قاراعاندى. 22 اقپان. قاراعاندى وبلىسىنداعى بۇقار جىراۋ اۋدانىنىڭ عابيت مۇستافين كەنتىندەگى قارتتار ۇيىنەن ءورت شىقتى. بۇل تۋرالى قازاقستان مۇسىلماندان ءدىني باسقارماسىنىڭ قاراعاندى وبلىسى بويىنشا ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
جەدەل جەتكەن كومەكتىڭ ارقاسىندا 22 قاريا ورتكە ورانعان عيماراتتان امان-ەسەن قۇتقارىلىپ, كوپ قاباتتى ۇيلەردىڭ بىرىنە ورنالاستىردى. اتالعان باسقارمانىڭ قاراعاندى وبلىسى بويىنشا وكىل يمامى ومىرزاق قاجى قازكەن ۇلى يمامدارعا ءدىني باسقارمانىڭ قايىرىمدىلىق باعىتى بويىنشا تاپسىرما بەرىپ, قيىندىققا تاپ بولعان جۇرتتىڭ جاعدايىن ءبىلىپ, كومەك كورسەتۋدى تاپسىردى.
قاراعاندى وبلىستىق ورتالىق مەشىتىنىڭ نايب يمامى مەرەي جاقيا ۇلى مەن بۇقار جىراۋ اۋداندىق مەشىتىنىڭ يمامى امانبول رىمقۇل ۇلى كەنتكە ارنايى بارىپ, قاريالاردىڭ حال-جاعدايىن ءبىلىپ, قولدان كەلگەن كومەكتىڭ ءبارىن كورسەتتى.
قايرات ءابىلدينوۆ.
دەرەك, سۋرەت: قازاقستان مۇسىلماندان ءدىني باسقارماسىنىڭ قاراعاندى وبلىسى بويىنشا ءباسپاسوز قىزمەتى.