جۇرتشىلىق اراسىندا «اكىم» سوزىندەگى ءتورت ءارىپ «ءادىلدىك, كىشىپەيىلدىلىك, ىسكەرلىك, مەيىرىمدىلىك» اتتى ءتورت ۇعىمدى ءبىلدىرەدى دەگەن پىكىر بار. اۋىلدان وبلىسقا دەيىنگى بيلىك تىزگىنى سەنىپ تاپسىرىلعان لاۋازىم يەلەرىنىڭ بويلارىنان تاپ وسىنداي تاماشا قاسيەتتەردى كورگىسى كەلەتىندىگى انىق حالىقتىڭ. تەك سول ءتورت تالاپ ۇدەسىنەن تۇگەل كورىنىپ, ابىروي-بەدەلگە بولەنىپ جۇرگەن اكىمدەردى ساۋساقپەن ساناپ وتىراتىندىعىمىز دا جاسىرىن ەمەس. ال ولاردىڭ قاتارىنا بۇگىندە ادام ءومىرىنىڭ ءبىر بيىك بەلەسى – الپىس جاسقا اياق باسقان ەرىك سۇلتانوۆتى قوسساق, قاتەلەسپەيمىز. بۇعان سولتۇستىك قازاقستان وبلىسىن ەكى جىلعا جۋىق باسقارىپ وتىرعان اتپال ازاماتتىڭ وسى مەرزىم ىشىندە اتقارعان ىستەرىن «اكىم» دەگەن ءسوزدىڭ تەرەڭ ماعىناسى تۇرعىسىنان تارازىلاپ كورسەك كوز جەتكىزە تۇسەمىز.
ادىلدىك تۋرالى ايتقاندا اۋەلى ەرىك حامزا ۇلىنىڭ ءوزى وبلىس اكىمى بولىپ تاعايىندالعانعا دەيىن قىزىلجار وڭىرىندە جول بەرىلگەن كەيبىر الەۋمەتتىك ءادىلەتسىزدىك كورىنىستەرىن بىردەن اڭعارىپ, ورىن العان كەمشىلىكتەردى وزىنە جارناما جاساماي-اق, دابىرا-داڭعازاسىز ءارى باتىل تۇردە تۇزەتۋدى قولعا العانىنا توقتالعان ءجون بولار. ماسەلەن, ول 2014 جىلعى مامىر ايىنىڭ سوڭىندا ءوڭىر تىزگىنىن ءوز قولىنا الىسىمەن بۇدان ءتورت جىل بۇرىن پەتروپاۆل قالاسىنىڭ ورتا تۇسىنان ورىن تابىلماعانداي, شەت جاعىنداعى باتپاقتى جەرىنە قالانعان ىرگەتاسىنىڭ ءوزىن ەكى مارتە سالۋعا تۋرا كەلىپ, قۇرىلىسى تىم ۇزاققا سوزىلىپ كەتكەن نازارباەۆ زياتكەرلىك مەكتەبىندەگى جاعدايدى ادەيىلەپ بارىپ كوردى. ماماندىعى ينجەنەر ەرىك سۇلتانوۆ ماڭىزدى نىسان قۇرىلىسىنىڭ بارىسى ءالى دە باياۋلىعىن بايقاپ, ونى جەدەلدەتۋ شارالارىن دەرەۋ قولعا الۋ كەرەك دەپ شەشتى. استانالىق قۇرىلىسشىلاردىڭ جايباسارلىعىمەن كەلىسپەيتىندىگىن ءبىلدىرىپ, ولارعا ءتيىستى تالاپ قويىپ ءارى ءوز تاراپىنان جاردەم دە كورسەتە وتىرىپ, جۇمىس قارقىنىن ەسەلەپ ارتتىردى. ءسويتىپ, سولتۇستىكقازاقستاندىق ۇزدىك ۇستازدار مەن دارىندى وقۋشىلار زارىعا كۇتكەن وزىق ۇلگىدەگى ءبىلىم ورداسىنىڭ كەلەسى جىلعى استانا كۇنى قارساڭىندا پايدالانۋعا بەرىلۋىنە تىكەلەي ۇيىتقى بولدى.
ال 2011 جىلى «نۇرلى كوش» مەملەكەتتىك باعدارلاماسى بويىنشا قىزىلجار اۋدانىنىڭ ورتالىعى – بەسكولدەن ءۇش شاقىرىمداي جەردە جاڭادان سالىنعان بايتەرەك اۋىلىنا قونىستانعان قانداستاردىڭ باستى مۇقتاجدىعى – بۇل ەلدى مەكەندە مەكتەپتىڭ جوقتىعى. قىزىلجاردىڭ قاقاعان قىسىندا 320 وقۋشىنى بەسكولدەگى مەكتەپتەرگە ءۇش اۆتوبۋسپەن تاسىپ وقىتۋ – لاجسىزدىقتان تۋىنداعان امال-دى. وسى جونىندە شاعىم بىلدىرگەن الىستان كەلگەن اعايىندار الدىندا وبلىستىڭ بۇرىنعى باسشىلارى بايتەرەك اۋىلىندا مەكتەپ سالۋ ءۇشىن رەسپۋبليكالىق بيۋدجەتتەن قارجى ءبولۋ قاراستىرىلماعاندىعىن ايتىپ اقتالعان ەدى. ەرىك حامزا ۇلى بايتەرەكتىكتەردىڭ كوكەيكەستى ماسەلەسىن قالايدا شەشۋ قاجەت دەپ ءتۇيدى. ويلانا كەلە, بايتەرەك اۋىلىندا 300 وقۋشىعا ارنالعان ورتا مەكتەپتى وبلىستىق بيۋدجەت قارجىسى ەسەبىنەن سالعىزۋدى ۇيعاردى. ونىڭ وسى جونىندەگى ۇسىنىسىنا وبلىستىق ءماسليحات دەپۋتاتتارى ءبىراۋىزدان قولداۋ ءبىلدىرىپ, بايتەرەك اۋىلىندا مەكتەپ سالۋدى باستاۋ ءۇشىن ۇستىمىزدەگى جىلعا ارنالعان وبلىستىق بيۋدجەتتەن 205 ميلليون تەڭگە قارجى قاراستىرىلدى. قازىر اتالمىش ەلدى مەكەننىڭ قاق ورتاسىندا قۇرىلىس جۇمىستارى قىزۋ ءجۇرىپ جاتىر. ەرىك سۇلتانوۆ جاقىندا وبلىس تۇرعىندارىمەن بولعان ەسەپ بەرۋ كەزدەسۋىندە بايتەرەكتەگى مەكتەپتى بيىل كۇزدە پايدالانۋعا بەرۋ ءۇشىن قولىنان كەلگەننىڭ ءبارىن دە جاسايتىنىن مالىمدەدى.
كىشىپەيىلدىلىك جايلى پايىمداساق, مىناداي جايت ەسكە تۇسەدى. كوپ ادام شاقىرىلعان جينالىستاردى ۋاقىتىندا باستاماق تۇگىل, جۇرتتى جارتى ساعات-ءبىر ساعات كۇتتىرىپ قويۋدى ورەسكەلدىك سانامايتىن وركوكىرەك اكىمدەردى دە كورگەنبىز. ال ەرىك سۇلتانوۆ القالى جيىنداردى بەلگىلەنگەن ۋاقىتىندا نەمەسە ءسال دە بولسا بۇرىن باستاۋدى ادەتكە اينالدىرىپتى. وسىلايشا جۇرتتىڭ ۋاقىتىن قادىرلەي بىلەتىن ءوڭىر باسشىسى ءوز ۋاقىتىن دا قادىرلەي بىلەدى ەكەن: جينالىس اتاۋلىنى ۇزاققا سوزباي, مۇمكىندىگىنشە قىسقا قايىرۋدى قۇپ كورەتىندىگى بايقالىپ ءجۇر.
كىشىپەيىلدىلىك دەگەن ءسوزدىڭ بالاماسى – كەڭپەيىلدىلىك. ەرىك حامزا ۇلى – الدى كەڭ, مىنەزى اقجارقىن باسشى. وبلىس اكىمى بولىپ تاعايىندالعانىنا ەكى جىلعا قاراسا دا, وڭىردەگى باسشى كادرلاردى اۋىستىرعانى شامالى. «مەشكەي دەگەن جاقسى اتاق ەمەس» دەگەندى ەسكەرگەنى شىعار, ۇستىنەن كاسىپكەرلەر مەن ءماسليحات دەپۋتاتتارى توپتاسا ارىز ايتىپ كەلگەن ءبىر جوعارى لاۋازىم يەسىن ورنىنان بوساتىپ, تەك سوعان عانا باسقا جاۋاپتى قىزمەت ۇسىنباپتى. ال «ءالى كەلمەيتىن شوقپاردى بەلىنە بايلاپ, كوتەرە الماي جۇرگەن» بىرەر باسشىنى جۇمىسسىز قالدىرماي, تومەنىرەك قىزمەتتەرگە ورنالاستىردى.
ەرىك سۇلتانوۆ «نۇر وتان» پارتياسى وبلىستىق فيليالىنىڭ توراعاسى رەتىندە اي سايىن قوعامدىق قابىلداۋ وتكىزىپ, وزىنەن ادىلدىك پەن اراشا ىزدەگەن, قولداۋ مەن كومەك كۇتكەن ادامداردىڭ مۇڭ-مۇقتاجدارىن مۇقيات تىڭداپ, بارىنە دە جاناشىرلىق ءبىلدىرىپ, قولىنان كەلگەنىنشە جاردەم بەرىپ ءجۇر.
ىسكەرلىك جايىنا كەلسەك, ەرىك سۇلتانوۆتىڭ باستاماسىمەن وبلىسىمىزدا تۇڭعىش رەت ءوتكىزىلگەن «قىزىلجارينۆەست-2014» حالىقارالىق ينۆەستيتسيالىق فورۋمى بارىنەن بۇرىن ويعا ورالادى. ويتكەنى, وسىعان دەيىن قىزىلجار ءوڭىرىنىڭ تابيعاتى قاتال – قىسى سۋىق, جازى سالقىن بولعاندىقتان, ينۆەستورلار قىزىقپايدى دەگەن تەرىس پىكىر قالىپتاسقان ەدى. اتالمىش فورۋم سول قاساڭ كوزقاراستىڭ تاس-تالقانىن شىعارعان سياقتى. وعان 15 شەتەلدىڭ وكىلدەرى قاتىستى. قىزىلجار وڭىرىنە كورشىلەس رەسەي مەن قىتايعا قوسا, الەمدەگى ەڭ مىقتى دامىعان وتىز مەملەكەتتىڭ قاتارىنا ەنگەن جاپونيا, سينگاپۋر, اۆستراليا, گەرمانيا, بەلگيا, فينليانديا, يزرايل سياقتى شالعايداعى داۋلەتى شالقىعان ەلدەر دە قىزىعۋشىلىق تانىتتى. وسى باعىتتاعى ۇمتىلىس وڭ ناتيجەسىن بەرە باستادى: بىلتىر پەتروپاۆلداعى بۇرىنعى شاعىن ليتراجدى قوزعالتقىشتار زاۋىتىنىڭ نەگىزىندە «سامۇرىق- قازىنا ينۆەست» جاۋاپكەرشىلىگى شەكتەۋلى سەرىكتەستىگىنىڭ جانە فينليانديا مەن پولشانىڭ بەدەلدى كومپانيالارىنىڭ قاتىسۋىمەن «قازتەحماش» ماشينا جاساۋ زاۋىتى اشىلدى. وندا جوعارى سىنىپتى استىق جيناۋ كومباينى, ءشوپ شاباتىن ماشينا, تىرناۋىش, تىركەمە مەن جەمشوپ تاراتقىش سياقتى اۋىل شارۋاشىلىعى تەحنيكالارى شىعارىلادى. ال ينۆەستيتسيا تارتۋ قارقىنى بويىنشا سولتۇستىك قازاقستان وبلىسى بىلتىر رەسپۋبليكا وڭىرلەرى اراسىندا ءبىرىنشى ورىنعا شىقتى.
وڭىرگە ينۆەستيتسيا تارتۋ ماقساتىمەن تۋريزم سالاسىن دامىتۋدى دا تاباندىلىقپەن قولعا الدى. بۇل باعىتتا, اسىرەسە, «كوكشەتاۋ» ۇلتتىق مەملەكەتتىك تابيعات ساياباعىنىڭ اۋماعىنا كىرەتىن ايىرتاۋ اتىرابىنىڭ الەۋەتىن پايدالانۋعا ەرەكشە نازار اۋدارىلىپ وتىر. سونداعى سۋى ءمولدىر شالقار جانە يمانتاۋ كولدەرىنە كورشىلەس رەسەيدەن اعىلاتىن تۋريستەر سانىن كوبەيتۋ ءۇشىن, ەڭ الدىمەن, ايىرتاۋ اۋدانىنا باراتىن توزىعى جەتكەن, كەدىر-بۇدىر اۆتوموبيل جولدارى كۇردەلى جوندەۋدەن وتكىزىلدى. بۇعان قوسا, كۋرورتتى ايماقتا جاڭا دەمالىس ورىندارى پايدا بولىپ, ءتىپتى, «سولنەچنىي VIP» دەمالىس بازاسىندا تىنىعۋشىلاردى بۇعىنىڭ مۇيىزىنەن جاسالعان دارىمەن ەمدەيتىن شاعىن پانتاورتالىق پەن مارال فەرماسى دا اشىلدى.
ەلوردادا كوپ جىل جاۋاپتى قىزمەتتەر اتقارعان ەرىك سۇلتانوۆ رەسپۋبليكالىق دەڭگەيدەگى باسشىلاردىڭ قايسىسىمەن بولسىن تىكەلەي حابارلاسىپ, تۋىنداعان ماسەلەلەردى سوزباققا سالماي, تەزدەتە شەشۋگە كۇش سالىپ كەلەدى. ماسەلەن, ءوڭىر باسشىسى الدىڭعى جىلعى شىلدە ايىندا شالعايداعى ءۋاليحانوۆ اۋدانى اكىمىنىڭ كىشكەنەكول اۋىلىندا بولعان تۇرعىندار الدىندا ەسەپ بەرۋ كەزدەسۋىنە قاتىسقانىندا جەرگىلىكتى اقساقالدار «استانا – قىزىلتۋ ستانتسياسى» باعىتىنداعى پويىزدىڭ ەكى ۆاگونى جولاۋشىلارعا ازدىق قىلىپ جۇرگەندىكتەن, وعان ءۇشىنشى ۆاگون قوسۋدى سۇراعان وتىنىشتەرىنە ەشكىم قۇلاق اسپاعاندىعىن ايتىپ, شاعىمدانعان ەدى. ەرىك حامزا ۇلى دەرەۋ «قازاقستان تەمىر جولى» ۇلتتىق كومپانياسىنىڭ باسشىلارىمەن تەلەفون ارقىلى سويلەسىپ, ۋاليحانوۆتىقتاردىڭ پروبلەماسىن ءبىر ايدىڭ ىشىندە شەشىپ بەردى. ال بىلتىرعى جىلى ءوڭىر تۇرعىندارىنىڭ وتىنىشتەرىنە وراي استانا – قوستاناي باعىتىندا قاتىنايتىن جۇردەك «تۇلپار – تالگو» پويىزىنىڭ ايىرتاۋ جانە عابيت مۇسىرەپوۆ اتىنداعى اۋدانداردىڭ تۇرعىندارى قالىڭ, ءىرى ورتالىقتارى – ساۋمالكول مەن نوۆويشيمكا اۋىلدارىنداعى تەمىر جول ستانتسيالارىنا توقتاپ, جەرگىلىكتى جولاۋشىلارعا قىزمەت كورسەتۋى ماسەلەسىن دە وڭىنان شەشكىزدى.
ەرىك سۇلتانوۆ وبلىستاعى ءىرى زاۋىتتارعا ۇلتتىق كومپانيالاردىڭ تاپسىرىستارىن بەرگىزۋگە دە بارىنشا ىقپالىن تيگىزىپ ءجۇر. سونىڭ ناتيجەسىندە بىلتىر ءوڭىر ونەركاسىبىنىڭ جەتەكشى سالاسى – ماشينا جاساۋدا 18 پايىزدان استام ءوسىم قامتاماسىز ەتىلدى. وبلىس باسشىسىنىڭ ۇدايى كوڭىل ءبولىپ, قاجەت جەرىندە ۇتىمدى شارالار قولدانۋىنىڭ ارقاسىندا وتكەن جىلى وبلىس ەكونوميكاسىنىڭ بارلىق سالاسىندا نەگىزگى كورسەتكىشتەردىڭ ءوسىمى قامتاماسىز ەتىلدى. مۇنىڭ ءوزى وبلىستىق بيۋدجەتكە تۇسەتىن وزىندىك تابىستى الدىڭعى جىلعىمەن سالىستىرعاندا 5 ميلليارد تەڭگەگە ارتتىرىپ, ونىڭ كولەمىن 32 ميلليارد تەڭگەگە دەيىن جەتكىزۋگە مۇمكىندىك بەردى. ياعني, 18 پايىزدىق ءوسىم قامتاماسىز ەتىلدى. بۇل – ءبىزدىڭ اگروونەركاسىپتى ءوڭىر ءۇشىن بۇرىن-سوڭدى بولماعان رەكوردتىق كورسەتكىش.
قىزىلجار وڭىرىندەگى وزەكتى ماسەلەلەردىڭ ءبىرى – جەرگىلىكتى ماڭىزداعى اۆتوموبيل جولدارىنىڭ دەنىنىڭ توزىعى جەتكەندىگى. وسىنى ەسكەرگەن ەرىك سۇلتانوۆ وبلىس اكىمى بولىپ تاعايىندالىسىمەن جول جوندەۋ ءىسىن ءوزىنىڭ الداعى قىزمەتىنىڭ باسىم باعىتتارىنىڭ ءبىرى ەتىپ ۇستاناتىندىعىن مالىمدەگەن-ءدى. جول سالاسىنىڭ تاجىريبەلى مامانى بولىپ سانالاتىن ءوڭىر باسشىسى قىزىلجاردىڭ جەرگىلىكتى ماڭىزداعى شۇرىق-تەسىك جولدارىن جوندەۋگە قۇنى ارزان بولعانمەن, ساپاسى جوعارى جاڭا تەحنولوگيالاردى بىرتىندەپ ەنگىزۋگە كىرىستى. بۇل ەكسپەريمەنت ءساتتى جۇزەگە اسىرىلدى: ەگەر 2013 جىلى رەسپۋبليكالىق جانە وبلىستىق بيۋدجەتتەردەن ءبولىنگەن 5 ميلليارد تەڭگەدەن استام قارجىعا نەبارى 134 شاقىرىم جول جوندەلگەن بولسا, وسىنشا قارجىعا 2014 جىلى – 290 شاقىرىم, 2015 جىلى 260 شاقىرىم جول قالپىنا كەلتىرىلدى. ال بيىلعى مەجە – 360 شاقىرىم.
پەتروپاۆل قالاسىندا جەرگىلىكتى سپورتسۇيەر قاۋىم بىرنەشە جىلدان بەرى قولقالاپ سۇراپ جۇرگەن مۇز ايدىنى بار سپورت سارايىن سالۋ ءىسى دە 2014 جىلى ەرىك سۇلتانوۆتىڭ باسشىلىعىمەن تياناقتى قولعا الىنىپ, جەدەل بوي كوتەردى. ول وتكەن كۇزدە تولىق اياقتالىپ, پايدالانۋعا بەرىلدى.
وبلىس ورتالىعىنداعى بالاباقشاعا ورنالاسۋ كەزەگىندە 11 مىڭنان استام ءبۇلدىرشىن تۇرعانىن, مۇنىڭ ءوزى قالالىقتاردىڭ «باس اۋرۋىنا» اينالعانىن انىقتاپ بىلگەن وبلىس اكىمى بۇل پروبلەمانى شەشۋدى دە ءوز قولىنا الدى. وسى يگى ىسكە مەملەكەتتىك-جەكەشەلىك ارىپتەستىك بويىنشا جەرگىلىكتى كاسىپكەرلەر تارتىلىپ, ولاردىڭ ءوز بيزنەستەرىنىڭ اياسىن كەڭەيتە تۇسۋلەرىنە بارىنشا جاعداي جاسالدى. ءسويتىپ, وتكەن جىلى پەتروپاۆلداعى مەكتەپ جاسىنا دەيىنگى بالالار مەكەمەلەرىنىڭ جەلىسى 1000-عا جۋىق ورىنعا كەڭەيتىلدى. بۇل – وتكەن عاسىردىڭ توقسانىنشى جىلدارىنداعى ەكونوميكالىق داعدارىس كەزىندە جاپپاي جابىلىپ قالعان بالاباقشالار جۇيەسىن قالپىنا كەلتىرۋدە العاش رەت قول جەتكىزىلگەن ەلەۋلى جەتىستىك. ءسويتىپ, وبلىستا بالالاردى مەكتەپكە دەيىنگى تاربيەمەن قامتۋ كورسەتكىشى 97 پايىزعا دەيىن ءوسىرىلدى.
مەيىرىمدىلىك پەن قايىرىمدىلىق – ەگىز ۇعىمدار. وسى ورايدا ءبىز ەرىك سۇلتانوۆتىڭ ءوز قىزمەتىن ءبىر يماندى ىستەن باستاعانىن جاقسىلىققا جورىعانبىز. اتاپ ايتقاندا, ول وبلىس اكىمى بولىپ تاعايىندالعان سوڭ حالىقارالىق بالالاردى قورعاۋ كۇنى پەتروپاۆل قالاسىنداعى وتباسىلىق ۇلگىدەگى بالالار اۋىلىنا ات باسىن تىرەپ, جەتىم جانە اتا-اناسىنىڭ قامقورلىعىنسىز قالعان بەيكۇنا بۇلدىرشىندەردىڭ جاعدايىمەن تانىستى. 4 ۇيدە ءبىر-ءبىر وتباسى بولىپ تۇرىپ جاتقان 6 جاستان 18 جاسقا دەيىنگى 36 بالا مەن جاسوسپىرىمگە مەرەكەلىك سىيلىقتار ۇسىنىپ قانا قويماي, بالالار اۋىلىنىڭ جانىندا بوس جاتقان جەر تەلىمىن كورىپ, مۇندا تەز ارادا تاعى 2 ءۇي سالعىزىپ بەرەتىنىن ايتتى. ولاردىڭ قۇرىلىسىنا جەرگىلىكتى بيۋدجەتتەن ەشقانداي قارجى ءبولگىزبەي, دەمەۋشىلەر ىزدەستىرىپ تاپتى. وسىلايشا باس-اياعى ءبىر ايدىڭ ىشىندە سالىنعان جاڭا دا جايلى قونىستارعا قالا ىرگەسىندەگى ارحانگەلكا اۋىلىنداعى بالالار باسپاناسىندا تۇرىپ جاتقان 18 جەتكىنشەك اۋىستىرىلىپ اكەلىنىپ, ەكى وتباسىنا ءبولىنىپ ورنالاستىرىلدى. ولار وزدەرىنىڭ بۇدان بىلاي وبلىس ورتالىعىندا ءومىر ءسۇرىپ, قالانىڭ وزىق مەكتەپتەرىندە وقيتىندىقتارىنا قۋانىپ قالدى.
سول جىلعى جازدا ەرىك سۇلتانوۆ وبلىستىڭ شالعاي شەتىندەگى تيميريازەۆ اۋدانىنداعى جالعىز قازاق اۋىلى – جارقىنعا دا بارعان بولاتىن. ىرگەسى بۇزىلماي, ورتا مەكتەبى وقۋشىلارعا تولىپ وتىرعان ەلدى مەكەننىڭ بولاشاعى بار ەكەندىگىنە كوز جەتكىزىپ, جارقىندىقتاردىڭ قانداي ءوتىنىش-تىلەكتەرى بارىن سۇراپ بىلگەن. جاستاردىڭ: «اۋىلىمىزدا كلۋب تا, سپورت زالى دا جوق. كەشكە قايدا بارارىمىزدى بىلمەيمىز...» دەگەن رەنىشىن ەستىگەن سوڭ: «وزدەرىڭدەي جاستارى بار جارقىن اۋىلىنىڭ بولاشاعى دا جارقىن دەپ سانايمىن. سوندىقتان, الداعى ۋاقىتتا سىزدەر ءۇشىن دەنە شىنىقتىرۋ-ساۋىقتىرۋ كەشەنىن سالدىرىپ بەرەمىن», – دەپ ۋادە بەرگەن. كوپ ۇزاماي, قازان ايىنىڭ باسىندا اۋىلعا قۇرىلىسشىلار كەلىپ, جەرگىلىكتى ورتا مەكتەپ جانىنداعى بوس جەرگە جالپى اۋماعى 800 شارشى مەتر, ەكىقاباتتى دەنە شىنىقتىرۋ-ساۋىقتىرۋ كەشەنىن سالۋعا كىرىسىپ كەتتى. ونىڭ قۇرىلىسى بەس ايدىڭ ىشىندە اياقتالىپ, بىلتىرعى ناۋرىز ايىنىڭ باسىندا پايدالانۋعا بەرىلدى. «بۇل كەشەنگە بيۋدجەتتەن ەشقانداي قارجى بولىنبەي, ەرىك حامزا ۇلىنىڭ ءوزى ىزدەستىرىپ تاپقان دەمەۋشىلەر بەرگەن 55 ميلليون تەڭگەدەي قارجىعا سالىندى. قازىر اۋىل جاستارى بوس ۋاقىتتارىن سوندا وتكىزىپ, سپورتپەن اينالىسادى. ءتىپتى اۋىلداعى كوپ كىسى جينالاتىن توي-تومالاقتار دا سول كەشەندە وتكىزىلىپ ءجۇر», – دەدى جارقىن اۋىلى قارايتىن دميتريەۆكا اۋىلدىق وكرۋگىنىڭ اكىمى تالعات ەسلاموۆ بىزبەن كەزدەسكەندە.
ەلباسى نۇرسۇلتان نازارباەۆ 2014 جىلعى قىركۇيەك ايىندا قىزىلجار وڭىرىنە قىزمەت بابىنداعى ساپارى كەزىندە سولتۇستىك قازاقستان وبلىسىنىڭ اكىمى بولىپ تاعايىندالعانىنا ءۇش اي بولعان ەرىك سۇلتانوۆتىڭ قولعا الىپ جاتقان ىستەرى جايلى ەسەبىن تىڭداپ, قۇپتاۋ ءبىلدىرگەن سوڭ جينالعان جەرگىلىكتى ازاماتتارعا قاراپ: «سىزدەرگە جاقسى, تاجىريبەلى اكىم تاۋىپ بەردىك ءارى ول – وزدەرىڭىزدىڭ جەرلەستەرىڭىز. ونىڭ قولىنان ءبارى كەلەدى دەپ ويلايمىن», – دەگەن ەدى. ءبىزدىڭ اكىم مەملەكەت باسشىسىنىڭ سول جولى وزىنە بەرگەن بيىك باعاسى مەن كورسەتكەن زور سەنىمىنە لايىقتى ەكەندىگىن ارادا وتكەن از عانا ۋاقىت ىشىندە اتقارعان يگىلىكتى ىستەرىمەن دالەلدەي ءبىلدى.
كارىباي مۇسىرمان,
قازاقستاننىڭ قۇرمەتتى ءجۋرناليسى.
سولتۇستىك قازاقستان وبلىسى.