«نۇر وتان» پارتياسىنىڭ كەزەكتەن تىس ءحVىى سەزىنە دەلەگات بولىپ قاتىسقان قازتۇتىنۋوداعى قاراعاندى ەكونوميكالىق ۋنيۆەرسيتەتىنىڭ رەكتورى ەرقارا ايماعامبەتوۆ ءبىراز جىلدان بەرى وبلىستىق سايلاۋ كوميسسياسىنىڭ توراعاسى قىزمەتىن جەمىستى اتقارىپ كەلەدى. تاياۋدا بەلگىلى عالىم, ۇلاعاتتى ۇستاز, قوعام قايراتكەرىنە جولىعىپ, سەزدەن العان اسەرى جانە الداعى بولاتىن سايلاۋدىڭ جاي-جاپسارى تۋرالى سۇراپ بىلگەن ەدىك. ول بىلاي دەدى:
– «نۇر وتان» پارتياسىنىڭ كەزەكتەن تىس سەزىندە نەگىزگى ەكى ماسەلە قارالدى. ونىڭ ءبىرىنشىسى – پارتيانىڭ تۇعىرناماسى بولسا, ال ەكىنشى ماسەلە – پارتيا ءوزىنىڭ ءماجىلىس دەپۋتاتتىعىنان ءۇمىتكەرلەرىنىڭ ءتىزىمىن جاريالادى.
كەز كەلگەن مەملەكەتتىڭ الدىندا ءۇش ۇلكەن ماسەلە تۇرادى. ول – ينفلياتسيا, جۇمىسسىزدىق ءجانە ىشكى ءونىم. وسى ۇشەۋىنىڭ شەشىمىن وڭ تاۋىپ, ەكونوميكالىق ستراتەگيانى دۇرىس جولعا قويا بىلگەن ەلدىڭ بولاشاعى جارقىن دەپ سەنىممەن ايتۋعا بولادى. مىنە, وسى ماسەلەلەرگە ەلىمىزدىڭ پرەزيدەنتى ن.ءا.نازارباەۆ ءوز بايانداماسىندا باسا ءمان بەردى.
حالىقتىڭ قولداۋىنسىز ەشقانداي دا رەفورما ىسكە اسپايدى. ۇكىمەت, كاسىبي مەملەكەتتىك اپپارات حالىقتىڭ قولداۋىنا سۇيەنگەندە عانا ءىس ىلگەرى جىلجيدى. بۇل تۇرعىدان كەلگەندە, بۇگىندە تۇڭعىش پرەزيدەنتىمىزگە دەگەن ەل سەنىمى وتە زور. توننىڭ ىشكى باۋىنداي تاتۋ-ءتاتتى تۇرىپ جاتقان كوپۇلتتى, كوپكونفەسسيالى ەلىمىز ەلباسىنىڭ ساليقالى ساياساتىن قولداپ كەلەدى, الداعى ۋاقىتتا دا قولداي بەرەدى دەگەن نىق سەنىم بار.
ۇلت بىرلىگى – ءبىزدىڭ تاۋەلسىزدىگىمىزدىڭ قول جەتكىزگەن باستى بايلىعى. بۇعان ەلباسىمىز وتە قاتتى ءمان بەرەدى. پرەزيدەنتىمىزدىڭ الدىمەن – ەكونوميكا, سونان كەيىن ساياسات دەگەن ۇستانىمى ءوزىنىڭ ومىرشەڭدىگىن دالەلدەپ كەلەدى. شىنىندا دا, ادام بالاسى ءۇشىن الدىمەن ونىڭ تاماعى توق, كويلەگى كوك, كورشىسىمەن تاتۋ بولماعى ماڭىزدى. ەكونوميكاسى مىعىم, ساياسي باعىتى ءتۇزۋ, اسكەرى قۋاتتى ەلدىڭ باسشىسى مىقتى بولىپ سانالادى. بۇگىنگى كۇندە ءبىزدىڭ ەلباسىنىڭ وسىنداي دارەجەگە جەتكەن ساياسي تۇلعا ەكەندىگى داۋسىز.
پارتيا سەزىنىڭ دەلەگاتى رەتىندە ءوز ويىمدى بىلدىرەر بولسام, تىزىمدەگى ۇمىتكەرلەردىڭ كەز كەلگەنىن الىپ قارايتىن بولساق, ءوز سالاسىنىڭ بىلگىرى, تاجىريبەلەرى تولىسقان, ەلگە تانىمال ازاماتتار. ەگەر الداعى سايلاۋدا جەڭىسكە جەتەر بولسا, مۇنداي دەپۋتاتتارمەن قانداي دا بولسىن داعدارىستى ەڭسەرە الاتىنىمىزعا كۇمان جوق.
قازىرگى ۋاقىتتا قازاقستاننىڭ كورسەتكىشتەرى جاقسى, ءتىپتى, جاعدايدى رەسەيمەن سالىستىرۋعا دا كەلمەيدى. بىزدەگى ينفلياتسيا 6-7% بولسا, كورشىمىزدە بۇل كورسەتكىش 13 پايىزدى قۇرايدى. جۇمىسسىزدىقپەن كۇرەسكە كەلسەك, كورسەتكىش جامان ەمەس. داعدارىستى تەجەپ, تويتارۋعا باعىتتالعان شارالار جان-جاقتى قاراستىرىلعان. جالپى, بۇگىنگى كۇندە وسى ايتىلعان كۇردەلى ماسەلەلەردى شەشۋ ءۇشىن ارنايى باعدارلامالار قابىلدانىپ, ولار تابىستى جۇمىس ىستەپ جاتىر.
مەملەكەتتىڭ نەگىزگى ماقساتى – دايىن ءونىم ءوندىرۋ. ءبىز دۇنيەجۇزىلىك ساۋدا ۇيىمىنا مۇشە بولىپ كىرگەننەن كەيىن وزىمىزدە جاسالاتىن وتاندىق ونىممەن تانىلۋىمىز كەرەك. بۇل – شيكىزاتقا يەك ارتا بەرمەي, بارلىق كۇش-جىگەردى, ءبىلىم مەن عىلىمي الەۋەتتى ىشكى ءونىمنىڭ ىرگەتاسىن نىعايتۋعا جۇمساۋ كەرەك دەگەن ءسوز. ياعني, ءبىزدىڭ الدىمىزدا تۇرعان ەڭ ماڭىزدى شارۋانىڭ ءبىرى – ەكونوميكاعا سەرپىن بەرىپ, وسى سالانىڭ مۇقتاجدىعىن باسىم باعىتتى ساياسات دارەجەسىنە جەتكىزۋ.
سوناۋ امەريكا پرەزيدەنتى رۋزۆەلتتىڭ زامانىنان ەكونوميكالىق جانە رۋحاني داعدارىستاردىڭ بولاتىنى تۋرالى اڭگىمە قوزعالىپ كەلەدى. جالپى, ادامزاتتىڭ ويشىلى رۋزۆەلتتىڭ ايتۋىنشا, كەز كەلگەن ەل ەكونوميكالىق داعدارىستى جەڭە الادى. ال رۋحاني داعدارىستى ەڭسەرۋ – ەكىنىڭ ءبىرىنىڭ قولىنان كەلمەيدى. داعدارىستاردى جەڭۋ ءۇشىن ەڭ الدىمەن مەملەكەتكە ۇلت بولىپ ۇيىسىپ, بەلگىلى ءبىر ۇلتتىق يدەيا اياسىندا كۇش بىرىكتىرۋ قاجەت. ال بۇل دەگەنىڭىز – ءبىزدىڭ ەلىمىزدە بار دۇنيە. ەلباسى ۇسىنعان «ماڭگىلىك ەل», « ۇلى دالا ەلى» سىندى ۇلتتىق يدەيامەن, ياعني ۇلى ماقساتتارمەن قارۋلانعان قازاقستان مەملەكەتتىلىگىنىڭ قابىرعاسى مىزعىمايدى دەپ سەنەمىن.
وسى تۇرعىدان الار بولساق, ءبىزدىڭ جاڭا ءماجىلىستىڭ قۇرامىندا ەلگە تانىمال ونەر ادامدارىنىڭ, سپورتشىلاردىڭ بولعانى كەرەك دۇنيە دەپ ەسەپتەيمىن. قازىرگى قيىنشىلىق زاماندا ءبىز رۋحاني دۇنيەلەرگە ايرىقشا ءمان بەرۋىمىز كەرەك. ياعني, ءبىزدىڭ حالىققا ونەردى دارىپتەيتىن, سالاماتتى ءومىر سالتىن ناسيحاتتايتىن ازاماتتاردىڭ قىزمەت ەتۋگە دەگەن قۇلشىنىسىنا تۇسىنىستىكپەن قاراپ, قولداۋ ءبىلدىرگەنىمىز ءجون.
جازىپ العان
قايرات ءابىلدينوۆ,
«ەگەمەن قازاقستان».
قاراعاندى.