وسكەمەن. 22 اقپان. ەلوردادان شىققان «ماڭگىلىك ەل» پويىزى شىعىس وڭىرىنە كەلدى. بۇل تۋرالى egemen.kz ءتىلشىسى حابارلادى.
«ماڭگىلىك ەل» پويىزى شىعىس وڭىرىندە بەس قالاعا توقتادى. ونىڭ ىشىندە اقتوعاي مەن شار كەنتى, وسكەمەن, سەمەي جانە زىريان قالالارى بار. ەل تاۋەلسىزدىگىنىڭ 25 جىلدىق مەرەيتويى شەڭبەرىندە جولعا شىققان پويىز قۇرامىندا «ماڭگىلىك ەل» يدەياسى مەن بەس ينستيتۋتتىق رەفورمانى ءتۇسىندىرۋ, الەۋمەتتىك ماسەلەلەر بويىنشا كەڭەس بەرۋ ءۇشىن 96 ادامنان تۇراتىن قازاقستان حالقى اسسامبلەياسىنىڭ مۇشەلەرى, عالىمدار, ساراپشىلار جانە دارىگەرلەر بار. سونداي-اق, ەلىمىزدىڭ ادىلەت, ءبىلىم جانە عىلىم, الەۋمەتتىك دامۋ جانە دەنساۋلىق, يندۋستريا جانە جاڭا تەحنولوگيالار مينيسترلىكتەرىنىڭ, «اتامەكەن» ۇلتتىق كاسىپكەرلەر پالاتاسىنىڭ ساراپشىلارى جەرگىلىكتى تۇرعىنداردى قابىلداپ, كەڭەس وتكىزدى.
وبلىس ورتالىعىنا جەكسەنبى كۇنى جەتكەن «ماڭگىلىك ەل» پويىزىن قالا تۇرعىندارى «وسكەمەن-1» تەمىر جول ۆوكزالىنان شات-شادىمان كوڭىل-كۇيمەن كۇتىپ الدى. سالتاناتتى شاراعا وڭىردەگى تەمىرجولشىلار اۋلەتتەرى, ەتنومادەني بىرلەستىكتەر مەن ۇكىمەتتىك ەمەس ۇيىمدار وكىلدەرى جانە جاستار جينالىپ, كەندى التاي جەرىنە تابانى تيگەن قوناقتاردىڭ قۇرمەتىنە ۇلتتىق ناقىشتاعى ادەمى كيىمدەرىمەن بي بيلەپ, ءان سالىپ, پەرروندى ىلەزدە شاتتىققا بولەدى.
«تۋعان جەرىمىزگە كەلگەندەرىڭىزگە وتە قۋانىشتىمىز. تاۋەلسىزدىگىمىزدىڭ تاريحى – تابىستى ەلىمىزدىڭ ۇلى جىلناماسى. «ماڭگىلىك ەل» – ءبىزدىڭ بابالارىمىزدىڭ ارمانى, قازاقستاندىقتاردىڭ ورتاق ۇلتتىق يدەياسى. وسىنداي كۇردەلى كەزەڭدە قازاقستان حالقى ءوزىنىڭ كەلىسىمىمەن, دوستىعىمەن, تاعاتتىلىعىمەن الەمگە ۇلگى بولىپ وتىر», – دەدى وسكەمەن قالاسىنىڭ اكىمى تەمىربەك قاسىمجانوۆ.
«ماڭگىلىك ەل» پويىزىنىڭ جەتەكشىسى ءامىرجان الپەيىسوۆتىڭ ايتۋىنشا, اتالعان جوباعا قاتىسۋشىلار ءۇشىن اباي مەن شاكارىم, مۇحتار سياقتى ۇلىلاردى سىيلاعان قاسيەتتى جەرگە اياق باسۋ – ۇلكەن قۋانىش.
دۋمان اناش.
دەرەك: egemen.kz.
سۋرەت: شقو اقپاراتتىق ورتالىعى.