ورتالىق سايلاۋ كوميسسياسىنىڭ سەنبى كۇنگى وتىرىسىندا «2016 جىلعى 20 ناۋرىزعا تاعايىندالعان قازاقستان رەسپۋبليكاسى پارلامەنتى ءماجىلىسى دەپۋتاتتارىنىڭ كەزەكتەن تىس سايلاۋىنا جانە ءماسليحاتتارى دەپۋتاتتارىنىڭ كەزەكتى سايلاۋىنا حالىقارالىق ۇيىمدار مەن شەت مەملەكەتتەردىڭ بايقاۋشىلارىن اككرەديتتەۋ تۋرالى» قاۋلى قابىلداندى.
اتالعان قاۋلىعا سايكەس ورتسايلاۋكوم قازاقستان رەسپۋبليكاسى سىرتقى ىستەر مينيسترلىگىنىڭ ۇسىنۋى بويىنشا سايلاۋدى بايقاۋ جونىندەگى ءبىر ميسسيانىڭ, ءبىر حالىقارالىق ۇيىمنىڭ جانە ءبىر شەت مەملەكەتتىڭ تاعى 155 بايقاۋشىسىن اككرەديتتەدى. «ولاردىڭ ىشىندە ەقىۇ/دياقب-نىڭ 153 بايقاۋشىسى, تۇركىتىلدەس ەلدەردىڭ پارلامەنتتىك اسسامبلەياسىنان ءبىر بايقاۋشى جانە شەت مەملەكەتتەن ءبىر بايقاۋشى بار, – دەدى وسك مۇشەسى تاتيانا وحلوپكوۆا. – 2016 جىلعى 12 ناۋرىزداعى جاعداي بويىنشا ورتسايلاۋكوم سىرتقى ىستەر مينيسترلىگىنىڭ ۇسىنۋى بويىنشا حالىقارالىق ۇيىمدار مەن شەت مەملەكەتتەردىڭ 608 بايقاۋشىسىن اككرەديتتەدى».
كوميسسيا مۇشەسىنىڭ اتاپ وتكەنىندەي, 12 ناۋرىزعا دەيىن ەقىۇ/دياقب-نىڭ 197 بايقاۋشىسى, تمد ميسسياسىنىڭ 293 بايقاۋشىسى, شانحاي ىنتىماقتاستىق ۇيىمى ميسسياسىنىڭ 9, ەقىۇ پارلامەنتتىك اسسامبلەياسىنان 75, يسلام ىنتىماقتاستىعى ۇيىمىنان 3, تۇركىتىلدەس ەلدەردىڭ پارلامەنتارالىق اسسامبلەياسىنان, 8, 10 شەت مەملەكەتتەن 23 بايقاۋشى اككرەديتتەلىپ وتىر. سونىمەن قاتار, قازاقستان رەسپۋبليكاسىنىڭ سىرتقى ىستەر مينيسترلىگى 27 مەملەكەتتەن شەتەلدىك باق-تىڭ 117 وكىلىن اككرەديتتەدى. قازىرگى ۋاقىتتا 725 حالىقارالىق بايقاۋشى مەن شەتەلدىك بۇقارالىق اقپارات وكىلى اككرەديتتەلگەن.
«وتىرىستا قازاقستان رەسپۋبليكاسى سىرتقى ىستەر مينيسترلىگىنىڭ 2016 جىلعى 11 ناۋرىزداعى №11/766 ۇسىنىمىنىڭ نەگىزىندە قازاقستان رەسپۋبليكاسى ورتالىق سايلاۋ كوميسسياسى سەداننا مارگارياندى ارمەنيا رەسپۋبليكاسىنان بايقاۋشى رەتىندە اككرەديتتەۋدىڭ كۇشىن جويدى جانە ارمەنيا رەسپۋبليكاسىنان بايقاۋشى رەتىندە گوارا بالاياندى اككرەديتتەدى», – دەدى ت.وحلوپكوۆا وسى ماسەلە جونىندە.
ءاليسۇلتان قۇلانباي,
«ەگەمەن قازاقستان».