پارلامەنت ءماجىلىسى مەن بارلىق دەڭگەيدەگى ءماسليحاتتار سايلاۋلارىنىڭ ناۋقانى مارەگە جاقىنداپ كەلەدى. وبلىستاعى بارلىق 818 سايلاۋ ۋچاسكەسىندە تىنىمسىز جۇمىستار جالعاسىپ جاتىر. ولارعا سايلاۋشىلار ءجيى كەلىپ, سايلاۋ ناۋقانىنا, داۋىس بەرۋگە قاتىستى ءتۇرلى سۇراقتارىنا جاۋاپ الادى.
قازىر ۋچاسكەلەردىڭ بارلىعى دا سايلاۋدى وتكىزۋگە دايىن. دەگەنمەن, سايلاۋ كۇنى جاقىنداعان سايىن وبلىستىق سايلاۋ كوميسسياسى داۋىس بەرۋ ەرەجەسىن سايلاۋشىلاردىڭ نازارىنا ءبىر پىسىقتاپ الۋدى ءجون كورىپتى. وسىعان وراي ولار بۇقارالىق اقپارات قۇرالدارى وكىلدەرىن شاقىرىپ, سايلاۋ كۇنى داۋىس بەرۋ ەرەجەسى تۋرالى ايتىپ بەردى.
– قازاقتا «تويدىڭ بولعانىنان بولادىسى قىزىق» دەگەن ءسوز بار. ساياسي ناۋقان كەزىندە سايلاۋ ۋچاسكەلەرىندە بەلسەندى, قىزۋ جۇمىستار جۇرگىزىلدى. بۇل ناۋقاندا سايلاۋشىلار ءوزىنىڭ قالاۋلى دەپۋتاتتارىن تاڭداپ الادى, سوندىقتان بۇل سايلاۋ ەلىمىزدەگى دەموكراتيانىڭ قادامىنا دا سىن ءارى ۇلەس بولارى بەلگىلى. ول ءۇشىن بارىنشا ادىلەتتىلىك ساقتالۋى ءتيىس. سايلاۋشىلارعا از عانا كۇن قالدى, داۋىس بەرۋ ەرەجەسىن تاعى دا سايلاۋشىلاردىڭ ەسىنە سالىپ قويعاندى ءجون كورەمىز, – دەدى جۋرناليستەرمەن كەزدەسۋىندە وبلىستىق سايلاۋ كوميسسياسىنىڭ مۇشەسى قايىرحان جۇماباەۆ.
– سايلاۋدىڭ ءادىل ءوتۋى زاڭ ارقىلى بەكىتىلگەن ەرەجەنىڭ ساقتالۋىنا تىكەلەي بايلانىستى. ادىلەتتىلىك سالتانات قۇرۋى ءۇشىن ۇساق-تۇيەك بولماۋى ءتيىس, – دەگەن وبلىستىق سايلاۋ كوميسسياسىنىڭ حاتشىسى الەكساندر مالاشكو وبلىستىق سايلاۋ كوميسسياسىنىڭ مۇشەلەرى سايلاۋ كۇنى داۋىس بەرۋگە كەلە المايتىن جاعدايدا ءوز سايلاۋ ۋچاسكەسىنە الدىن الا كەلىپ, شىعارۋ كۋالىگىن الۋعا ارىز بەرۋى كەرەكتىگىنە ەرەكشە توقتالدى.
مۇنداي كۋالىك 19 ناۋرىز كۇنى كەشكى 18.00 ساعاتقا دەيىن عانا بەرىلەدى ەكەن. ول كۋالىكپەن سايلاۋشى تەك ساياسي پارتيالار ءۇشىن عانا داۋىس بەرۋگە قۇقىلى كورىنەدى. ال سايلاۋشىلاردىڭ دەنساۋلىعىنا, وتباسىندا ناۋقاس ادامدى كۇتۋىنە, الىس اۋدانداردان, سايلاۋ ۋچاسكەسى قۇرىلماعان شالعاي اۋىلداردان ءوزىنىڭ سايلاۋ ۋچاسكەسىنە جەتە المايتىنداي جاعدايلاردا ولار ءۇشىن تۇرعان جەرىندە داۋىس بەرۋ ۇيىمداستىرىلاتىنى دا اتاپ ايتىلدى. ونداي ارىز داۋىس بەرەتىن كۇنى كۇندىزگى 12.00-گە دەيىن قابىلدانادى. سايلاۋ كوميسسياسىنىڭ مۇشەلەرى سايلاۋشىلاردى داۋىس بەرۋدە بەلسەندىلىك كورسەتۋگە شاقىردى.
ءنازيرا جارىمبەتوۆا,
«ەگەمەن قازاقستان».
قوستاناي.