وسكەمەن. 22 اقپان. شىعىس وڭىرىنە كەلگەن «ماڭگىلىك ەل» پويىزىنىڭ قۇرامىنداعى بىلىكتى دارىگەرلەر جەرگىلىكتى تۇرعىنداردىڭ دەنساۋلىعىن تەكسەرىپ, مەديتسينالىق جولدامالار بەردى. بۇل تۋرالى egemen.kz ءتىلشىسى حابارلادى.
نەۆرولوگ, نەفرولوگ, ۋرولوگ, گەماتولوگ, ورتوپەد-تراۆماتولوگ, رەۆماتولوگ, پۋلمونولوگ, پەدياتر, گاستروەنتەرولوگ, انگيوحيرۋرگ, كارديولوگ, ەندوكرينولوگ, وفتالمولوگ, ونكولوگ جانە حيرۋرگ سىندى مەديتسينا قىزمەتكەرلەرى پويىز توقتاعان قالالار مەن كەنتتەردە قابىلداۋلار وتكىزىپ, حالىقتىڭ دەنساۋلىعىن تەكسەرىپ, كەڭەس بەردى.
«ءبىز شىعىس قازاقستان ءوڭىرىنىڭ تۇرعىندارىنا ريزا بولدىق. ولاردىڭ جانارىنان سەنىمدىلىكتىڭ ۇشقىنىن بايقايسىز. بارلىعى ەلىمىزدىڭ گۇلدەنۋىنە, كوركەيۋىنە ەڭبەك ەتكىسى كەلەدى. 2016 جىل – ەرەكشە جىل. ءبىز بۇل جىلدى الەۋمەتتىك ماسەلەلەردى شەشۋدەن باستاپ وتىرمىز», – دەدى اتالعان پويىزدىڭ جەتەكشىسى ءامىرجان الپەيىسوۆ.
ماسەلەن, پويىزداعى دارىگەرلەر قاۋىمى زىريان قالاسىندا 334, شار قالاسىندا 490 ادامنىڭ دەنساۋلىعىن تەكسەرىپ, مەديتسينالىق قورىتىندى جاسادى. رەۆماتولوگ-دارىگەر داۋلەت مەدەۋ – شىمكەنتتەگى وبلىستىق رەۆماتولوگيا ورتالىعىنىڭ دارىگەرى. رەسپۋبليكاداعى الەۋەتتى رەۆماتولوگيا ورتالىعى وڭتۇستىك قازاقستاندا ەكەنى بەلگىلى.
«كەيبىر ەلدى-مەكەندەردە كۇنىنە وتىز-قىرىق ادامعا دەيىن قابىلدادىق. ماقساتىمىز – مەديتسينانىڭ سوڭعى جەتىستىكتەرىن كورسەتىپ, دياگنوزى قيىن ناۋقاستارعا بىلىكتى كەڭەس بەرۋ. زىريان قالاسىندا جۇرەك دەرتىنە شالدىققان ءتورت ناۋقاسقا الماتىداعى سىزعانوۆ اتىنداعى ۇلتتىق عىلىمي ورتالىققا جولداما بەردىك. ماماننىڭ تاپشىلىعىنان ولار دەر كەزىندە ءتيىستى دارىگەرگە قارالماي, دەرتتەرىن اسقىندىرىپ الىپتى», – دەيدى رەۆماتولوگ مامان.
اتالعان پويىز بۇگىن سەمەي قالاسىنا كەلدى.
دۋمان اناش.
دەرەك: egemen.kz.
سۋرەت: شقو اقپاراتتىق ورتالىعى.