۋتبولشىسى 1973 جىلدان «بارسەلونا» ساپىندا 5 ماۋسىم ويناعانىنان بولەك, 1988-1996 جىلدارى وسى كلۋبتى باس باپكەر رەتىندە ءوزى جاتتىقتىرىپ, ونى يسپانيانىڭ 4 دۇركىن چەمپيونى دا ەتكەن بولاتىن.
قازىرگى كۇننىڭ ەركەكتەرى – كوڭىلشەك
وسى زامانعى ەر كىسىلەر ءوز اكەلەرىنە قاراعاندا, كوڭىلشەك بولىپ شىقتى. مۇنى Universal Channel تەلەارناسى 2000 ادامنىڭ قاتىسۋىمەن جۇرگىزگەن ساۋالداما انىقتادى.
حابار بارىسىندا ماماندار قازىرگى كەزدەگى ەركەكتەردىڭ قوعامدىق ورىنداردا ءوز اكەلەرىنە قاراعاندا, كوزدەرىنە جاستى كوبىرەك الاتىنىن اڭعارىپتى. ورتا جاستاعى ەر كىسىلەر 14 رەت كوزدەرىنە قول ورامالدارىن اپارسا, اعا ۇرپاق وكىلدەرى مۇنى نەبارى 5 رەت جاساعان. جاس جىگىتتەر تۇككە تۇرعىسىز نارسەگە بولا كوزدەرىن سۋلاپ قويا سالماي, اراسىندا ەڭىرەپ جىلاپ تۇرعان.
فۋتبول وينايتىن – بالالار, توبەلەسەتىن – اكەلەرى
انگليانىڭ ۋەست-ميدلەندس گرافتىعىنداعى حەيلسوۆەن قالاسىندا بالالار فۋتبول ماتچىنىڭ سوڭى اتا-انالار توبەلەسىمەن اياقتالدى.
جاستارى 14-كە دەيىنگى جاسوسپىرىمدەردىڭ ۇجىمدارى كەزدەسىپ جاتقان. كەزدەسۋدىڭ بىتۋىنە 5 مينۋت قالعاندا تورەشى كوماندالاردىڭ ءبىرىنىڭ قاقپاسىنا ءۇش رەت پەنالتي بەلگىلەپ, تاعى ەكى ويىنشىسىن الاڭنان قۋادى. بۇعان اشۋلانعان اتا-انالار اربيترگە باس سالادى. بۇل سۇرگىنگە قارسى كوماندا ويىنشىلارىنىڭ اتا-انالارى دا قوسىلىپ كەتەدى.
الكوگولدى ازداپ ءىشۋدىڭ پايدالى ەكەنى بەكەر ءسوز
ۇلىبريتانياداعى ۆيكتوريا ۋنيۆەرسيتەتىنىڭ ماماندارى الكوگولدى ازداپ ءىشىپ تۇرۋ ادام اعزاسىنا پايدالى ەكەنى تۋرالى ءميفتىڭ ك ۇلىن كوككە ۇشىردى.
عالىمدار بۇعان ادامداردى ءارتۇرلى توپتارعا ءبولىپ, ولارعا ءار قيلى دەڭگەيدە ءسپيرتتى ىشىمدىك ىشكىزىپ كورۋ ارقىلى جۇرگىزگەن تاجىريبەلەرىنىڭ نەگىزىندە كوز جەتكىزدى. تاجىريبە الكوگولدىڭ قانداي مولشەردەگىسى دە ادامعا پايدا اكەلمەيتىنىن ايعاقتاپ بەرگەن.
اقپارات اگەنتتىكتەرىنىڭ ماتەريالدارى نەگىزىندە دايىندالدى.