استانا. 9 ناۋرىز. ەلىمىزدىڭ 2000 جىلى تۋعان جاس فۋتبولشىلارى برازيليا فەدەراتيۆتى رەسپۋبليكاسىنىڭ «كرۋزەيرو» فۋتبول كلۋبىنىڭ اكادەمياسىنا وقۋعا كەتتى. بۇل تۋرالى egemen.kz ءتىلشىسى حابارلادى.
فۋتبولشىلاردىڭ قاسىندا ەكى جاتتىقتىرۋشى بار. ولار جاستاردىڭ وقۋىن قاداعالاپ, جاتتىعۋلارىنا قاتىسىپ وتىرادى. جاستار ەكىنشى سەمەستردى وقىپ, ەكى جىلدان كەيىن ەلگە قايتىپ كەلەدى. اكادەمياداعى وقۋ بەلۋ-وريزونتي قالاسىندا بولادى. بۇل – ەلىمىزدەن وڭتۇستىك امەريكا ەلىنە وقۋعا كەتكەن جاس فۋتبولشىلاردىڭ ءۇشىنشى تولقىنى. العاش رەت جاستارىمىز 2009 جىلى برازيلياعا بارىپ, «ولە برازيل» جوباسى بويىنشا ەكى جىل تەڭبىل دوپ ونەرىمەن سۋسىنداپ قايتقان بولاتىن.
جاس فۋتبولشىلاردى برازيلياعا شىعارىپ سالۋ ءراسىمى الماتىدا ءوتتى. وندا قازاقستان فۋتبول فەدەراتسياسىنىڭ ۆيتسە-پرەزيدەنتى سەيدىلدا بايشاقوۆ, جاستاردى جاتتىقتىرعان مامان قايرات بيەكەنوۆ پەن جوبانىڭ كۋراتورى بولات جۋاسباەۆ ءسوز سويلەپ, برازيلياعا اتتانعان فۋتبولشىلارعا ءسات ساپار تىلەدى.
داستان كەنجالين.
دەرەك, سۋرەت: شتاتتاعى ۇلتتىق كوماندالار جانە سپورت رەزەرۆى ديرەكتسياسى.