ورتالىق سايلاۋ كوميسسياسىنىڭ حاتشىسى باقىت مەلدەشوۆ كەشە وتكىزگەن بريفينگتە وسى جىلدىڭ 28 اقپانىندا سايلاۋشىلار تىزىمدەرىن اكىمدىكتەردەن سايلاۋ ۋچاسكەلەرىنە بەرۋ اياقتالعانىن حاباردار ەتتى.
وسك حاتشىسىنىڭ اتاپ وتكەنىندەي, كونستيتۋتسياعا جانە سايلاۋ زاڭناماسىنا سايكەس ون سەگىز جاسقا تولعان ءاربىر ازامات سايلاۋدا داۋىس بەرۋ قۇقىعىنا يە. سايلاۋشى ءوزىنىڭ بۇل قۇقىعىن ىسكە اسىرا الۋى ءۇشىن اكىمدىكتەر سايلاۋشىلار تىزىمدەرىن جاسايدى جانە ولارداعى مالىمەتتەردىڭ انىقتىعى مەن تولىقتىعىنا جاۋاپ بەرەدى. ناقتىلى سايلاۋ ۋچاسكەسiندە ازاماتتى سايلاۋشىلار تiزiمiنە ەنگiزۋ ءۇشiن ونىڭ وسى سايلاۋ ۋچاسكەسiنiڭ اۋماعىندا تۇرعىلىقتى جەرi بويىنشا تiركەلۋ فاكتiسi نەگiز بولادى.
«سايلاۋ تۋرالى» زاڭعا سايكەس اكىمدىكتەر 28 اقپاننان كەشىكتىرمەي ءتيىستى ۋچاسكەلىك سايلاۋ كوميسسيالارىنا سايلاۋشىلاردىڭ جاڭارتىلعان تىزىمدەرىن اكت بويىنشا بەردى, – دەدى ب.مەلدەشوۆ وسى جونىندە. – سول ساتتەن باستاپ ۋچاسكەلىك سايلاۋ كوميسسيالارى تىكەلەي سايلاۋ ۋچاسكەلەرىندەگى جۇمىسقا كىرىسەدى. جالپى, رەسپۋبليكا بويىنشا 9840 سايلاۋ ۋچاسكەسى قۇرىلدى. ءتورتىنشى ناۋرىزدان باستاپ سايلاۋشىلار تىزىمدەرى تانىسۋ ءۇشىن ۋچاسكەلىك سايلاۋ كوميسسيالارىنىڭ ءۇي-جايلارىندا ۇسىنىلادى. ءاربىر سايلاۋشى ولاردا ءوزى تۋرالى دەرەكتەردى داۋىس بەرۋ كۇنىنە دەيىن جانە سايلاۋ كۇنى تەكسەرە الادى».
وسك حاتشىسى سايلاۋشىنىڭ ءوزى تۋرالى دەرەكتەردى قالاي بىلە الاتىنىنا دا توقتالدى. ب.مەلدەشوۆتىڭ ايتۋىنشا, ول ءۇشىن ۋچاسكەلىك سايلاۋ كوميسسياسىنا جەكە باسىن كۋالاندىراتىن, سونداي-اق, تۇرعىلىقتى جەرىندە تىركەلگەنىن (مەكەنجاي انىقتاماسى نەمەسە ازاماتتاردى تىركەۋ كىتابى) راستايتىن قۇجاتتارمەن كەلىپ, سايلاۋشىلار تىزىمدەرىمەن مۇقيات تانىسۋ قاجەت. مەكەنجاي انىقتاماسىن سايلاۋشى حالىققا قىزمەت كورسەتۋ ورتالىعىندا (حقكو), «ەلەكتروندىق ۇكىمەت» پورتالىندا (ەلەكتروندىق-تسيفرلىق قولتاڭبا - ەتسق بولعاندا) نەمەسە جسن بويىنشا جانە حقكو-دا ورنالاسقان تەرمينال ارقىلى الا الادى.
«سايلاۋشىنىڭ تەگى تىزىمدە جوق بولعان نەمەسە ءوزى تۋرالى دەرەكتەردە دالسىزدىكتەردى انىقتاعان جاعدايدا, سايلاۋشى جوعارىدا اتالعان قۇجاتتاردىڭ نەگىزىندە ونى تىزىمگە ەنگىزۋدى نەمەسە قاجەتتى تۇزەتۋلەر ەنگىزۋدى تالاپ ەتە الادى, – دەدى وسك حاتشىسى ءارى قاراي. – قازاقستان رەسپۋبليكاسىنىڭ اۋماعىنداعى ءوزىنىڭ ەلدى مەكەنى شەگىنەن تىسقارى شىققان جاعدايدا, سايلاۋشىعا داۋىس بەرۋ مۇمكىندىگىن داۋىس بەرۋ قۇقىعىن بەرەتىن ەسەپتەن شىعارۋ كۋالىگىن بەرەدى. ونى سايلاۋشى تىركەلگەن جەرى بويىنشا ۋچاسكەلىك سايلاۋ كوميسسياسىندا جازباشا ءوتىنىشىنىڭ نەگىزىندە جانە جەكە كۋالىگىن ۇسىنعاندا 4 ناۋرىزدان باستاپ 19 ناۋرىز كۇنگى ساعات 18.00-گە دەيىن الا الادى».
بۇدان سوڭ ب.مەلدەشوۆ داۋىس بەرۋگە كەلە المايتىن سايلاۋشىلارعا ەسەپتەن شىعارۋ كۋالىگىن بەرۋ جايىنان حاباردار ەتتى. «ازاماتتىڭ, سونداي-اق, ءوزىنىڭ اتىنا داۋىس بەرۋ قۇقىعىن بەرەتىن ەسەپتەن شىعارۋ كۋالىگىن الۋعا ۋاكىلەتتى ادامعا سەنىمحات بەرۋگە قۇقىعى بار. بۇل باسقا مەكەنجايدا بولىپ, ءوزىنىڭ سايلاۋ ۋچاسكەسىنە داۋىس بەرۋ ءۇشىن كەلە المايتىن سايلاۋشىلارعا ەسەپتەن شىعارۋ كۋالىگىن الىپ, سايلاۋعا قاتىسۋعا مۇمكىندىك بەرەدى. بۇل رەتتە ەسەپتەن شىعارۋ كۋالىگى باسقا سايلاۋ وكرۋگىندە نەمەسە ءبىر ەلدى مەكەن شەگىندە باسقا سايلاۋ ۋچاسكەسىندە داۋىس بەرۋگە نيەت بىلدىرگەن سايلاۋشىلارعا بەرىلمەيتىنىن ەستە ساقتاعان ماڭىزدى», – دەدى ول.
سونىمەن, پارلامەنت ءماجىلىسىنىڭ دەپۋتاتتارىن سايلاۋدا سايلاۋشى باسقا ەلدى مەكەندەگى كەز كەلگەن سايلاۋ ۋچاسكەسىندە داۋىس بەرە الادى. سەبەبى, مۇنداي جاعدايدا بۇكىل ەل سايلاۋ وكرۋگى بولىپ تابىلادى. ال ءماسليحاتتار دەپۋتاتتارىن سايلاۋدا باسقا ەلدى مەكەندەگى سايلاۋ ۋچاسكەلەرىندە عانا, بىراق سايلاۋشى تىركەلگەن سايلاۋ وكرۋگىنىڭ شەگىندە عانا داۋىس بەرە الادى. داۋىس بەرۋ كۇنى ۋچاسكەلىك سايلاۋ كوميسسياسى ەسەپتەن شىعارۋ كۋالىگىن جانە سايلاۋشىنىڭ جەكە باسىن كۋالاندىراتىن قۇجاتتى ۇسىنعان جاعدايدا, ونى كەلگەن جەرى بويىنشا سايلاۋشىلار تىزىمىنە ەنگىزەدى.