استانا. 9 ناۋرىز. PENAL REFORM INTERNATIONAL (PRI) حالىقارالىق تۇرمە رەفورماسىنىڭ ورتالىق ازياداعى وكىلدىگىنىڭ قىزمەتكەرلەرى «قازاقستانداعى بالالار مەن ايەلدەرگە ارنالعان تۇزەۋ مەكەمەلەرىندەگى مەديتسينالىق جانە الەۋمەتتىك قىزمەتتى كۇشەيتۋ» جوباسىنىڭ اياسىندا اتىراۋ قالاسىنداعى ايەلدەر كولونياسىندا جازاسىن وتەپ جاتقان قىز-كەلىنشەكتەردى 8 ناۋرىز حالىقارالىق ايەلدەر كۇنىمەن قۇتتىقتاپ, بىرقاتار سىيلىقتار سىيلادى. بۇل تۋرالى egemen.kz ءتىلشىسى حابارلادى.
قازىرگى كەزدە ەلىمىزدەگى 6 ايەلدەر كولونياسىندا 3014 ايەل جازالارىن وتەپ جاتىر. اتىراۋداعى كولونيادا 252 ايەل بار. مەيرام قارساڭىندا ەلىمىزدىڭ باتىس وڭىرىندەگى جالعىز كولونيادا رەلاكساتسيا بولمەسى, ءسان بولمەسى سونداي-اق, سپورتپەن جانە يوگامەن اينالىسۋ زالى اشىلدى. اتالعان بولمەلەردىڭ قىز-كەلىنشەكتەر ءۇشىن ماڭىزى زور ەكەنى انىق. PRI ۇيىمى سوتتالعان ايەلدەردىڭ جارتىسىنان كوبى وسىنداي پسيحولوگيالىق كومەككە ءزارۋ ەكەندىگىن انىقتادى.
ءسان بولمەسى ەستەتيكالىق سۇلۋلىقتى ساقتاپ قانا قويماي, مۇنداعى ايەلدەر قاۋىمىنا شاشتاراز ماماندىعىن يگەرىپ, جازاسىن وتەپ شىققان سوڭ, جۇمىسقا تۇرۋلارىنا مۇمكىندىك بەرەدى. سونداي-اق, بۇل كۇنى ايەلدەر وتريادىنىڭ اراسىندا سۋرەت سايىسى ۇيىمداستىرىلىپ, جەڭىمپازدارعا سىيلىقتاردى تابىس ەتەدى. تۋعان-تۋىستارىمەن كەزدەسۋ ۇيىمداستىرىلدى.
مەيرام كۇنى كولونياداعى قىز-كەلىنشەكتەرگە فوتوسەسسيا جاسالدى. وسىعان بايلانىستى سوتتالعان ايەلدەردىڭ تۋىستارىمەن بايلانىسى حات ارقىلى جۇزەگە اسىپ, سۋرەتتەرى ۇيلەرىنە جىبەرىلەتىن بولادى.
حالىقارالىق تۇرمە رەفورماسىنىڭ ورتالىق ازياداعى وكىلدىگى 2013-2014 جىلدارى الەم بويىنشا سوتتالعانداردىڭ 2-9 پايىزىن ايەلدەر قۇرايتىنىن مالىمدەدى. ەر ادامدارعا قاراستىرىلعان كولونيالاردا قىز-كەلىنشەكتەرگە قاجەتتى جاعدايلار قاراستىرىلماعان. ىشكى ىستەر مينيسترلىگىنىڭ قىلمىستىق-اتقارۋ جۇيەسى كوميتەتى جىل باسىندا 2975 ايەل جازاسىن وتەگەنىن جانە بۇل كورسەتكىش وتكەن جىلعا قاراعاندا 400 ادامعا ازايعانىن حابارلادى.
«زەرتتەۋ بارىسىندا بەلگىلى بولعانداي سوتتالعان ايەلدەردىڭ كوبىسى ءبىرىنشى رەت قىلمىس جاساعان. 30 جاسقا دەيىنگىلەر 20 پايىز, 30-50 جاس اراسىنداعىلاردىڭ ۇلەس سالماعى 59 پايىز قۇراسا, سوتتالعان بەس ايەلدىڭ بىرەۋىنىڭ جاسى 50-دەن اسقان. PRI جوباسى بالالارى كامەلەتكە جاسقا تولماي تۇرىپ, سوتتالعان ايەلدەرگە قولداۋ كورسەتەدى. ولارعا ارناپ مۇندا ويىن الاڭدارى مەن بالالارىمەن كەزدەسۋ بولمەسى قاراستىرىلعان. ەڭ باستى ايتا كەتەتىن جايت – ايەلدەر كولونياسىندا بانگكوك ەرەجەسىنە بايلانىستى بىرىككەن ۇلتتار ۇيىمىنىڭ حالىقارالىق تالاپتارىنا ساي ارنايى وقۋدان وتكەن ايەلدەر قىزمەت ەتەدى. اتالعان ءىس-شارالار جازاسىن وتەپ جاتقان نازىك جاندىلار قوعامعا قاجەت ەكەندىكتەرىن ءبىر ساتتە ەستەرىنەن شىعارماي, الەۋمەتتىك تۇرعىدان قولداۋ تاۋىپ, قوعامىمىزعا قايتا ورالۋلارىنا سەپ بولارى ءسوزسىز», – دەدى Penal Reform International ۇيىمىنىڭ ورتالىق ازياداعى وكىلدىگىنىڭ ايماقتىق ديرەكتورى ازامات شامبيلوۆ.
ايان ءابدۋالي.
دەرەك, سۋرەت: egemen.kz.