الماتى قالاسىندا قازاقستان رەسپۋبليكاسىنىڭ 2015 جىلعى 2 قاراشاداعى «قوعامدىق كەڭەستەر تۋرالى» زاڭىنا سايكەس, الماتى قالاسىنىڭ قوعامدىق كەڭەسىن قۇرۋ بويىنشا جۇمىستار جالعاسۋدا.
قازاقستان ۇكىمەتىنىڭ 2015 جىلعى 31 جەلتوقسانداعى №1194 قاۋلىسىمەن بەكىتىلگەن «قوعامدىق كەڭەس تۋرالى» ۇلگىلىك ەرەجەنى باسشىلىققا الا وتىرىپ, 24 قاڭتار مەن 2 اقپان ارالىعىندا الماتى قالاسىنىڭ قوعامدىق كەڭەسىن قالىپتاستىرۋ جونىندەگى جۇمىس توبىنىڭ مۇشەلەرىن ىرىكتەۋ بويىنشا بايقاۋ وتكىزىلىپ, الماتى قالاسى ءماسليحاتى حاتشىسىنىڭ 2016 جىلعى 5 اقپانداعى وكىمىمەن 27 ادامنان تۇراتىن جۇمىس توبى قۇرىلدى. جۇمىس توبىنىڭ قۇرامى الماتى قالاسى ءماسليحاتىنىڭ جانە الماتى قالاسى ىشكى ساياسات باسقارماسىنىڭ رەسمي ينتەرنەت-رەسۋرستارىندا ورنالاستىرىلعان.
سونىمەن قاتار, 12 اقپان مەن 2 ناۋرىز ارالىعىندا الماتى قالاسىنىڭ قوعامدىق كەڭەسىنىڭ مۇشەلەرىن ىرىكتەۋ بويىنشا بايقاۋ ءوتتى. ناتيجەسىندە جۇمىس توبىنا 177 ءوتىنىم كەلىپ ءتۇستى, سونىڭ ىشىندە ازاماتتىق قوعام ۇيىمدارىنىڭ ۇسىنىسى بويىنشا 71 ادام, ءوز-ءوزىن ۇسىنعان ازاماتتار سانى 106-نى قۇرادى. ولاردىڭ 64-ءى – ايەل, 113-ءى – ەر ادام. ۇلتتىق قۇرامى بويىنشا قازاق – 132 ادام, ورىس – 30 ادام, ۇيعىر – 6 ادام, كورەي – 3 ادام, تاتار – 2 ادام جانە وزگە ۇلت وكىلدەرى 4 ادامدى قۇرايدى. جاس كورسەتكىشتەرى بويىنشا 18 ادام 18-29 جاس ارالىعىندا, 42 ادام 30-39 جاس ارالىعىندا, 31 ادام 40-49 جاس ارالىعىندا, 37 ادام 50-59 جاس ارالىعىندا, 60-تان جوعارى جاستاعى ادامدار سانى – 49. وسى رەتتە, ەڭ جاس ۇمىتكەر 19 جاستا, ەڭ ەرەسەگى – 83-تە.
الەۋمەتتىك باعىتىنا قاراي كورسەتكىش كەلەسىدەي: ازاماتتىق قوعام وكىلدەرى – 63 ادام, ءبىلىم سالاسىنان – 10, عىلىم جانە مادەنيەت سالاسىنان – 7, دەنساۋلىق ساقتاۋ سالاسىنان – 8, قارجى جانە ەكونوميكا سالاسىنان – 21, كاسىپكەرلىك سالاسىنان – 27, ونەركاسىپ سالاسىنان – 4, بيۋدجەتتىك سالادان – 12, زەينەتكەرلەر – 11 ادام, جۇمىسسىزدار – 3, سپورت, باق, قۇرىلىس سالالارىنان, ستۋدەنتتەر, ءالجۋاز توپ وكىلدەرىنەن – 2 ادامنان جانە اۋىلشارۋاشىلىق سالاسىنان – 1 ادام.
زاڭنىڭ 9-بابىنىڭ 1-تارماعىنا سايكەس, قوعامدىق كەڭەس قۇرامى جۇمىس توبىمەن قۇرىلادى. جۇمىس توبىنىڭ وتىرىسى الداعى ۋاقىتتا ۇيىمداستىرىلىپ, قوعامدىق كەڭەس ءمۇشەلەرى داۋىس بەرۋ ارقىلى ىرىكتەلەتىن بولادى.
ايناش ەسالي,
«ەگەمەن قازاقستان».
الماتى.