قوستاناي. 23 اقپان. №2 قوستاناي قالالىق سوتى بىرنەشە جىلدان بەرى شۋلى ءىستىڭ نۇكتەسىن قويدى. وبلىستىق تۋبەركۋلەزگە قارسى ديسپانسەردىڭ فيزيوپەدياترى ايناش قالجانوۆا مەن وسى ديسپانسەردىڭ بالالار ءبولىمىنىڭ مەڭگەرۋشىسى سۆەتلانا باليتسكاياعا قىلمىستىق كودەكستىڭ 4-تاراۋىنىڭ, 114 -بابى بويىنشا «ءوز كاسىبي مىندەتىن سالاق اتقارىپ, ناۋقاستىڭ ولىمىنە سەبەپكەر بولعان» دەگەن كىنا تاعىلدى. ولارعا سوت جازا شىعاردى. بۇل تۋرالى قوستاناي وبلىستىق سوتىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
2010 جىلى ماۋسىمنىڭ ءتورتى كۇنى وبلىستىق تۋبەركۋلەزگە قارسى ديسپانسەردىڭ وكپە ەمى بولىمىنە 4 جاسار ا.ساعىندىقوۆ تۇسەدى. وعان «وڭ وكپەنىڭ جوعارعى تۇسى العاشقى تۋبەركۋلەز بەلگىلەرىنە شالدىققان» دەگەن دياگنوز قويىلادى. ارادا ءبىر اي وتكەن سوڭ, 3 شىلدەدە دارىگەر ا.قالجانوۆا بالا قانىنىڭ بيوحيميالىق ساراپتاما ناتيجەلەرىن الادى. ساراپتاما قورىتىندىسى بويىنشا قان قۇرامىنداعى جالپى بەليرۋبيننىڭ ايتارلىقتاي ارتىق بولۋى باۋىرعا ۋلاندىرعىش اسەر ەتىپ وتىرعاندىعىن انىق كورسەتكەن. الايدا, قالجانوۆا ۋاقىتىلى «ۋىتتىق گەپاتيت» دياگنوزىن قويماعان جانە دە تۋبەركۋلەزگە قارسى ءدارى-دارمەكتى بالاعا سالۋدى توقتاتپاعان. بالانى دۇرىس ەمدەمەۋ سالدارىنان ۋلاندىرعىش گەپاتيت دامىپ, ءبىراز ۋاقىت وتكەن سوڭ ناۋقاس بالادا باۋىردىڭ وتكىر قابىنۋى باستالعان.
كەيىن 21 شىلدەدە بالالار ءبولىمى مەڭگەرۋشىسى سۆەتلانا باليتسكايا 19 شىلدە كۇنى بالا قانىنىڭ بيوحيميالىق ساراپتاماسىنان بەليرۋبين قۇرامى ءتيىستى مولشەردەن 5 ەسەگە ارتىق ەكەنىن كورە تۇرا, ارنايى ءدارى-دارمەك تاعايىنداعان. كەرى اسەرىن تيگىزگەن ءدارى-دارمەكتىڭ ۇزاق بەرىلۋى بالا جاعدايىن ءتىپتى ناشارلاتىپ, ول 8 تامىز كۇنى قوستاناي قالالىق اۋرۋحاناسىندا قايتىس بولادى.
سوت ۇكىمىمەن ا.قالجانوۆاعا 2 جىلعا باس بوستاندىعىن شەكتەۋ جانە 3 جىل مەرزىمگە دارىگەرلىك قىزمەتپەن اينالىسۋ قۇقىعىنان ايىرۋ جازاسى تاعايىندالدى. ال س.باليتسكاياعا 1 جىل باس بوستاندىعىن شەكتەۋ جانە 2 جىل دارىگەرلىك قىزمەتپەن اينالىسۋ قۇقىعىنان ايىرۋ جازاسى بەرىلدى.
قىلمىستىق-پروتسەسسۋالدىق كودەكسىنىڭ 35-بابىنىڭ 1-بولىگى 4-تارماعى جانە وسى باپتىڭ 4 بولىگىنە سايكەس قىلمىستىق جاۋاپتىلىققا تارتۋدىڭ ەسكىرۋ مەرزىمىنىڭ وتۋىنە وراي ەكى دارىگەر دە جازادان بوساتىلدى.
جابىرلەنۋشى تاراپتىڭ ازاماتتىق سوت ءوندىرىسى تارتىبىندە ماتەريالدىق جانە مورالدىق شىعىندى وندىرۋگە ازاماتتىق شاعىمىن قاناعاتتاندىرۋ قۇقىعى قاناعاتتاندىرىلدى.
سوت ۇكىمى زاڭدى كۇشىنە ەنگەن جوق.
ءنازيرا جارىمبەتوۆا.
دەرەك: قوستاناي وبلىستىق سوتىنىڭ ءباسپاسوز قىزمەتى.
سۋرەت: vladtime.ru.