«تىڭدا, دالا, جامبىلدى!»
«جامبىل – مەنىڭ جاي اتىم, حالىق – مەنىڭ شىن اتىم» دەپ جىرلاپ, ەلدىڭ رۋحىن اسپانداتقان جامبىل جاباەۆتىڭ ءاربىر جىر شۋماعى ۇرانعا اينالىپ كەتكەلى قاشان. حالىق اقىندارىنىڭ جاسامپازدىق رۋحتاعى جاڭا ۇلى كوشىن باستاعان دارالىعىمەن ەرەكشەلەنگەن جامبىل جاكەم, سودان دا بولار, حالىق پوەزياسىنىڭ اتاسى اتاندى. ءجۇز جاساعان جىراۋ ەل ومىرىندەگى تابىس پەن شاتتىقتى, جەڭىس پەن ەرلىك ىستەردى ەرەكشە شابىتپەن جىرلاعان. جىر الىبىنىڭ 170 جىلدىق مەرەيتويىنا ورايلاس جامبىل جەرىندە دە كوپتەگەن ءىس-شارالار قولعا الىندى.
جامبىل وبلىستىق مادەنيەت, مۇراعاتتار جانە قۇجاتتاما باسقارماسىنىڭ ۇيىمداستىرۋىمەن تاراز قالاسىندا رەسپۋبليكالىق «تىڭدا, دالا, جامبىلدى!» اتتى جىرشى-تەرمەشىلەر بايقاۋى ءوتتى. بايقاۋعا رەسپۋبليكامىزدىڭ ءار ايماعىنان باس-اياعى 33 تالاپكەر قاتىسىپ, قاپاش ق ۇلىش, دۇيسەنبەك ءومىراليەۆ, ءابدىمومىن جەلدىباەۆ, اياز بەتباەۆ, ەلىكباي يسا سىندى ەلىمىزگە تانىمال ونەر قايراتكەرلەرى قازىلىق ەتتى.
– ارينە, جامبىل بابامىزدىڭ بۇعان دەيىنگى مەرەيتويلارىندا تالاي ونەر بايقاۋلارى ۇيىمداستىرىلعان. بىراق بۇرىن-سوڭدى ەلىمىزدەگى ۇزدىك جىرشى-تەرمەشىلەردىڭ باسىن قوسىپ, جامبىل جاباەۆتىڭ جىر-داستاندارىن ناسيحاتتاعان بايقاۋ بولماپتى. سوندىقتان, بۇل جامبىل جىرلارىن جۇرتشىلىقتىڭ جۇرەگىنە جەتكىزىپ قانا قويماي, تەرمەشىلەردىڭ دە رۋحىن كوتەرىپ, ابىرويىن اسپانداتقان ءىس-شارا بولدى, – دەيدى وبلىستىق باسقارما باسشىسى دۇيسەن بىقىباەۆ.
ءسويتىپ, قازىلار القاسىنىڭ ۇيعارىمىمەن جامبىل جاباەۆتىڭ جانە جەتىسۋدا ءومىر سۇرگەن اقىن-جىرشىلاردىڭ شىعارمالارىن ناقىشىنا كەلتىرە ورىنداپ, كورەرمەن جۇرەگىنە جول تاپقان دانيار راحىمباي (الماتى وبلىسى) باس ءجۇلدەنى يەلەندى. ءبىرىنشى ورىندى ماقپال توقتاعانوۆا (الماتى وبلىسى) جانە سۇلۋجان ابەنوۆا (جامبىل وبلىسى) يەلەنسە, ەكىنشى ورىن جاراسحان تولەباي (قىزىلوردا وبلىسى), ەربولات شالدىبەكوۆ (الماتى وبلىسى), مۇراتحان دونباەۆ (شىعىس قازاقستان وبلىسى), ءۇشىنشى ورىن مارات سۇگىرباي (قىزىلوردا وبلىسى), قۇرمان بايتاسوۆ (استانا قالاسى), تولەگەن شاكارىموۆكە (شىعىس قازاقستان وبلىسى) بۇيىردى.
سونداي-اق, ءسۇيىنباي اتىنداعى ارنايى جۇلدەنى اقتوبەلىك عازيزا ابديروۆا, قابان جىراۋ جۇلدەسىن جامبىلدىق قارلىعا جامباەۆا, ساۋىتبەك اقىن اتىنداعى جۇلدەنى تاعى ءبىر جامبىلدىق جۇلدىز ىسقاقوۆ, بارماق اقىن اتىنداعى ءجۇلدەنى اتىراۋلىق بايباق ىدىرباي, كەنەن ازىرباەۆ اتىنداعى جۇلدەنى شىعىسقازاقستاندىق گۇلميرا تەمىربەكوۆا, اياز بەتباەۆ اتىنداعى جۇلدەنى قوستانايلىق ابزال الپىسوۆ قانجىعاسىنا بايلادى.
ال وبلىستىق تىلدەردى دامىتۋ باسقارماسى مەملەكەتتىك ءتىلدىڭ قولدانىلۋ اياسىن كەڭەيتۋ, ءتىل مادەنيەتىن كوتەرۋ, جامبىل جاباەۆتىڭ شىعارمالارىن ناسيحاتتاۋدى جانداندىرۋ ماقساتىندا «جامبىل وقۋلارى» اتتى جاس اقىندار بايقاۋىن وتكىزدى. اقىننىڭ شىعارماشىلىق-ادامي كەلبەتىن, تۋعان جەرىنىڭ سۇلۋ تابيعاتىن, شەجىرەلى تاريحىن تانىتاتىن جانە قازاق ءتىلىنىڭ باعا جەتپەس بايلىعىن, ءسوز قۇدىرەتىن, بابالاردان قالعان اسىل مۇرالاردىڭ سارقىلماس قازىناسىن تىلگە تيەك ەتكەن 15-كە جۋىق ۇمىتكەردىڭ ىشىنەن باس جۇلدەنى تارازدىق نۇربولات ساتىمقۇل جەڭىپ الدى.
ش.ءۋاليحانوۆ اتىنداعى جامبىل وبلىستىق امبەباپ عىلىمي كىتاپحاناسى وبلىستىق فيلارمونيا جانە حالىقتىق شىعارماشىلىق ورتالىعىمەن بىرلەسە وتىرىپ, اقىن ەسكەرتكىشىنىڭ الدىندا ادەبي-سازدى كەش ۇيىمداستىردى. مويىنقۇمنىڭ ماڭ دالاسىنداعى جامبىل تاۋىنىڭ بوكتەرىندە, بوراندى اقپان ايىندا دۇنيەگە كەلىپ, كەيىن الگى تاۋدى دا, بۇكىل قازاق حالقىن دا الەمگە تانىتقان جامبىل جاباەۆتىڭ شىعارماشىلىعىن كەڭىنەن ناسيحاتتاي وتىرىپ, اقىن رۋحىنا باس ءيىپ, شىعارمالارىن بولاشاق ۇرپاققا ۇلگى ەتۋ ماقساتىندا ۇيىمداستىرىلعان بۇل ءىس-شاراعا جينالعان جۇرتشىلىقتىڭ قاراسى مول بولدى.
قازاق حالقىنىڭ ار-نامىسى, ءۇنى مەن جۇرەگى بولعان جامبىل جاباەۆتىڭ 170 جىلدىعى اياسىنداعى ءىس-شارالار ءالى دە جالعاسىن تابۋدا.
ورالحان ءداۋىت,
«ەگەمەن قازاقستان».
جامبىل وبلىسى.
سۋرەتتى تۇسىرگەن
اقادىل رىسماحان.