قازاقستان كوممۋنيستىك حالىق پارتياسىنىڭ ورتالىق كەڭسەسىندە پارتيا باسشىلىعى مەن وبلىستىق جانە قالالىق كوميتەتتەرى بەلسەندىلەرىنىڭ قاتىسۋىمەن ەلەكتوراتتى كەزەڭدە قازاقستان رەسپۋبليكاسى زاڭناماسىن ۇستانۋ بويىنشا كەڭەس بەرەتىن سكايپ-سەمينار ءوتتى.
جيىندا ءسوز العان قكحپ ورتالىق كەڭسەسىنىڭ باسشىسى ۆ. سميرنوۆ: «زاڭدىلىققا سايكەس, جۇمىس ءجۇرگىزۋ – ءبىزدىڭ نەگىزگى ۇستانىمىمىز. پارتيا ءوز كەزەگىندە قازىرگى زامانعى كوممۋنيستىك تاربيەنىڭ نەگىزى رەتىندە قولدانىستاعى زاڭ تالاپتارىنا باسىمدىق بەرەدى. سوندىقتان, ءبىز ۇگىت-ناسيحات جۇمىستارىنا دايىندىقتى زاڭناما بويىنشا جاتتىقتىرۋ سەمينارىنان باستاۋدى ءجون كورىپ وتىرمىز», – دەدى.
سەمينار بارىسىندا پارتيا وكىلدەرى ۇگىت-ناسيحات جۇمىستارى بارلىق كەزەڭدە قولدانىستاعى زاڭ شەڭبەرىندە اتقارىلۋى ءتيىس ەكەندىگىن جەتكىزدى. سونداي-اق, سايلاۋ زاڭناماسى مەن ءتيىستى شارالاردى وتكىزۋ ەرەكشەلىكتەرىن تالداي كەلە, قولدانىستاعى زاڭنامانى قاتاڭ ۇستانۋ قاجەتتىگىن, پارتيانىڭ ءاربىر مۇشەسى ونى قابىلداپ, قولدانىپ جانە العان ءبىلىمىن اۋداندىق جانە باستاۋىش ۇيىمدارداعى ءارىپتەستەرىمەن ءبولىسۋى ءتيىستىگىن اتاپ ءوتتى.
شارا سوڭىندا ۆ.سميرنوۆ سەميناردا جيناقتالعان ءتاجىريبە وبلىس ورتالىقتارى مەن ايماقتارداعى كوممۋنيستەرگە پارتيانىڭ باعدارلامالىق ماقساتتارى مەن كوممۋنيستىك ۇستانىمدارىن ىسكە اسىرۋ ءۇشىن ۇلكەن مۇمكىندىك بەرەتىنىنە سەنىم ءبىلدىردى.
بۇل كۇنى, سونىمەن قاتار, وبلىستىق جانە قالالىق كوميتەتتەرگە ۇگىت-ناسيحات جۇمىستارىن رەتتەيتىن زاڭعا قوسىمشا نورماتيۆتىك اكتىلەر مەن زاڭنان ۇزىندىلەر ءجىبەرىلدى.
ءلايلا ەدىلقىزى,
«ەگەمەن قازاقستان».