الماتى. 16 اقپان. الماتىدا الاياقتاردىڭ ارەكەتىنەن 700-دەن استام ادام زارداپ شەگىپ وتىر. بۇل تۋرالى الماتى قالالىق مەملەكەتتىك كىرىستەر دەپارتامەنتىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
10 قاڭتار كۇنى الماتى قالالىق مەملەكەتتىك كىرىستەر دەپارتامەنتى ەكونوميكالىق تەرگەۋ قىزمەتىنىڭ كولەڭكەلى ەكونوميكاعا قارسى كۇرەس باسقارماسىنىڭ قىزمەتكەرلەرى تالاي ادامدى سان سوقتىرىپ, الاياقتىقپەن اينالىسقان تاعى ءبىر ۇيىمداسقان قىلمىستى توپتىڭ جولىن كەستى. ولاردىڭ استانا, الماتى جانە باسقا دا وبلىس ورتالىقتارىندا قارجىلىق پيراميدا ۇيىمداستىرعانى اشكەرە بولدى. قىلمىستى توپتىڭ قۇرامىندا رەسەي ازاماتتارى دا بار.
اتالعان قىلمىستى توپ 2014-2015 جىلدارى ەكىنشى دارەجەدەگى بانكتەن نەسيە العان تۇتىنۋشىلاردى الداعان. نەگىزگى ماقساتتارى – نەسيە الۋشىلار نەسيەنىڭ 30-دان 80 پايىزعا دەيىنگى مولشەرىن «فين ستاتۋس» جاۋاپكەرشىلىگى شەكتەۋلى سەرىكتەستىگىنە اۋدارعان جاعدايدا, العان نەسيەسىنىڭ ۋاقىتىندا جابىلۋىنا كەپىلدىك بەرگەن. ال نەسيەنى جابۋ سحەماسىن جاپپاي ءتۇسىپ جاتقان اقشامەن بىرتە-بىرتە كەزەكپەن جابۋ ارقىلى الداعان.
بۇگىندە ۇيىمداسقان قىلمىستىق توپتىڭ الداۋىنا ۇرىنعان سالىمشىلار سانى 700-دەن اسىپ كەتىپ وتىر. ال نەسيەلىك سالىمنىڭ مولشەرى جارتى ميلليارد تەڭگەگە جەتكەن. بۇل اقشالار قىلمىستى توپتىڭ ەسەپ شوتتارىنا اۋدارىلىپ, سودان كەيىن قولما-قول اقشاعا اينالدىرىلىپ وتىرعان. قازىرگى ۋاقىتتا قارجىلىق پيراميدانى قۇرۋشىلار رەسەي ازاماتتارى اعايىندى يلدار البەرتوۆيچ زياتدينوۆ پەن روبەرت البەرتوۆيچ زياتدينوۆ سوتتىڭ سانكتسياسىمەن قاماۋعا الىندى.
ەندىگى تاڭدا قارجىلىق پيراميداعا الدانعان سالىمشىلاردىڭ قاراجاتىن قايتارۋ جانە قىلمىستى توپتىڭ باسقا دا مۇشەلەرىن قۇرىقتاۋ ءۇشىن تەرگەۋ جۇمىستارى جۇرگىزىلۋدە. سونىمەن قاتار, «فين ستاتۋس» جاۋاپكەرشىلىگى شەكتەۋلى سەرىكتەستىگىمەن سىبايلاس بولعان «فين ستاتۋس كونسالت», «فين ستاتۋس ديزاين», «فين ستاتۋس ينۆەست», «مفو فين ستاتۋس زايم», «پروفيت گرۋپپ», «ەۆەرەست فينانس» جاۋاپكەرشىلىگى شەكتەۋلى سەرىكتەستىكتەرىنىڭ قىزمەتى دە تەكسەرىلۋدە.
الماتى قالالىق مەملەكەتتىك كىرىستەر دەپارتامەنتىنىڭ ءباسپاسوز قىزمەتى اتالعان سەرىكتەستىكتەرمەن قوسىمشا نەسيە جابۋ جونىندە كەلىسىم جاساپ, الاياقتارعا الدانعان باسقا دا سالىمشىلار بولاتىن بولسا, ءتيىستى قۇجاتتارىن اكەلۋ ارقىلى الماتى قالالىق مەملەكەتتىك كىرىستەر دەپارتامەنتى ەكونوميكالىق تەرگەۋ قىزمەتىنە حابارلاسۋلارىنا بولادى.
ايناش ەسالي.
دەرەك, سۋرەت: الماتى قالالىق مەملەكەتتىك كىرىستەر دەپارتامەنتىنىڭ ءباسپاسوز قىزمەتى.