اقتوبە قالاسىندا بيىل ۇلتىمىزدىڭ ۇلىق مەرەكەسى ناۋرىزدى تويلاۋ وزىندىك ورنەكپەن باستالدى دەۋگە بولادى. وسى جىلى اقتوبەلىكتەر كۇن مەن ءتۇن تەڭەسەتىن 22 ناۋرىزعا دەيىن ءار كۇندى ناقتى اتاۋمەن وتكىزۋدە. مىسالى, 14 ناۋرىز «كورىسۋ» كۇنىمەن باستالىپ, «جايناۋ», «تاعزىم», «شەبەرلىك», «شاتتىق», «بەرەكە», «ءۇيلەسىم» اتاۋىمەن 21-22 ناۋرىزداعى « ۇلى ءىس» كۇنىنە جالعاسادى.
قازاق حالقىنىڭ ەجەلگى سالت-ءداستۇرى بويىنشا ەلىمىزدىڭ باتىس وڭىرىندە 14 ناۋرىزدا كورىسۋ باستالدى. وسى داستۇرگە وراي وبلىس اكىمى بەردىبەك ساپارباەۆ ايماقتىڭ دامۋىنا زور ۇلەس قوسقان تانىمال اقساقالداردى قۇتتىقتادى. ەڭبەك ارداگەرى سماتۋللا بەركىمباەۆ كورىسۋ مەرەكەسىندە ادامدار تاڭەرتەڭنەن ەڭ ادەمى كيىمدەرىن كيىپ, كورشى-كولەمدى جاعالاپ, مۇمكىن بولسا, جاقىن ماڭداعى اۋىل-ايماقتاردى ارالاپ, اماندىعىن بىلەتىن بولعانىن, كسرو جانە قازاق كسر حالىق اعارتۋ ءىسىنىڭ ۇزدىگى, 88 جاستاعى نيەتجان بەرىكوۆ كورىسۋدىڭ ءوسكەلەڭ ۇرپاقتى تاربيەلەۋدە ۇلكەن ماڭىزعا يە ەكەندىگىن اتاپ ءوتتى. ءوز كەزەگىندە ءوڭىر باسشىسى اقساقالدارعا زور دەنساۋلىق, ۇزاق عۇمىر, باقىت ءتىلەپ, اكىمدىك اتىنان ەستەلىك سىيلىقتار تاپسىردى.
اقتوبەدە جانە وعان قاراستى اۋىلدىق وكرۋگتەردە كوپتەگەن ءىس-شارالار, حالىقتىق سەرۋەندەر وتەدى, 60 كيىز ءۇي تىگىلىپ, التىباقاندار ورناتىلادى. 21 ناۋرىزدا حالىقتىق سەرۋەندەر قوبىلاندى باتىر اتىنداعى ورتالىق ستاديون, «مەگا اقتوبە» سوك الاڭدارىندا, پۋشكين اتىنداعى جانە «رەترو» ساياباعىندا وتەدى. مەرەكە قوناقتارى بەس كونتسەرت الاڭدارىندا بولا الادى. بۇل جەرلەردە ۇلتتىق ناقىشى بار ءساندى كيىز ۇيلەر ورناتىلىپ, مەرەكەلىك باعدارلامالار ۇيىمداستىرىلادى, ۇلتتىق سالت-داستۇرلەر كورسەتىلىپ, كونكۋرستار, ويىندار وتكىزىلەدى.
بارلىق حالىق سەرۋەندەيتىن جەرلەردە ۇلتتىق سالت-داستۇرلەر كورىنىس تاۋىپ, مەرەكەلىك باعدارلامالار, كونتسەرتتەر, كونكۋرستار, ويىندار, سپورتتىق جارىستار ۇيىمداستىرىلادى. ەڭ ۇزدىك كيىز ۇيگە كونكۋرستار, اجەلەر, قالىڭدىقتار اراسىنداعى, ەڭ ۇزىن بۇرىمدى قىزدار اراسىنداعى جانە باسقا دا كونكۋرستار وتكىزىلمەك.
ناۋرىز مەرەكەسى كۇنى اقتوبەلىكتەر مەن قالا قوناقتارىنا ءدام تاتقىزۋ ءۇشىن كافەلەر مەن مەيرامحانالار 7 توننا باۋىرساق پەن 5 مىڭ ليتر ناۋرىز كوجە دايىنداپ, ۇسىنعالى وتىر.
ناۋرىز مەرەكەسىنە ارنالعان قىزىقتى دا ءساندى جارىقتىق بەزەندىرۋلەر, شاعىن ساۋلەتتىك پىشىندەر جاسالدى. شاھاردا ءار اتاۋلى كۇن اياسىندا وتكىزىلەتىن كوپشىلىك مادەني-مەرەكەلىك شارالار جالعاسۋدا. ولاردا ۇلتتىق ناقىشتىڭ بۇرىنعىدان دا باسىمداۋ بولۋى الدىن الا ويلاستىرىلعان.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.