كوكشەتاۋ. 25 اقپان. كوكشەتاۋلىق ترياتلونشى افريكا كۋبوگىنىڭ كەزەڭدىك جارىسىندا جەڭىسكە جەتتى. بۇل تۋرالى تىلشىسىنە اقمولا وبلىستىق ىشكى ىستەر دەپارتامەنتى جانىنداعى «اقمولا مەديا ورتالىعىنا» سىلتەمە جاساعان egemen.kz ءتىلشىسى حابارلادى.
اتالعان جارىسقا وبلىسىمىزدان 3 ترياتلونشى قاتىسقانىن اتاپ وتكەن ءجون. «ەليتا» توبىنداعى سپورتشىلار جوعارى دەڭگەيلى جارىستا وليمپياداعا جولداما الۋ ءۇشىن كۇرەستى. ولار سۋعا جۇزۋدەن 1500 مەترلىك, ۆەلوسيپەدپەن جارىستا 40 شاقىرىمدىق جانە جۇگىرۋدەن 10 شاقىرىمدىق سايىستا سىنعا تۇسكەن بولاتىن.
تارتىستى باسەكەدە ايان بەيسەنباەۆ ترياتلوندا افريكا كۋبوگىنىڭ التىن مەدالىن جەڭىپ الدى. سونداي-اق, تەمىرلان تەمىروۆتىڭ مارەگە بەسىنشى, ال ۆالەنتين مەششەرياكوۆتىڭ ون ەكىنشى بولىپ جەتۋى جاقسى كورسەتكىش دەپ باعالاندى. ولاردى بەلگىلى ماماندار سەرگەي پيحيدكو مەن يۋري سولوۆەۆ جاتتىقتىرادى.
باقبەرگەن امالبەك.
دەرەك, سۋرەت: «اقمولا مەديا ورتالىعى».