مەملەكەتتىك قىزمەت ءىستەرى مينيسترلىگىنىڭ اقتوبە وبلىسى بويىنشا دەپارتامەنتى دارىندى جاستاردى مەملەكەتتىك قىزمەتكە تارتۋ ماقساتىندا ءوڭىردە العاش رەت «مانساپ» اقتوبە ستۋدەنتتىك مەملەكەتتىك قىزمەت مەكتەبىن اشۋعا ۇيىتقى بولدى. بۇل جوبا ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىمەن, وبلىستىق مەملەكەتتىك قىزمەتكەرلەردى قايتا دايارلاۋ جانە بىلىكتىلىگىن ارتتىرۋ ورتالىعىمەن جانە وبلىستىق جاستار ساياساتى ماسەلەلەرى جونىندەگى باسقارمامەن بىرلەسىپ جۇزەگە اسىرىلدى.
ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنىڭ بازاسىندا اشىلعان «مانساپ» مەكتەبىنىڭ ماقساتى جاس كوشباسشىلارعا مەملەكەتتىك ورگانداردان تاجىريبەدەن ءوتۋ ارقىلى مەملەكەتتىك قىزمەتكە داعدىلانۋعا مۇمكىندىك بەرۋ بولىپ تابىلادى. مەكتەپكە وقۋشىلاردى قابىلداۋ ەكى كەزەڭنەن تۇراتىن كونكۋرستىق ىرىكتەۋ نەگىزىندە جۇرگىزىلەدى. ءبىرىنشى كەزەڭدە تالاپكەر قر زاڭنامالارىن بىلۋگە ارنالعان تەستىلەۋدەن وتەدى, ەكىنشى كەزەڭدە اڭگىمەلەسۋ مەن ءبىر تاقىرىپقا ەسسە جازۋ قاراستىرىلعان. تاجىريبەدەن ءوتۋ بارىسىندا 3-4 كۋرس ستۋدەنتتەرى مەملەكەتتىك قىزمەتكەرگە قاجەتتى ءبىلىم مەن عىلىمدى يگەرەدى. مەكتەپ تىڭداۋشىلارى العان ءبىلىمدەرىن وبلىستىڭ مەملەكەتتىك مەكەمەلەرىندە تاعىلىمدامادان ءوتۋ ارقىلى نىعايتادى. تاعىلىمداما ءناتيجەسىمەن «مانساپ» مەكتەبىنىڭ تۇلەكتەرىنە وقۋ كۋرسىن اياقتاعانى تۋرالى سەرتيفيكات بەرىلەدى.
بۇل جوبا «مانساپ» مەكتەبىنىڭ تۇلەكتەرىنە بولاشاقتا وسى سالاداعى ەڭبەك جولدارىندا بيىك بەلەستەردى باعىندىرىپ, تەك زاڭ اياسىندا جانە ەل ءمۇددەسىنە ادال قىزمەت ەتۋگە ءمۇمكىندىك بەرەدى. مۇندا قازىر 25 ستۋدەنت مەملەكەتتىك قىزمەت سالاسى بويىنشا قوسىمشا ءبىلىم الۋدا.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.