قوستاناي. 16 اقپان. قوستانايدا تالاپكەرلەردى جىل سايىن رەسەي جوعارى وقۋ ورىندارى تارتىپ الادى. ولار جىل سايىن ەرتە باستان مەكتەپتەرگە كەلىپ, وقۋشىلارمەن الدىن الا جۇمىستار جۇرگىزەدى. ءبىلىم بەرۋ سالاسىنىڭ كەڭەيتىلگەن ماجىلىسىندە وبلىس اكىمىنىڭ ورىنباسارى مارات جۇندىباەۆ وسىلاي مالىمدەدى. بۇل تۋرالى ng.kz سايتىنا سىلتەمە جاساعان egemen.kz ءتىلشىسى حابارلادى.
كەڭەيتىلگەن ماجىلىستە وبلىستىق ءبىلىم بەرۋ باسقارماسى باسشىسىنىڭ ورىنباسارى كاميل يبراگيموۆتىڭ ايتۋىنشا, وتكەن جىلى وبلىستان 530 تۇلەك شەت ەلدەگى جوعارى وقۋ ورىندارىنا تۇسكەن. ال وبلىستاعى بارلىق مەكتەپتى 4000-عا جۋىق بالا بىتىرگەن. سالا باسشىسىنىڭ ايتۋىنشا, وتكەن جىلى ۇلتتىق بىرىڭعاي تەستىدەن دە تۇلەكتەر الدىڭعى جىلعا قاراعاندا كوڭىلدەگى كورسەتكىشكە جەتە الماعان. بىلتىر ورتاشا 78,79 بالل جيناپ, رەسپۋبليكا بويىنشا 9 ورىندى السا, الدىڭعى جىلى ءتورتىنشى ورىندا بولاتىن.
ال رەسەيدىڭ جوعارى ورىندارى ۇبت ناتيجەسىن ەسەپكە المايدى, سوندىقتان شەتەلدىك وقۋعا تۇسكىسى كەلەتىن وقۋشىلار ءوز ءبىلىمىن باعالاتۋ ءۇشىن ءداستۇرلى ەمتيحان تاپسىرۋدى قالايدى. سوندىقتان ۇبت-عا دايىندىعى از وقۋشىلار قالىپ وتىرادى.
وبلىس اكىمىنىڭ ورىنباسارى مارات جۇندىباەۆ: «ءبىز تۇلەكتەرگە باعىت بەرۋ جونىنەن رەسەيلىك جوعارى وقۋ ورىندارىنان ۇتىلىپ قالامىز. ولار قاڭتاردان باستاپ, مەكتەپتەردى ارالاپ, وقۋشىلارمەن اڭگىمەلەسەدى.ال ءبىز بۇل جۇمىستى مامىر ايىندا عانا ەسىمىزگە الامىز. رەسەيگە بارماڭدار دەپ ايتۋعا قۇقىمىز جوق, بىراق ءبىز بالالارعا ءبىزدىڭ ەلىمىزدە قانداي جاقسى وقۋ ورىندارى بار ەكەندىگىن ايتۋىمىز كەرەك», – دەدى.
قوستاناي مەملەكەتتىك پەداگوگيكالىق ينستيتۋتىنىڭ رەكتورى قۋات بايمىرزاەۆتىڭ ايتۋىنشا, ەندى ينستيتۋتقا پەداگوگيكاعا بەيىمى بار تۇلەكتەردى قابىلداۋ ءۇشىن, ولار قوسىمشا ەمتيحان تاپسىرادى. قازاقستاننىڭ وزگە وڭىرىنەن كەلگەن ستۋدەنتتەردىڭ ەسەبىنەن ينستيتۋتتا ستۋدەنتتەر سانى 17-دەن 33 پايىزعا دەيىن وسكەن. سونىمەن قاتار رەكتور قوستانايلىق بالالاردىڭ رەسەي وقۋ ورىندارىنا كەتىپ جاتقان ۇدەرىسىنە دە جۇرت نازارىن اۋدارتتى.
قوستاناي مەملەكەتتىك پەداگوگيكالىق ينستيتۋتىنىڭ رەكتورى قۋات بايمىرزاەۆ: «تالاپكەرلەردىڭ رەسەيلىك وقۋ ورنىدارىنا اعىلۋىنىڭ كەرى اسەرى بار. 2014 جىلى شەت ەل جوعارى وقۋ ورنىدارىنادا وقىعان 37 000 قازاقستاندىق جاستاردىڭ 26 مىڭى رەسەيدە وقىدى. ولاردىڭ باسىم كوپشىلىگى رەسەي ازاماتتىعىن الىپ, سوندا جۇمىسقا ورنالاستى», – دەدى.
ءنازيرا جارىمبەتوۆا.
دەرەك, سۋرەت: ng.kz