رەسەيدىڭ ءبىر ازاماتىنىڭ زيكا اۋرۋىن جۇقتىرعانى انىقتالدى. ول ماسكەۋ ەمحانالارىنىڭ بىرىنە دەنە قىزۋى كوتەرىلىپ, دەنەسىنە بورتە پايدا بولعانى تۋرالى شاعىمدانادى. دارىگەرلەر ودان اناليز الىپ, تەكسەرگەننەن كەيىن ايەلدىڭ زيكا اۋرۋمەن اۋىراتىنىن انىقتايدى.
زيكا اۋرۋى بىلتىر افريكا مەن ازيا ەلدەرىنەن شىققان. قازىر ونىمەن جەر جۇزىندە بىرنەشە مىڭ ادامنىڭ اۋىراتىنى انىقتالىپ وتىر. ولاردىڭ كوبىسى افريكا مەن ازيا قۇرلىعىندا. كەيىنىرەك وڭتۇستىك جانە سولتۇستىك امەريكا ەلدەرىنە دە تارالا باستاعان. ەندى, مىنە, ەۋروپانى اتتاپ ءوتىپ, رەسەيگە دە جەتىپ وتىر. بۇل ەلدە اۋرۋعا شالدىققان ازىرگە جالعىز ادام. سوندىقتان دارىگەرلەر ونى دەرەۋ اۋرۋحاناعا جاتقىزىپ, ەشكىممەن ارالاسپاۋىن تالاپ ەتتى. ناۋقاستىڭ ايتۋىنشا, ءبارى اياق استىنان بولعان. ول اۋرۋدى جۇقتىرعانىن ءوزىم دە بىلمەي قالدىم, دەيدى.
قازىر ايەل اۋرۋحانادا ءتيىستى دارىلەردى الىپ جاتىر. ال دارىگەرلەر الدىن الۋ ءۇشىن ايەلدىڭ وتباسىن تەكسەردى. ابىروي بولعاندا, ەشكىمنەن ەشتەڭە تابىلعان جوق. سودان كەيىن ءدارىگەرلەر ايەل مىنگەن ۇشاقتى دا تەكسەرىپ كوردى. ول جەردە دە ادامنىڭ دەنساۋلىعىنا قاۋىپتى بولاتىنداي ەشتەڭە تابىلمادى. مامانداردىڭ ايتۋىنشا, زيكا اۋرۋىن Aedes aegypti دەگەن ماسالار جۇقتىرادى.
قولدا بار مالىمەتتەرگە قاراعاندا, زيكا اۋرۋىنا قارسى ەمدى رەسەي دارىگەرلەرى تاپقان. ولار جاقىندا بۇل جابدىقتى جەنەۆادا تانىستىردى.
داستان كەنجالين,
«ەگەمەن قازاقستان».