الماتىداعى قازاق ۇلتتىق اگرارلىق ۋنيۆەرسيتەتىندە جامبىل جاباەۆتىڭ تۋعانىنا 170 جىل تولۋىنا ارنالعان «جىر الىبى – جامبىل» اتتى ادەبي-سازدى رۋحاني تاعىلىمدى كەش ءوتتى. مادەني شارانىڭ ماقساتى – ءسوز مايەگىن كيە تۇتقان ابىز جىراۋدىڭ شىعارماشىلىعىن, رۋحاني باي مۇراسىن بۇگىنگى جاس ۇرپاققا جەتكىزىپ, ناسيحاتتاۋ. كەشكە جامبىلتانۋشى عالىمدار, كورنەكتى قالامگەرلەر, اقىننىڭ شوبەرەسى بەكمۇرات جامبىل, جىرشى-تەرمەشى اقان ءابدۋالي, سونداي-اق جامبىل كوشەسى مەن جامبىل اتىنداعى قازاق مەملەكەتتىك فيلارمونياسى مەن ەڭسەلى ەسكەرتكىشى بوي تۇزەگەن مەدەۋ اۋدانى اكىمدىگىنىڭ وكىلدەرى قاتىستى.
كەشتى وقۋ ورنىنىڭ باسشىسى, اكادەميك تىلەكتەس ەسپولوۆ اشىپ, قازاق حالقىنىڭ ماقتانىشى, جىر الىبى جامبىلدىڭ تورقالى تويى تاۋەلسىزدىگىمىزدىڭ 25 جىلدىعىمەن تۇسپا-تۇس كەلىپ وتىرعانىن, ءبۇگىنگى شارا ەلىمىزدىڭ تۇكپىر-تۇكپىرىندە اتالىپ ءوتىپ جاتقان ءدۇبىرلى مەرەكەنىڭ جالعاسى ەكەنىن ايتا كەلىپ, ءدۇلدۇل اقىننىڭ شىعارمالارىن كەڭىنەن ناسيحاتتاۋ, ارتىندا قالعان مول مۇراسىن زەردەلەۋ, ەل بىرلىگىن اسقاقتاتقان جىرلارى ارقىلى جاس ۇرپاقتى وتانشىلدىق سەزىمگە تاربيەلەۋدە اسا قاجەتتىگىنە ەكپىن ءتۇسىردى.
مەرەيتويلىق جيىندا ءسوز العان م.و.اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى, ۇعا-نىڭ كوررەسپوندەنت مۇشەسى, فيلولوگيا عىلىمدارىنىڭ دوكتورى ءۋاليحان قاليجانوۆ جامبىل جاباەۆ ولەڭ جورگەگىمەن كەلىپ, ونىڭ ەگىزىنە, سەرىگىنە اينالعانىن, ولەڭ اقىننىڭ باعىن اشىپ, قوعامدىق ويدىڭ تايقازانىنا سالعانىن, سوندىقتان دا ونىڭ ءان-جىرلارى, كۇيلەرى مەن ايتىستارى, داستاندارى ءنارلى, ايقىن, قۋاتتى بولعاندىقتان قازاعىمەن بىرگە جاسايتىن ۇلتتىق قۇندىلىققا اينالىپ كەتكەندىگىن ايتسا, «قازاق ادەبيەتى» گازەتىنىڭ باس رەداكتورى, جازۋشى جۇماباي شاشتاي ۇلى بابامىزدىڭ ايتىس ونەرىندەگى مادەنيەتىنە توقتالىپ, كەيدە جامبىلدى حالىققا جاقىنداتۋدىڭ ورنىنا ۇيرەنشىكتى قابىلداتىپ جىبەرۋ ءسال بولسا دا زيانىن تيگىزىپ جاتاتىنىن, سونداي-اق كەنەن اقساقالدىڭ جاكەڭ جايىنداعى «ولەڭدە – ءانشى, دومبىرادا – كۇيشى, اقىندىقتا – اقىن» دەگەن ولشەمدەرى تەرەڭىرەك زەردەلەنسە دەي كەلىپ, زالدا وتىرعان كەلەشەك جاس مامانداردى ۇلتتىڭ تۇتاستىعىنا, بولاشاعىنا قىزمەت ەتۋگە شاقىردى.
ال اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە شىعاتىن «جامبىل الەمى» جۋرنالىنىڭ رەداكتورى, فيلولوگيا عىلىمدارىنىڭ دوكتورى, پروفەسسور تەمىرحان تەبەگەنوۆ بۇگىندە جىر ءدۇلد ۇلى مۇراسىنىڭ زەرتتەلىپ, زەردەلەنىپ, ونىڭ ءتالىم-تاربيەگە قانشالىقتى وزەك بولىپ جاتقانىن, اباي اتىنداعى قازۇپۋ-نىڭ ۇيىمداستىرۋىمەن ءى رەسپۋبليكالىق ستۋدەنت اقىنداردىڭ ايتىسى وتكەنىن, جامبىلدىڭ ليريكالىق تەرمە-تولعاۋلارى, فيلوسوفيالىق, پەداگوگيكالىق, پسيحولوگيالىق تاعىلىمى مەن ەرەكشەلىگىن العا تارتتى. «تۇلعا دامۋ» ورتالىعىنىڭ جەتەكشى قىزمەتكەرى, فيلولوگيا عىلىمدارىنىڭ دوكتورى, پروفەسسور سالتانات ىزتىلەۋوۆا دا ءبىر عاسىر ءومىر ءسۇرىپ, ەكى عاسىردىڭ جۇگىن ارقالاعان جامبىل بابامىز وزىمەن بىرگە تاماشا ايتىس ونەرىنىڭ, فولكلوردىڭ كەرەمەت تەرەڭدە جاتقان بايلىقتارىن حالىققا تاعىلىم رەتىندە بەرىپ كەتكەنىن, سونداي-اق «نەگە جامبىل – فەنومەن, جامبىل – قۇبىلىس؟» دەگەن ساۋال قويىپ, وعان مازمۇندى, جان-جاقتى جاۋاپ بەردى.
گۇلزەينەپ سادىرقىزى,
«ەگەمەن قازاقستان».
الماتى.
سۋرەتتى تۇسىرگەن م.بوتابەكوۆ.