سۇلۋلىق شىركىن, كوزدىڭ قۇرتى. جاقسى بۇعان ءسۇيسىنىپ قاراسا, جامان كوزىنىڭ سۇعىن قادايدى. سونان سوڭ, قاراۋ جاندار سۇلۋلىققا سۇرانىسى جوعارى تاۋار رەتىندە قارايدى. ءيا, ءتان ساۋداسى بۇگىنگى كۇندە ءنان بيزنەسكە اينالعان. قاراعاندىداعى جاعا ۇستاتقان وقيعا وسىلاي دەپ ايتپاسقا لاج قالدىرمايدى.
كەنشىلەر استاناسىنداعى مودەل اگەنتتىگىنىڭ ديرەكتورى اي دەسە اۋزى بار, كۇن دەسە كوزى بار ارۋلاردى اپتا سايىن توپ-توبىمەن باحرەين كورولدىگى مەن بىرىككەن اراب امىرلىگىنە جىبەرىپ وتىرعان. اراب ەلدەرىنە اتتانعان قىزداردىڭ ىشىندە وسالى جوق ەكەن. شەتىنەن قاراساڭ كوز تويمايتىن كورىكتىلەر كورىنەدى. ارالارىندا كامەلەت جاسىنا تولماعاندارى دا بار. ماسەلەن, 15 جاستاعى ءبىر قىزعا اناسىنىڭ ءوزى سەنىمحات جازىپ بەرىپتى. شاشى ۇزىن, اقىلى قىسقا بالا دا ول جاقتا تەك قانا سۋرەتكە ءتۇسىپ, ءسان بيزنەسىمەن اينالىسامىن دەگەنگە يمانداي سەنگەن عوي...
ەندى بۇل قىزدار الىستاعى ارابيادا نە جوعالتتى دەسەڭىزشى؟! سويتسە, مودەل بولۋدى ماقسات ەتكەن قىزداردى جات جەردەگى نيەتى تەرىس قىلمىستىق توپ جەزوكشەلىكپەن اينالىسۋعا ماجبۇرلەپ وتىرعان.
تاياۋدا شەتەلگە قىزدارىمىزدى اربالاپ اتتاندىرىپ وتىرعان 24 جاستاعى الاياق قىز – مودەل اگەنتتىگى ديرەكتورىنىڭ سوتى باستالدى. سوت بەلگىلى سەبەپتەرگە بايلانىستى, جابىق ەسىك جاعدايىندا وتۋدە.
وندا ايىپتالۋشى ايىلىن جيماي, ءوزىن اقتاۋعا تىرىسىپ جاتىر. «مەن ەشكىمدى دە ەركىنەن تىس ەشقايدا بارۋعا ماجبۇرلەگەن جوقپىن. قىزداردىڭ ءبارى شەتەلگە ءوز ەرىكتەرىمەن كەتتى. ولاردى ۇشاققا ەشكىم دە كۇشتەپ وتىرعىزعان جوق. كەلگەن جەرىندە ولار مودەل بولۋدى نەمەسە جەزوكشەلىك جولدى ءوز ەرىكتەرىمەن تاڭدادى», – دەپ ايتقانىنان قايتپادى.
ءوزى دە كەزىندە تالاي ءسان بايقاۋلارىنا قاتىسىپ, بۇل سالانىڭ قۋلىق-سۇمدىعىنا ابدەن توسەلىپ العان كۇدىكتى قىزعا قىلمىستىق كودەكستىڭ 128-بابىنىڭ 3-تارماقشاسى بويىنشا «ادام ساۋداسى» قىلمىسى بويىنشا ايىپ تاعىلعان.
قايرات ءابىلدينوۆ,
«ەگەمەن قازاقستان».
قاراعاندى.