ءبىر ەل ءوزىنىڭ قىلمىسكەرىن سوتتاماق ەكەن, وندا تۇرعان نە بار دەۋگە بولادى. بىراق «يۋكوس» كومپانياسىنىڭ بۇرىنعى باسشىسى ميحايل حودوركوۆسكي مەن «مەناتەپ» كومپانياسىنىڭ بۇرىنعى باسشىسى پلاتون لەبەدەۆكە سوت – الەم نازارىندا. ونى كەيبىر ەلدىڭ باسشىلارى دا قاداعالاپ وتىر.
وسى جەردە اڭگىمەنى اقش-تىڭ مەملەكەتتىك حاتشىسى حيللاري كلينتوننىڭ پىكىرىنەن باستاعان ءجون-اۋ. كلينتون حانىم ميحايل حودوركوۆسكي مەن پلاتون لەبەدەۆتى ايىپتاۋ ۇكىمى ادام قۇقىن قامتاماسىز ەتۋ مەن ينۆەستيتسيالىق احۋالدى جاقسارتۋعا بايلانىستى رەسەيدىڭ بەدەلىنە تەرىس ىقپال جاسايدى دەپ مالىمدەدى.
بۇعان رەسەي باسشىلارىنىڭ دا جاۋابى بار. ءبىر ەمەس, تالاي رەت جاۋاپ بەرۋگە تۋرا كەلگەن. جۋرناليست اعايىندار ءساتى تۇسكەن كەزدە رەسەي باسشىلارىنان ونى ءسوز ەتۋدى استە دە قاپى جىبەرمەيدى. الدىمەن ۆلاديمير ءپۋتيننىڭ جاۋابىنا كەلەيىكشى. پرەمەر-مينيستر ەل حالقىمەن بەينەبايلانىستا بولعان كەزدە بىلاي دەدى: «بۇعان بايلانىستى كوپ ايتتىم. تاعى دا قاجەت دەسەڭدەر, ۆىسوتسكيدىڭ كەيىپكەرىنىڭ ءسوزىمەن جاۋاپ بەرەيىن: «ۇرىنىڭ ورنى – تۇرمە». سوت شەشىمىنە سايكەس وعان ايتارلىقتاي قوماقتى ۇرلىعى جونىندە ايىپ تاعىلىپ وتىر. اڭگىمە ونىڭ سالىق تولەمەگەنى, الاياقتىعى جايىندا, ەسەپ ميللياردتاعان رۋبلگە كەتەدى. اقش-تا وسىنداي ۇرلىعى ءۇشىن مەدوفف مىرزا 150 جىلعا سوتتالعان». پۋتين حودوركوۆسكيدىڭ تاعى دا ءبىراز قىلمىسىن تىزبەلەي كەلىپ, رەسەي سوتىنىڭ تىم جۇمساقتىعىن ايتادى.
پرەزيدەنت دميتري مەدۆەدەۆتىڭ پىكىرى وزگەشەلەۋ, جالپىلاما. سويتسە دە ونىڭ مىنا ءبىر پىكىرىنە توقتالا كەتەيىك: «...پرەزيدەنت تە, مەملەكەتتىك قىزمەتتەگى كەز كەلگەن لاۋازىمدى تۇلعا دا بۇل ىسكە نەمەسە باسقاداي ىسكە ۇكىم شىعارىلعانعا دەيىن, ايىپتالعان نەمەسە اقتاعانعا دەيىن ءوز پوزيتسياسىن بىلدىرۋگە قاقىسى جوق – بۇل ايدان انىق»,– دەدى. مۇنى ءبىر جاعىنان تىكەلەي جاۋاپتان قاشقالاقتاۋ دەۋگە دە بولار. حودوركوۆسكي ماسەلەسىنىڭ جىر بولىپ كەلە جاتقانىنا ءبىراز ۋاقىت. بيلىك ايىپتايدى, وپپوزيتسيا جاقتايدى, ولاردى سىرتتاعى كۇشتەر قولدايدى. العاشىندا ونى لەبەدەۆ ەكەۋىن 2003 جىلى «اپاتيت» كومپانياسىنىڭ اكتسيالارىن ۇرلادى دەگەن ايىپپەن ۇستاپ, 2005 جىلى سوتتاپ تا جىبەرگەن. بيىل جازالارىن وتەپ, بوستاندىققا شىعۋعا ءتيىس ەدى. ءبىراق ولارعا جاڭا ايىپ تاعىلىپ, جاڭا جىلدىڭ قارساڭىندا 13,5 جىلدان ارقالاتتى.
جالپى, رەسەي بيلىگى ولاردى قالايدا قاماۋدان شىعارعىسى جوقتىعى اڭعارىلادى. ولارعا تاعىلعان جاڭا ايىپ تا تىم اۋىر – 218 ميلليون توننا مۇناي ۇرلاعان كورىنەدى. ونى اقشاعا شاققاندا 7,5 ميلليارد دوللار. قازىر بۇل ىسكە بايلانىستى رەسەي قاۋىمى ەكىگە جارىلعانداي. بىرەۋلەر داتتايدى, بىرەۋلەر جاقتايدى. اقپارات قۇرالدارى دا ءوز پىكىرلەرىن اشىق بىلدىرە الماي وتىرعان كەيىپتە. ەل باسشىسىنىڭ ءبىرى «حودوركوۆسكيدىڭ ورنى – ءتۇرمە» دەپ وتىرعاندا, ونى اشىق اقتاۋعا باتا المايتىنداي.
وليگارحتارعا ۇكىم شىعارىلدى. بىراق اڭگىمە مۇنىمەن اياقتالمايتىن سياقتى. ولاردىڭ جاقتاستارى ىشتە دە, سىرتتا دا بار.
ماماديار جاقىپ.