كەشە قاراعاندى قالاسىنداعى «سارىارقا» ارنايى ەكونوميكالىق ايماقتىڭ اۋماعىندا قورعانىس ءمينيسترى يمانعالي تاسماعامبەتوۆ العاشقى قازاقستاندىق پاترون زاۋىتى قۇرىلىسىنىڭ باستالۋىنا ارنالعان راسىمگە قاتىستى. بۇل جوبا قازاقستان رەسپۋبليكاسى قارۋلى كۇشتەرى جوعارعى باس قولباسشىسىنىڭ تاپسىرماسى بويىنشا ازىرلەندى.
ۇلتتىق قاۋىپسىزدىكتىڭ قاجەتتى دەڭگەيىن قامتاماسىز ەتۋ, قازاقستاندىق ءونىمدى ارتتىرۋ, سونداي-اق, اتىس قارۋىنا ارنالعان قولدا بار پاتروندار قورىنىڭ ازايتىلۋىن نازارعا الا وتىرىپ, قازاقستاننىڭ قارۋلى كۇشتەرىندە اناعۇرلىم سۇرانىسقا يە 5,45*39 مم, 7,62*54 مم, 9*18 مم, 9*19 مم كاليبرلى پاترونداردى ءوندىرۋ بويىنشا زاۋىت قۇرۋ جوسپارلانۋدا.
وسى جوبا شەڭبەرىندە «سارىارقا» ارنايى ەكونوميكالىق ايماعىنىڭ اۋماعىندا عيمارات كەشەنى مەن پاترون زاۋىتىنىڭ قۇرىلىسىن جۇرگىزۋ جوسپارلانۋدا. ارنايى ەكونوميكالىق ايماقتىڭ اۋماعىندا بارلىق ينجەنەرلىك كوممۋنيكاتسيالار, اۆتو جانە تەمىرجول كولىگى بار. بۇل ورتالىقتاندىرىلعان تۇردە الاڭنان تىس ينجەنەرلىك ماگيسترالدارعا ىشكى الاڭدىق جەلىلەردى قوسۋ, سونداي-اق, قازاقستاننىڭ كەز كەلگەن وڭىرىنە قارۋ-جاراق قويمالارىنا ءاۆتوموبيلدى جانە تەمىرجول كولىگىمەن ءونىمدى شىعارۋدى جۇزەگە اسىرۋ مۇمكىندىگىن بەرەدى. قۇرىلىستىڭ جالپى اۋدانى 26 400 شارشى مەتردى قۇرايدى. قۇرىلىس جۇمىستارىن اياقتاۋ 2017 جىلدىڭ جەلتوقسان ايىنا جوسپارلانعان.
«پاترون زاۋىتى ۇزاق جىلدار بويى ەل ىشىندە شيكىزات پەن ماتەريالدار تاسىمالداۋعا سۇرانىستى تۇراقتى قامتاماسىز ەتەدى. جەز سياقتى قورىتپانىڭ 300 تونناسىن قولدانۋ ايماقتاعى مامانداندىرىلعان كاسىپورىننىڭ جۇمىسىن جانداندىرادى. ارنايى ەكونوميكالىق ايماق ءتارتىبى جاعدايىندا دا قازاقستاندىق پاترون زاۋىتى سالىق تۇرىندە ءوڭىردىڭ بيۋدجەتىنە جىلىنا 680 ملن. تەڭگە قارجى تۇستسىرەدى. بۇل ءبىزدىڭ ەڭ قاراپايىم بولجام», – دەپ اتاپ ءوتتى «كازتەحنولوگي» اق باسقارما توراعاسى مەدەر ماسەلوۆ.
قازىرگى ۋاقىتتا قازاقستان رەسپۋبليكاسىندا اتىس وق-دارىلەرى شىعارىلمايتىنىن ايتا كەتەيىك. بۇل رەتتە قورعانىس مينيسترلىگىنىڭ مۇقتاجدىعى ءۇشىن اعىمداعى پاتروندارداعى قاجەتتىلىك كسرو-نىڭ قۇلدىراۋىنا دەيىن قۇرىلعان قورلار ەسەبىنەن جابىلادى. قازاقستان رەسپۋبليكاسىنىڭ قارۋلى كۇشتەرىن وق-دارىلەرمەن قامتاماسىز ەتۋ ءۇشىن قازاقستاندىق شيكىزات پەن ماتەريالدار پايدالانىلادى. بۇل جەتكىزۋشى ەلدەردەن تاۋەلسىز بولۋعا مۇمكىندىك بەرەدى. قازاقستان رەسپۋبليكاسى قارۋلى كۇشتەرىنىڭ وق-دارىلەرمەن قامتاماسىز ەتىلۋى, جالپى العاندا, ەلدىڭ جانە ءوڭىردىڭ اسكەري-ساياسي قاۋىپسىزدىگىن ارتتىرادى.
پاترونداردى ءوندىرۋ بويىنشا جابدىقتى كانادالىق Waterbury Farrel كومپانياسى جەتكىزەتىن بولادى. قازاقستاندىق پاترون زاۋىتى ءوندىرۋ قۋاتتىلىعى جىلىنا 30 ملن. دانانى قۇرايتىن پاترونداردى شىعارۋعا ارنالعان وزىق قۇرال-جابدىقپەن جابدىقتالادى.
«ەگەمەن-اقپارات».