استانا. 25 اقپان. دۇنيەجۇزىلىك اۋەسقوي بوكس قاۋىمداستىعى (AIBA) كاسىپقوي بوكسشىلاردىڭ وليمپيادا ويىندارىنا قاتىسۋ ماسەلەسىنە بايلانىستى شەشىم قابىلدادى. ەندى 12 راۋند بويى شارشى الاڭدا شارشاماي ايقاسۋعا مۇمكىندىگى بار كاسىپقويلار وليمپيادا جۇلدەسىنە دە تالاسۋعا قۇقىلى. بۇل تۋرالى ESPN-گە سىلتەمە جاساعان egemen.kz ءتىلشىسى حابارلادى.
AIBA پرەزيدەنتى چينگ-كۋو ۆۋ مىرزانىڭ ايتۋىنشا, جەتەكشى كاسىپقوي بوكسشىلار وليمپيالىق ويىندارعا قاتىسۋ قۇقىنا يە بولدى. مۇنداي شەشىم اتالعان ۇيىمنىڭ كەشە انگليانىڭ مانچەستەر قالاسىندا وتكەن كەزەكتى جيىنىندا قابىلداندى.
ەڭ قىزىعى, كاسىپقوي بوكسشىلار بيىل وتەتىن ريو وليمپياداسىنان باستاپ قاتىسۋعا مۇمكىندىك الىپ وتىر. الداعى بىرنەشە ايدىڭ ىشىندە وسى ماسەلەگە كەدەرگى بولىپ وتىرعان باسقا دا تەتىكتەر قاراستىرىلىپ, بارلىق كەلەڭسىزدىك تولىعىمەن جويىلماق.
ايتا كەتەيىك, 2013 جىلى AIBA كاسىپقوي بوكسشىلارعا وليمپياداعا قاتىسۋعا رۇقسات بەرگەن ەدى. الايدا, ول كەزدە «بوكسشى كاسىپقوي دەڭگەيدە 15 جەكپە-جەكتەن ارتىق وتكىزبەۋ كەرەك», دەگەن تالاپ قويىلدى. سونداي-اق, ويىندارعا قاتىسۋعا نيەتتى كاسىپقوي بوكسشى AIBA-نىڭ كاسىپقوي بوكس بويىنشا ءبولىمى APB-مەن قىسقا مەرزىمدى شارتقا قول قويۋى ءتيىس-ءتىن. ەندى بۇل كەدەرگىلەردىڭ بارلىعى الىنىپ تاستالاتىن بولدى.
ال 2013 جىلعا دەيىن كاسىپقوي بوكسشىلارعا وليمپياداعا قاتىسۋعا ەشقانداي مۇمكىندىك بەرىلگەن جوق.
ەلامان قوڭىر.
دەرەك, سۋرەت: ESPN.