وبلىس اكىمى ەرىك سۇلتانوۆ استانادا شەتەلدىك ديپلوماتيالىق كورپۋس وكىلدەرىمەن كەزدەسىپ, وڭىرگە اۋقىمدى ينۆەستيتسيالىق قارجى تارتۋ جولدارى جايلى ويلارىمەن ءبولىستى.
القالى باسقوسۋدى سىرتقى ىستەر ءمينيسترىنىڭ كەڭەسشىسى ءانۋار قۇرجىقاەۆ اشىپ, ەلباسى العا قويعان مىندەتتەرگە سايكەس ەكونوميكا, ونەركاسىپ, الەۋمەتتىك سالالارعا شەتەلدەردەن قارجى قۇيۋدىڭ الەۋەتىن ءتيىمدى پايدالانۋ ماڭىزدى مىندەت سانالاتىنىن جەتكىزدى.
ەرىك حامزا ۇلى 33 مەملەكەتتىڭ ديپلوماتيالىق ميسسيا جەتەكشىلەرى الدىندا «قازاقستان جاڭا جاھاندىق ناقتى احۋالدا: ءوسىم, رەفورمالار, دامۋ» جولداۋىندا جاڭا ينۆەستيتسيالىق ساياساتتىڭ نەگىزدەرى بەلگىلەنگەنىن, قازاقستاننىڭ الداعى مىندەتتەرىنە وراي ەكونوميكاعا جىل سايىنعى ينۆەستيتسيالاردىڭ كولەمىن 10 ميلليارد دوللاردان استامعا ۇلعايتىپ, 10 جىل ىشىندە كەم دەگەندە 100 ميلليارد دوللارعا جەتكىزۋ, ەكونوميكالىق ءوسىمنىڭ مۇنداي قارقىنى تەك ەكسپورتتىق تابىستار اعىنىن مۇمكىن ەتەتىن جاڭا درايۆەرلەر قالىپتاستىرۋ ەسەبىنەن قامتاماسىز ەتىلەتىن تالابى العا تارتىلعانىن اتاپ ءوتتى. بارلىق ينۆەستيتسيالىق جوبالاردىڭ تىكەلەي وڭىرلەردە جۇزەگە اسىرىلاتىنىن ەسكەرسەك, ايماقتا ينۆەستورلار تارتۋ مەن ينۆەستيتسيالىق احۋالدى جاقسارتۋعا باعىتتالعان شارالار بەلسەندى تۇردە جۇرگىزىلىپ كەلەدى. بىلتىر جالپى ينۆەستيتسيالار 154,5 ميلليارد تەڭگەنى قۇراپ, ءوسىم 28,3 پايىزعا جەتتى. استىق تاسىمالدايتىن ۆاگوندار, پلاستيكالىق قۇبىرلار, مۇناي ۇڭعىمالىق سورعىلار شىعارۋ, باسقا دا وندىرىستىك جوبالار يگەرىلدى. ونەركاسىپ سالاسىنداعى ءوسىم قارقىنى بويىنشا رەسپۋبليكادا التىنشى ورىندى يەلەندى. قازتەحماش ماشينا قۇرىلىسى زاۋىتىنىڭ تۇرعىزىلۋى وبلىس ءۇشىن ۇلكەن وقيعا بولدى. كاسىپورىن جەم-ءشوپ دايىندايتىن 59 تەحنيكا, SAMPO ASIA ماركالى 46 كومباين شىعاردى. پرەزيدەنتتىڭ قاتىسۋىمەن وتكەن تەلەكوپىردە تەز دايىندالاتىن تاعامدار شىعاراتىن كاسىپورىن ىسكە قوسىلدى. ءسويتىپ, ءوڭىر وسى ءونىم تۇرلەرىمەن ءوزىن تولىق قامتاماسىز ەتىپ, ءبىر بولىگى شەتەلدەرگە جونەلتىلەدى. قازىر ينۆەستيتسيالىق پورتفەل مولشەرى شامامەن 200 ميلليارد تەڭگەنى قۇرايدى. 12 جوبا اياسىندا شەتەل كومپانيالارى تارتىلعان. يندۋستريالاندىرۋ كارتاسى شەڭبەرىندە ءبىرىنشى بەسجىلدىقتا 32 جوبا پايدالانۋعا بەرىلىپ, 1400 جۇمىس ورنى قۇرىلسا, ەكىنشى بەسجىلدىقتا جوبالار سانى ەكى ەسەگە ۇلعايعان.
– بىزدە مۇناي-گاز كەن ورىندارىنىڭ جوقتىعىنا قاراماستان, تارتىمدى ينۆەستيتسيالىق ءوسىم قارقىنىن ىلگەرىلەتۋدىڭ مۇمكىندىكتەرى زور. ينۆەستيتسيالىق تارتىمدىلىق ءبىرىنشى كەزەكتە اگرارلىق سەكتوردىڭ ۇلەسىنە, ونىڭ ىشىندە وڭدەۋ سالاسىنا تيەسىلى. ەكىنشىدەن, پايدالى قازبالاردىڭ 232 كەن ورنى بارلانىپ, 48 كەلىسىمشارت جاسالدى. بۇل باعىتتا الەمگە تانىمال اۆستراليالىق «يليۋكو رەستارس» كومپانياسى بەرىك ىنتىماقتاسىپ كەلەدى. وبلىس ءتۇستى مەتالدارعا دا باي. بۇل رەتتە شەتەلدىك قارجىگەرلەر ءۇشىن پرەفەرەنتسيالار قاراستىرىلعان. ينۆەستيتسيالاردىڭ ۇلكەن اعىنى قىتاي, رەسەي, اۆستراليا ەلدەرىنەن كەلەدى دەپ كۇتىلۋدە, – دەدى ە. سۇلتانوۆ.
جيىندا قىتايلىق AILIU ونەركاسىپ توبى TOTAL Impex كومپانياسىمەن بىرلەسىپ, مايلى جانە ءداندى داقىلداردى تەرەڭ وڭدەيتىن ينۆەستيتسيالىق جوبانى قولعا العانى بەلگىلى بولدى. ول جىلىنا 80 مىڭ توننا وسىمدىك مايىن, 200 مىڭ توننا ۇن, 200 مىڭ توننا جەم شىعارۋعا قاۋقارلى. رەسەيلىكتەرمەن بىرىگىپ سالىنىپ جاتقان بيوگاز قوندىرعىسىنىڭ جوبالىق قۇنى – 1,1 ميلليارد تەڭگە. ءوندىرىس تاۋلىگىنە 9500 تەكشە مەتەر بيوگاز الا وتىرىپ, 40 تونناعا دەيىن شيكىزاتتى قايتا وڭدەي الادى.
باق وكىلدەرىنە بەرگەن سۇحباتتارىندا شۆەتسيانىڭ, فينليانديانىڭ قازاقستانداعى توتەنشە جانە وكىلەتتى ەلشىلەرى حريستيان كاميلل مەن يلككا رايسانەن قازاقستان نارىعىنا ەكسپورتتىق تاۋارلاردى بەلسەندى ەنگىزۋگە ەۋرازيالىق ەكونوميكالىق وداق قولايلى جاعداي جاساپ وتىرعانىن, بۇل ورايدا, ءوز ەلدەرىنىڭ ەكونوميكالىق الەۋەتتەرىن ءتيىمدى پايدالانۋعا جان-جاقتى كۇش سالاتىندارىن, قىزىلجار وڭىرىمەن ارىپتەستىك بايلانىس نىعايىپ كەلە جاتقاندارىن مالىمدەدى.
شەتەل ەلشىلەرىمەن ۇيىمداستىرىلعان كەزدەسۋگە ينۆەستيتسيالار جانە دامۋ مينيسترلىگىنىڭ ينۆەستيتسيالار كوميتەتىنىڭ توراعاسى ەرلان قايىروۆ, «اتامەكەن» ۇلتتىق كاسىپكەرلەر پالاتاسى باسقارما توراعاسىنىڭ ورىنباسارى نۇرجان التاەۆ قاتىسىپ, ءوز پىكىرلەرىن ورتاعا سالدى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.