بۇرناعى كۇنى نورۆەگيانىڭ ليللەحاممەر قالاسىندا ءوتىپ جاتقان جاسوسپىرىمدەر اراسىنداعى ءىى قىسقى وليمپيا ويىندارىندا قازاقستان قورجىنى تاعى ءبىر جۇلدەمەن تولىقتى. اتاپ ايتقاندا, مانەرلەپ سىرعاناۋدان سىنعا تۇسكەن وتانداسىمىز ەليزابەت تۇرسىنباەۆا ەكى جاتتىعۋ قورىتىندىسى بويىنشا 167,88 ۇپاي جيناپ, قولا جۇلدەگە قول جەتكىزدى.
ءبىرىنشى جاتتىعۋ – قىسقا باعدارلامادان كەيىن 16 جاستاعى قارشاداي قازاق قىزى 59,11 ۇپايمەن ەكىنشى ورىندا تۇرعانىن اتاپ وتكەن ءجون. الايدا, ەركىن باعدارلامادان كەيىن ول ءبىر ساتى تومەن سىرعۋعا ءماجبۇر بولدى. ناتيجەسىندە وليمپيادا «التىنى» 186,04 ۇپاي جيعان رەسەيلىك پولينا تسۋرسكاياعا بۇيىردى. ال كۇمىس جۇلدە 169,50 ۇپايعا يە بولعان ونىڭ وتانداسى ماريا سوتسكوۆايانىڭ ەنشىسىندە كەتتى.
بۇگىندە ەرەسەكتەر اراسىندا باق سىناپ, وتاندىق جانكۇيەرلەرگە تانىلىپ قالعان ەليزابەت تۇرسىنباەۆا اتالعان وليمپيادادا بۇدان دا جوعارى ورىنعا لايىق بولعان ەدى. جاسىراتىنى جوق, ودان كوبىمىزدىڭ تەك «التىن» كۇتكەنىمىز دە راس. دەسەك تە, بۇل جولى بۇيىرعانى «قولا» بولدى.
وسى جەڭىستى جول 2018 جىلى وڭتۇستىك كورەيانىڭ پحەنچحان قالاسىندا وتەتىن قىسقى وليمپيادادا جالعاسىن تاپسىن دەپ تىلەيىك.
ايتا كەتەيىك, ليللەحاممەردەگى جاسوسپىرىمدەر ويىنى باستالعالى قازاقستان قورجىنىنا ءۇش جۇلدە ءتۇستى. ناقتى ايتار بولساق, ءدۇبىرلى دودانىڭ ءۇشىنشى كۇنى بياتلوننان 6 شاقىرىمدىق سپرينتتىك جارىستا سىنعا تۇسكەن ارينا پانتوۆا وليمپيادانىڭ قولا مەدالىن موينىنا تاقتى. ال كەشە كونكيشىمىز ءانۋار مۇحاماديەۆ ارالاس كوماندا ساپىندا سپرينتتىك سايىسقا قاتىسىپ, ەكىنشى ورىن الدى.
ەلامان قوڭىر,
«ەگەمەن قازاقستان».