اتىراۋ. 9 ناۋرىز. بۇكىل الەم حالىقارالىق ايەلدەر كۇنى مەرەكەسىن اتاپ وتكەن كۇنى تاڭ اتا اتىراۋعا «ماڭگىلىك ەل» الەۋمەتتىك پويىزى كەلدى. پويىز قۇرامىنداعى ءار سالا وكىلدەرىن وبلىس اكىمىنىڭ ورىنباسارى شىڭعىس مۇقان باستاعان جەرگىلىكتى بيلىك وكىلدەرى قارسىلاپ الدى. بۇل تۋرالى egemen.kz ءتىلشىسى حابارلادى.
تەمىرجول ۆوكزالى الدىندا «ءان شەرۋ» اتتى پاتريوتتىق اندەر شىرقالىپ, شاعىن ميتينگ تە وتكىزىلدى. وندا «ماڭگىلىك ەل» پويىزىنىڭ شتاب جەتەكشىسى ءامىرجان الپەيىسوۆ ەل وڭىرلەرىن ارالاۋداعى ماقساتتىڭ نەگىزگى باسىمدىقتارىنا توقتالا كەلىپ: «ءبىزدىڭ پويىزدىڭ قۇرامىندا 30-عا تارتا مەديتسينا قىزمەتكەرى بار. ولار تەك قابىلداۋ جۇرگىزىپ قويمايدى, سونىمەن بىرگە, جولداما بەرەدى. كۆوتا الۋ ماسەلەسىنە دە كومەكتەسەدى. ولاردىڭ اراسىندا جەرگىلىكتى جەردە كەزدەسپەيتىن كارديولوگتار, ونكولوگتار, بالالار دارىگەرلەرى بار. بۇلاردىڭ ءبارى دە شەتەلدەردە تاعىلىمدامادان وتكەن, جاڭا تەحنولوگيالارمەن جۇمىس ىستەۋدى مەڭگەرگەن, قازىر استانا مەن الماتىداعى كلينيكالار مەن عىلىمي ورتالىقتاردا جۇمىس ىستەيتىن بىلىكتى ماماندار. پويىز قۇرامىندا وسىلار سەكىلدى ءار سالالىق مينيسترلىكتەردىڭ بىلىكتى ماماندارى دا كەڭەس بەرەدى», – دەپ ءمالىم ەتتى.
«ماڭگىلىك ەل» پويىزى قۇرامىنداعى سالالىق مينيسترلىكتەر وكىلدەرى توپ-توپقا ءبولىنىپ, وزدەرىنە جۇكتەلگەن مىندەتتەرىن اتقارۋعا كىرىستى. ماسەلەن, 30-عا جۋىق بىلىكتى مامانداردان قۇرالعان دارىگەرلەر توبى «تەمىرجول گوسپيتالى» اق اۋرۋحاناسىندا ءارتۇرلى سىرقاتى بار جەرگىلىكتى تۇرعىنداردى قابىلداپ, كەيبىرىنە دارىگەرلىك كەڭەستەر بەردى. ال پويىز جەتەكشىسى ءامىرجان الپەيىسوۆ باستاعان توپ اتىراۋ مۇناي جانە گاز ينستيتۋتىنىڭ ستۋدەنتتەر سارايىنا جينالعان ءوڭىر جاستارىمەن جۇزدەستى. مۇندا جوعارى وقۋ ورىندارىندا وقيتىن ستۋدەنت-جاستاردىڭ قاتىسۋىمەن «مەنىڭ جەتىستىكتەرىم –تاۋەلسىزدىك جەتىستىكتەرى» اتتى اكتسيا ءوتتى.
«اتا-بابادان قالعان ۇلان-عايىر ۇلى دالا ەلىنىڭ كەلەشەگى ۇلتتىق قۇندىلىقتارىنان ءتالىمدى تاربيە العان ءبىلىمدى, بىلىكتى جاستارىمىزدىڭ بەلسەندىلىگىمەن كەمەلدەنە تۇسەدى. شۇكىر, ەلىمىز تاۋەلسىزدىك العالى بەرى جان-جاقتى وركەندەپ, الەمگە تانىلدى. سونىڭ ىشىندە, جاستارىمىزدىڭ شەتەلدەردەگى تاڭداۋلى ۋنيۆەرسيتەتتەردە ءبىلىم الۋىنا دا كەڭ جول اشىلدى», – دەدى «ماڭگىلىك ەل» پويىزىنىڭ جەتەكشىسى ءامىرجان الپەيىسوۆ. – ەلباسى نۇرسۇلتان نازارباەۆتىڭ ۇستانار باستى ساياساتى – ەلىمىزدى الەمدەگى دامىعان 30 ەلدىڭ قۇرامىنا ەنگىزۋ. بۇل ءۇشىن ارينە, ەڭ ماڭىزدىسى وتاندىق ەكونوميكانى ءارتاراپتاندىرا وركەندەتە بەرۋ بولسا, وعان جاستاردىڭ دا قوساتىن ۇلەسى مول بولۋى ءتيىس».
مۇنايلى وڭىردەگى 17 ەتنومادەني بىرلەستىكتەردىڭ باس قوساتىن ورتاق شاڭىراعىنا اينالعان «دوستىق» ۇيىندە مەملەكەتتىك ەتنوساياسات ماسەلەلەرى مەن قوعامدىق كەلىسىمدى, توزىمدىلىك مادەنيەتىن جانە ۇلتارالىق قاتىناستاردى قالىپتاستىرۋ ماسەلەلەرى بويىنشا سەمينار-ترەنينگ ءوتتى. ەتنومادەني بىرلەستىكتەردىڭ قاتىسۋىمەن «ماڭگىلىك ەل – بولاشاعى ءبىرتۇتاس ۇلت» اتتى لەكتسيا-تانىستىرىلىمىنىڭ ماڭىزى تىپتەن ايرىقشا دەۋگە بولادى. «قازاقستان – كوپ ەتنوستى ءبىر شاڭىراق استىندا توعىستىرعان, سونىمەن بىرگە, بىرلىگى مەن دوستىعى نىعايعان مەملەكەت» دەپ وڭىردەگى ەتنومادەني بىرلەستىكتەر وكىلدەرىمەن كەزدەسۋدە وي تۇيىندەگەن الەۋمەتتىك پويىز جەتەكشىسى ءامىرجان الپەيىسوۆ اتىراۋ وبلىسىنىڭ كىتاپحانا جۇيەسىنە ونداعان كىتاپتى تارتۋ ەتتى. ونىڭ ىشىندە قازاقستان حالقى اسسامبلەياسىنىڭ قۇرىلۋ تاريحى تۋرالى «ودنا يستوريا, ودنا سۋدبا», كىندىك كەسكەن اتامەكەنىنەن ەلىمىزگە جەر اۋدارىلعاندار دەرەكتەرى توپتاستىرىلعان «يز يستوري دەپورتاتسي. كازاحستان. 1935-1939 گ.گ.» سەكىلدى سيرەك كىتاپتار بار.
«مۇنداي كىتاپتار ەلىمىزدىڭ تاريحىن, قازاقستاندى مەكەن ەتكەن وزگە دە ەتنوستار تاريحىن تەرەڭىرەك بىلۋگە مۇمكىندىك بەرەدى», – دەپ ءمالىم ەتتى ول.
سونىمەن بىرگە, الەۋمەتتىك پويىز قۇرامىنداعى سالالىق مينيسترلىكتەر وكىلدەرى زيالى قاۋىممەن دە, ىسكەر توپ وكىلدەرىمەن دە اقجارما كەزدەسۋلەر وتكىزدى. ماسەلەن, جۇمىسقا ورنالاسۋ مەن الەۋمەتتىك ارىپتەستىك, مەملەكەتتىك قىزمەت ۇسىنۋ ماسەلەلەرى بويىنشا كەڭەس, مەملەكەتتىك ساتىپ الۋدى ۇيىمداستىرۋ بويىنشا تاپسىرىس بەرۋشىلەرمەن سەمينار ۇيىمداستىرىلدى. «ماڭگىلىك ەل» پويىزىنىڭ جەتەكشىسى ءامىرجان الپەيىسوۆ ءمالىم ەتكەندەي, پويىزدىڭ وڭىرلەردى ارالاۋداعى ماقساتى – حالىقتىڭ الەۋمەتتىك ماسەلەلەرىن شەشۋگە اتسالىسۋ.
«الەۋمەتتىك ماسەلەلەردىڭ ءتۇيىندى تۇستارى كوبىنەسە اۋىلداردا كەزدەسىپ جاتادى. ماسەلەن, مەديتسينا سالاسى قىزمەتكەرلەرىنىڭ جالاقىسى 30 پايىزعا كوتەرىلۋى ءتيىس ەدى. بىراق, كەرىسىنشە, ولاردىڭ جالاقىسىنىڭ ازايىپ كەتكەن تۇستارى بار. ءبىز وسىنداي ماسەلەلەردىڭ شەشىلۋىنە ىقپال ەتۋدى كوزدەدىك», – دەيدى ءامىرجان الپەيىسوۆ. – ەڭ نەگىزگى ماقسات – ەل تاۋەلسىزدىگىنىڭ 25 جىلدىق مەرەيتويىن شاعىن ەلدى مەكەندەردە, شاعىن قالالاردا اتاپ ءوتۋدى باستاۋ».
«ماڭگىلىك ەل» الەۋمەتتىك پويىزىنىڭ مۇشەلەرى بۇدان كەيىن ماقات اۋدانىندا كەزدەسۋلەر وتكىزىپ, اقتوبە وبلىسىنداعى شالقار اۋدانىنا اتتانىپ كەتتى.
جولداسبەك شوپەعۇل.
دەرەك: egemen.kz.
سۋرەت: راحىم قويلىباەۆ.