قاراعاندى. 14 ناۋرىز. تەمىرتاۋ قالاسىندا سپورتتىق گيمناستيكامەن اينالىسۋعا ارنالعان مامانداندىرىلعان زال سالتاناتتى تۇردە اشىلدى. بۇل تۋرالى وبلىستىق دەنە شىنىقتىرۋ جانە سپورت باسقارماسىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
تەمىرتاۋ قالاسىندا 15 جىلدان بەرى ارنايى زال بولماعاندىقتان, گيمناستيكا ۇيىرمەسى جۇمىس ىستەمەي كەلگەن. ەندى جاڭادان اشىلعان بۇل زالدا تەمىرتاۋ مەن قاراعاندىنىڭ جاتتىقتىرۋشىلارى جاس گيمناستاردى جاتتىقتىراتىن بولادى.
گيمناستيكا زالىنىڭ اشىلۋ سالتاناتىنا تەمىرتاۋ قالالىق سپورت ءبولىمىنىڭ باسشىلارى, وبلىستىق سپورتتىق گيمناستيكا فەدەراتسياسىنىڭ وكىلدەرى جانە دە كونكيمەن جۇگىرۋدەن جاسوسپىرىمدەر اراسىنداعى الەم چەمپيونى ەكاتەرينا ايدوۆا قاتىستى. شارا بارىسىندا سپورتتىق گيمناستيكامەن اينالىسىپ جۇرگەن جاس جەتكىنشەكتەر ەركىن جاتتىعۋ مەن گيمناسيتكالىق سناريادتاردا ءوز ونەرلەرىن كورسەتتى.
قايرات ءابىلدينوۆ.
دەرەك, سۋرەت: وبلىستىق دەنە شىنىقتىرۋ جانە سپورت باسقارماسىنىڭ ءباسپاسوز قىزمەتى.