ورتالىق كوممۋنيكاتسيالار قىزمەتىندە سايلاۋدى بايقاۋ جونىندەگى رەسپۋبليكالىق قوعامدىق كوميسسيانىڭ وڭىرلىك ورتالىعى قۇرىلعانى بويىنشا بريفينگ ءوتتى. جيىنعا قوعامدىق كوميسسيانىڭ وڭىرلىك باسشىسى دوسىباي شەرىمقۇلوۆ پەن وبلىستىق سايلاۋ كوميسسياسىنىڭ مۇشەسى التىنبەك كاتتەبەكوۆ قاتىسىپ, تاۋەلسىز وڭىرلىك ورتالىق قىزمەتىنە بايلانىستى جوسپارلارىمەن ءبولىستى.
د.شەرىمقۇلوۆ قوعامدىق ۇيىم لايىقتى ازاماتتاردان جاساقتالعانىن ايتا كەلىپ: «وڭتۇستىك قازاقستان وبلىسى بويىنشا 1074 سايلاۋ ۋچاسكەسى بولسا, سونىڭ بارلىعىنا بايقاۋشىلار بەلگىلەنىپ, ولاردىڭ ءبارى وقۋ-تاجىريبەدەن وتەدى. ماقسات – پارلامەنت ءماجىلىسىنىڭ جانە جەرگىلىكتى ءماسليحاتتار دەپۋتاتتارىن سايلاۋ جۇمىسىنىڭ ەلىمىزدە بەكىتىلگەن زاڭ اياسىندا ءوتۋىن قاداعالاۋ. سونداي-اق, قالىڭ كوپشىلىكتىڭ ءوز ەركىمەن تاڭداۋىنا مۇمكىندىك بەرۋ, سايلاۋدىڭ جوعارى دەڭگەيدە اشىق جانە ءادىل ءوتۋىن قامتاماسىز ەتۋ», – دەدى ول.
وڭىرلىك ورتالىقتا قۇرامى ءتورت ادامنان تۇراتىن شتاب قۇرىلدى. شتابتىڭ باستى مىندەتى – كەزەڭ-كەزەڭىمەن بريفينگتەر, سەمينار-ترەنينگتەر, نۇسقاۋلىق جيىندار وتكىزىپ, بايقاۋشىلاردىڭ فۋنكتسيونالدى مىندەتتەرىن ءتۇسىندىرۋ. ساياسي پارتيالاردىڭ شتابتارىندا بولىپ, ولاردىڭ سايلاۋالدى دايىندىقتارىن بايقاۋ, سايلاۋدى جوعارى دەڭگەيدە وتكىزۋ جونىندە پىكىر الماسۋ.
ال ا.كاتتەبەكوۆ سايلاۋعا تۇسۋگە نيەتتى 1279 ۇمىتكەردىڭ 193-ءى وبلىستىق ماسليحاتقا, 294-ءى قالالىق, 792-ءسى اۋداندىق ماسليحاتقا تالاپتانىپ وتىرعانىن ايتتى. ونىڭ ىشىندە «نۇر وتان» پارتياسىنان – 313, «اۋىل» پارتياسىنان – 22, «اق جول» پارتياسىنان – 8, «بىرلىك» پارتياسىنان 1 ۇمىتكەر بار ەكەن. 935 ازامات ءوزىن ءوزى ۇسىنىپتى. قۇداي قالاسا, دەپۋتاتتىق مانداتقا يە بولسام دەپ ەكى الاقانىن ىسىپ وتىرعانداردىڭ ىشىندە 93 نازىك جاندىلار بار.
سايلاۋدى بايقاۋ جونىندەگى رەسپۋبليكالىق قوعامدىق كوميسسيانىڭ وڭىرلىك باسشىسى دوسىباي ايتباي ۇلى سايلاۋ ناۋقانىنداعى كەز كەلگەن داۋلى ماسەلە زاڭ اياسىندا شەشىلەتىنىن كەسىپ ايتتى.
باقتيار تايجان,
«ەگەمەن قازاقستان».
وڭتۇستىك قازاقستان وبلىسى.