بۇل تۋرالى كەشە ورتالىق كوممۋنيكاتسيالار قىزمەتىندە بولعان ءباسپاسوز ءماسليحاتىندا ءمالىم بولدى. «مۋزارت» توبى مەن قازاقستان ۇلتتىق تەلەارناسى ۇيىمداستىرىپ وتىرعان جوبانىڭ وزىنە ءتان ەرەكشەلىكتەرى بار.
– بۇل جوبا نەگىزىنەن ءۇش كەزەڭنەن تۇرادى. ءبىرىنشىسى – ىرىكتەۋ كەزەڭى. ول ونلاين تۇرىندە, ياعني جوبانىڭ رەسمي سايتىندا جۇرگىزىلەدى. قاتىسۋعا نيەت بىلدىرگەندەر سايتقا تىركەلىپ, ارنايى ساۋالدامانى تولتىرىپ, فوتوسۋرەتتەرى مەن ءان جازىلعان بەينەفايلدارىن جىبەرۋ كەرەك. ونلاين-ىرىكتەۋدەن وتكەن ۇمىتكەرلەر ەكىنشى كەزەڭگە جولداما الادى. ەكىنشى كەزەڭدە «مۋزارت» توبى بەس ايماقتىق ىرىكتەۋگە كىرىسەدى. ايماقتىق ىرىكتەۋ اتىراۋ (باتىس ءوڭىرى), سەمەي (شىعىس ءوڭىرى), استانا (ورتالىق جانە سولتۇستىك ءوڭىر), شىمكەنت (وڭتۇستىك ءوڭىر) جانە الماتى (الماتى وبلىسى) قالالارىندا وتكىزىلەدى. ەكى كەزەڭنەن سۇرىنبەي وتكەن 60 ۇمىتكەرگە جوباعا قاتىسۋ ءۇشىن جولداما بەرىلەدى. ءتۇسىرىلىمگە كىل مىقتىلار عانا سۇرىپتالىپ, اقتىق سىندا بارى-جوعى 6 ادام باق سىنايدى, دەدى توپ مۇشەسى ساكەن مايعازيەۆ.
«مۋزارت LIVE» مۋزىكالىق تەلەجوباسىنا 16-دان 25 جاسقا دەيىنگى ارالىقتاعى دارىندى بوزبالالار مەن بويجەتكەندەر قاتىسا الادى. ۇمىتكەرلەردىڭ مۋزىكالىق ءبىلىمىنىڭ بولۋى شارت ەمەس. سونداي-اق, مۋزىكالىق تالعامى مەن ورىنداۋشىلاردىڭ قۇرامىنا (سولو, دۋەت, توپ) ءمان بەرىلمەيدى. ەڭ باستى تالاپ – قاتىسۋشى مەملەكەتتىك تىلدە ءان ايتا بىلۋگە مىندەتتى.
تەلەجوبا جۇرگىزۋشىلەرى بەلگىلى اكتەر ازامات ساتىبالدى, جاس اكتەر, تەلەجۇرگىزۋشى نۇرسۇلتان ەسجان جانە جۋرناليست دينا تولەپبەرگەن بولماق. بايقاۋدىڭ پروديۋسەرى رەنات گايسين ەكەنىن ەستەرىڭىزگە سالامىز.
راۋان قايدار,
«ەگەمەن قازاقستان».