كەشە پرەزيدەنت جانىنداعى ورتالىق كوممۋنيكاتسيالار قىزمەتىندە «تۇلعالىق كاپيتالدى دامىتۋدىڭ باسىمدىعى رەتىندە شەتەلدە كادرلاردى دايارلاۋ» تاقىرىبىندا بريفينگ ءوتتى.
ءبىلىم جانە عىلىم ۆيتسە-ءمينيسترى ت.بالىقباەۆ, «حالىقارالىق باعدارلامالار ورتالىعى» اق پرەزيدەنتى ع.نىعمەتوۆ, «بولاشاق» حالىقارالىق ستيپەندياسىنىڭ تۇلەگى ن.ساعىنوۆا قاتىسقان جيىندا ءبىلىم بەرۋدىڭ باسەكەگە قابىلەتتىلىگىن ارتتىرۋ جانە «بولاشاق» حالىقارالىق ستيپەندياسىن دامىتۋدىڭ 2016-2020 جىلدارعا ارنالعان جوسپارىن ىسكە اسىرۋ, سونىمەن بىرگە, وعان ۇمىتكەرلەردى ىرىكتەۋ ەرەجەلەرىنە ەنگىزىلگەن وزگەرىستەر تۋرالى ءسوز قوزعالدى.
ۆيتسە-مينيستر ت.بالىقباەۆ اتاپ وتكەنىندەي, 2015 جىلى شەتەلدە كادرلار دايارلاۋ ءجونىندەگى رەسپۋبليكالىق كوميسسيانىڭ شەشىمىمەن «بولاشاق» ستيپەندياسى 601 ءۇمىتكەرگە تاعايىندالعان, ونىڭ ىشىندە 439 ماگيستراتۋرا, 40 دوكتورانتۋرا, 122 تاعىلىمداما بويىنشا.
بۇگىنگى كۇنى باعدارلامانىڭ 503 تۇلەگى مەملەكەتتىك قۇرىلىمداردا, ۇلتتىق جانە جەكە كومپانيالاردا, ءبىلىم جانە دەنساۋلىق ساقتاۋ ۇيىمدارىندا ماڭىزدى ستراتەگيالىق شەشىمدەر قابىلداۋ دەڭگەيىندەگى جوعارى باسقارۋشىلىق بۋىندا قىزمەت ەتۋدە. ولاردىڭ قاتارىندا 4 ۆيتسە-مينيستر, 5 اكىم, 3 رەسپۋبليكا وبلىستارى مەن قالا اكىمدەرىنىڭ ورىنباسارلارى بار. باسقاسىن ايتپاعاندا, وسىلاردىڭ ءوزى شەتەلدە ءبىلىم العان جاستاردىڭ بىلىكتىلىك دەڭگەيىن اڭعارتسا كەرەك.
«بولاشاق» باعدارلاماسىن دامىتۋدىڭ 2016-2020 جىلدارعا ارنالعان جوسپارىنا سايكەس, «جوو تۇلەگى» ساناتى الىنىپ تاستالىپ, ماگيستراتۋراعا «ينجەنەرلىك-تەحنيكالىق قىزمەتكەر» جاڭا ساناتى ەنگىزىلدى. ۇمىتكەرلەر ديپلومىنىڭ ورتاشا بالى GPA 4.00 بولۋى ءتيىس, ول بۇرىنعى 2.67-دەن 3.00-گە كوتەرىلدى. سونىمەن بىرگە, اعىلشىن ءتىلىن ءبىلۋ دەڭگەيىنە دە تالاپ كۇشەيتىلدى. دالىرەك ايتساق, IELTS 4.0-دەن 5.0-گە ارتتى. ۇمىتكەرلەردىڭ جۇمىس وتىلىنە دەگەن تالاپتار دا وزگەرتىلدى. ماگيستراتۋرا مەن دوكتورانتۋراعا تاپسىرۋ ءۇشىن جۇمىس ءوتىلى كەمىندە 2 جىل بولۋى ءتيىس. وسى جانە وزگە دە ۇدەلەردەن سۇرىنبەي, رەسپۋبليكالىق كوميسسيانىڭ تالقىسىنان مۇدىرمەي وتكەن ۇمىتكەر اتالمىش باعدارلامانىڭ ستيپەندياتى اتالماق.
راۋان قايدار,
«ەگەمەن قازاقستان».