تاۋەلسىز مەملەكەتتەر دوستاستىعى بايقاۋشىلارى ميسسياسىنىڭ وكىلدەرى ورتالىق سايلاۋ كوميسسياسىندا بريفينگ وتكىزىپ, سايلاۋ ناۋقانىنا قاتىستى پىكىرلەرىمەن ءبولىستى.
تمد بايقاۋشىلار ميسسياسى شتابىنىڭ مۇشەسى ەۆگەني كوزياكتىڭ اتاپ وتۋىنشە, ميسسيا قۇرامىندا ازەربايجان, ارمەنيا, بەلارۋس, قىرعىزستان, مولدوۆا, رەسەي, تاجىكستان, تۇرىكمەنستان, وزبەكستان ەلدەرىنەن, تمد-عا قاتىسۋشى مەملەكەتتەردىڭ پارلامەنتارالىق اسسامبلەياسىنان, بەلارۋس پەن رەسەي وداعى پارلامەنتتىك جينالىسىنان, ۇقشۇ پارلامەنتتىك اسسامبلەياسىنان جانە تمد اتقارۋشى كوميتەتىنەن 301 بايقاۋشى اككرەديتتەلگەن.
«سان جاعىنان العاندا, بۇل حالىقارالىق بايقاۋشىلاردىڭ ەڭ ۇلكەن ميسسياسى بولىپ وتىر. ولاردىڭ باسىم بولىگى سايلاۋ كۇنىنە دەيىن قازاقستانعا كەلەدى. سايلاۋدى بايقاۋ اياسىندا ميسسيا مۇشەلەرى باس پروكۋراتۋرادا, جوعارعى سوتتا جانە ىشكى ىستەر مينيسترلىگىندە بولىپ, كەزدەسۋلەر وتكىزدى. باس پروكۋرورمەن كەزدەسۋ بارىسىندا ميسسيا وكىلدەرىنە سايلاۋ ناۋقانى كەزەڭىندە زاڭنامانىڭ ساقتالۋىن قادالاعاۋ بويىنشا اتقارىلعان جۇمىستار ءسوز بولدى. جوعارعى سوت باسشىلىعى سايلاۋ ۇدەرىسىندەگى سوتتاردىڭ ءرولى جايىندا ايتىپ بەردى. ال ىشكى ىستەر مينيسترىمەن وتكەن كەزدەسۋدە سايلاۋ وتكىزۋ بارىسىندا قاۋىپسىزدىكتى قامتاماسىز ەتۋ ءۇشىن قابىلدانعان شارالار جايىندا اڭگىمە بولدى», – دەدى ەۆگەني كوزياك.
ءاليسۇلتان قۇلانباي,
«ەگەمەن قازاقستان».