كەشە ورتالىق سايلاۋ كوميسسياسىنىڭ وتىرىسى ءوتتى. وندا 2016 جىلعى 16 ناۋرىزدا «حابار» تەلەارناسىندا پارلامەنت ءماجىلىسىنىڭ دەپۋتاتتارىن سايلاۋعا قاتىساتىن ساياسي پارتيالاردىڭ پىكىرسايىسىن وتكىزۋ تۋرالى قاۋلى قابىلداندى جانە ونى وتكىزۋدىڭ رەگلامەنتى بەكىتىلدى.
ورتالىق سايلاۋ كوميسسياسىنىڭ مۇشەسى ءلاززات سۇلەيمەننىڭ سوزىنە قاراعاندا, پىكىرسايىسقا قاتىسۋ ءۇشىن سايلاۋعا قاتىسۋشى ءاربىر ساياسي پارتيادان ءبىر وكىلدەن شاقىرىلادى. قاتىسۋشىلار جەكە باستى قارالاۋدان, ساياسي پارتيانىڭ, ونىڭ مۇشەلەرىنىڭ نامىسىنا, ابىرويى مەن ىسكەرلىك بەدەلىنە كورىنەۋ نۇقسان كەلتىرەتىن ءسوز ايتۋدان, باسقا ساياسي پارتيالاردىڭ وكىلدەرىن كەمسىتۋدەن اۋلاق بولىپ, جالپىعا بىردەي قابىلدانعان ادەپ نورمالارىن ساقتاۋعا ءتيىس.
«ەلىمىزدىڭ كونستيتۋتسيالىق قۇرىلىسىن كۇشتەپ وزگەرتۋدى, ونىڭ تۇتاستىعىن بۇزۋدى, مەملەكەت قاۋiپسiزدىگىنە نۇقسان كەلتiرۋدى, الەۋمەتتىك, ناسىلدiك, ۇلتتىق, دiني, تەكتiك-توپتىق جانە رۋلىق ارازدىقتى قوزدىرۋدى, قاتىگەزدiك پەن زورلىق-زومبىلىققا باس ۇرۋدى, سونداي-اق, زاڭنامادا كوزدەلمەگەن اسكەريلەندiرىلگەن قۇرالىمدار قۇرۋدى ناسيحاتتاۋعا جانە ۇگىتتەۋگە جول بەرىلمەيدى. پىكىرسايىس ۋاقىتى 90 مينۋتقا سوزىلۋى مۇمكىن», – دەدى ول وسىعان قاتىستى.
وتىرىستا ورتالىق سايلاۋ كوميسسياسى «2016 جىلعى 20 ناۋرىزعا تاعايىندالعان قازاقستان رەسپۋبليكاسى پارلامەنتى ءماجىلىسى دەپۋتاتتارىنىڭ كەزەكتەن تىس سايلاۋىنا جانە ءماسليحاتتارى دەپۋتاتتارىنىڭ كەزەكتى سايلاۋىنا حالىقارالىق ۇيىمدار مەن شەت مەملەكەتتەردىڭ بايقاۋشىلارىن اككرەديتتەۋ تۋرالى» قاۋلى دا قابىلدادى. اتالعان قاۋلىعا سايكەس ورتسايلاۋكوم قازاقستان رەسپۋبليكاسى سىرتقى ىستەر مينيسترلىگىنىڭ ۇسىنۋى بويىنشا سايلاۋدى بايقاۋ جونىندەگى ەكى ميسسيانىڭ, ەكى حالىقارالىق ۇيىمنىڭ جانە 29 شەت مەملەكەتتىڭ تاعى 207 بايقاۋشىسىن اككرەديتتەدى. ولاردىڭ ىشىندە ەقىۇ/دياقب ميسسياسىنىڭ 89 بايقاۋشىسى, تمد ميسسياسىنىڭ 8 بايقاۋشىسى, ەۋروپا كەڭەسىنىڭ پارلامەنتتىك اسسامبلەياسىنان 14, تۇركىتىلدەس ەلدەر ىنتىماقتاستىعى كەڭەسىنەن 17 جانە شەت مەملەكەتتەن 79 بايقاۋشىنى اككرەديتتەدى.
«2016 جىلعى 14 ناۋرىزداعى جاعداي بويىنشا ورتسايلاۋكوم سىرتقى ىستەر مينيسترلىگىنىڭ ۇسىنۋى بويىنشا حالىقارالىق ۇيىمدار مەن شەت مەملەكەتتەردىڭ بارلىعى 815 بايقاۋشىسىن اككرەديتتەدى, – دەدى وسك مۇشەسى تاتيانا وحلوپكوۆا. – ولاردىڭ ىشىندە ەقىۇ/دياقب-نىڭ 286 بايقاۋشىسى, تمد ميسسياسىنىڭ 301 بايقاۋشىسى, شانحاي ىنتىماقتاستىق ۇيىمىنىڭ ميسسياسىنان 9, ەقىۇ پارلامەنتتىك اسسامبلەياسىنان 75, ەۋروپا كەڭەسىنىڭ پارلامەنتتىك اسسامبلەياسىنان 14, تۇركىتىلدەس ەلدەر ىنتىماقتاستىعىنىڭ كەڭەسىنەن 17, يسلام ىنتىماقتاستىعى ۇيىمىنان 3, تۇركىتىلدەس ەلدەردىڭ پارلامەنتتىك اسسامبلەياسىنان 8, شەت مەملەكەتتەردەن 102 بايقاۋشى بار».
بۇدان باسقا قازاقستان رەسپۋبليكاسى سىرتقى ىستەر مينيسترلىگى 29 مەملەكەتتەن شەتەلدىك باق-تىڭ 140 وكىلىن اككرەديتتەگەن. وسىلايشا, قازىرگى ۋاقىتتا 955 حالىقارالىق بايقاۋشى مەن شەتەلدىك بۇقارالىق اقپارات قۇرالدارىنىڭ وكىلى اككرەديتتەلىپ وتىر.
***
كەشە ورتالىق سايلاۋ كوميسسياسىنىڭ ءباسپاسوز ورتالىعىندا تمد بايقاۋشىلارى ميسسياسى شتابىنىڭ جەتەكشىسى ەۆگەني سلوبودا جۋرناليستەرگە بريفينگ وتكىزىپ, ەلىمىزدە سايلاۋ ۇدەرىسى قالاي ءوتىپ جاتقانىن ايتىپ بەردى.
«ءبىز وبلىستاردا بولىپ, اۋماقتىق, ۋچاسكەلىك سايلاۋ ۋچاسكەلەرىنىڭ جۇمىستارىمەن تانىستىق. ولاردا ايتارلىقتاي بۇزۋشىلىقتار بايقالا قويعان جوق, – دەدى ول. – ادىستەمەلىك قامتاماسىز ەتۋ تۇرعىسىنان الىپ قاراعاندا, ءبارى دۇرىس, قۇجاتتاردى راسىمدەۋدە دە كەمشىلىكتەر بايقالمايدى. سوندىقتان, ازىرشە ءبىزدىڭ تاراپىمىزدان ەش ساۋال جوق. بىرقاتار ازىن-اۋلاق كەمشىلىك بايقالدى, ول بارلىق ەلدەردە دە كەزدەسەدى. ماسەلەن, سايلاۋ ۋچاسكەلەرىنە بارعان كەزدە داۋىس بەرۋ ۇدەرىسىن بايقاۋعا مۇمكىنشىلىكتەر بولۋى ءتيىس. سول سەبەپتى ءبىز بىرقاتار سايلاۋ ۋچاسكەسىنە داۋىس بەرۋگە ارنالعان كابينالاردى جىلجىتۋدى ۇسىندىق».
ءاليسۇلتان قۇلانباي,
«ەگەمەن قازاقستان».
سۋرەتتى تۇسىرگەن
ەرلان وماروۆ.