استانادا «اگروونەركاسىپ كەشەنىندەگى نەسيەلىك سەرىكتەستىكتەر قاۋىمداستىعى» زاڭدى تۇلعالار بىرلەستىگىنىڭ قۇرىلتايشىلارى مەن «قازاگرو» حولدينگى جانە «اگرارلىق نەسيە كورپوراتسياسى» اق وكىلدەرىنىڭ قاتىسۋىمەن جالپى جينالىس بولدى.
وندا 15 جىلدان بەرى ەلىمىزدىڭ اۋىل شارۋاشىلىعىن دامىتۋدا تىنىمسىز تەر توگىپ كەلە جاتقان نەسيە سەرىكتەستىكتەرى قىزمەت اۋقىمىن كەڭەيتىپ, ءوز قاتىسۋشىلارىن نەسيەلەۋگە جاساعان جاڭا جۇيەنىڭ ءالى دە شيراتىلاتىن جانە جەتىلدىرىلە تۇسەتىن تۇستارىن جان-جاقتى تالقىلادى. شارانىڭ دوڭگەلەك ۇستەل فورماتىندا وتكەن بولىمىندە جاڭا جۇيەنى تانىستىرعان قاۋىمداستىق ءتورايىمى الميرا ساعاتوۆاعا ءۇش تاراپتىڭ جەتەكشى ماماندارى ءتۇرلى سۇراقتار قويىپ, ول شارۋا قوجالىقتارىن قارجىلاندىرۋدىڭ جاڭا جۇيەسىندەگى پايدالى تۇستاردى ماقۇلداپ وتىردى. ءار ىستە شاشىراڭقى ارەكەت ەتىپ ءجۇرگەن قوجالىقتاردىڭ باسىن بىرىكتىرىپ, قارجىلاندىرۋ مەن اۋىل شارۋاشىلىعىنا قاجەتتى زاتتارمەن دەر شاعىندا قامتاماسىز ەتۋ ىستەرىن ۇيلەستىرەتىن جاڭا جۇيە تاراپتاردىڭ ويىن ءدوپ باسقان سياقتى.
سەبەبى, جاڭا جۇيە ءارىسى گەرمانيا مەن پولشانىڭ, بەرىسى رەسەي مەن قىرعىز ەلىنىڭ سالاداعى قارجىلاندىرۋ تاجىريبەلەرىن زەردەلەي وتىرىپ, ءوز ەلىمىزگە پايدالى تۇستارىن ىرىكتەپ الىپ جاسالعانى كورىنىپ تۇر. «بۇل جەردە گەرمانيانىڭ تاجىريبەسىنە كوبىرەك نازار اۋدارىپ, ءتيىمدى جەرلەرىن ۇلگى ەتكەنىمىز ءجون دەپ بىلەمىن. ويتكەنى, قۇرىلعانىنا ءجۇز جىلدان اسقان كورپوراتسيا قازىرگى تاڭدا تەك اۋىل شارۋاشىلىعىن عانا نەسيەلەۋمەن شەكتەلىپ قالماي, ەلدەگى ەكونوميكانىڭ وزگە دە سالالارىن قامتىپ جاتىر. ءبىز دە الدىمىزعا وسىنداي ۇلكەن ماقسات قويىپ, ارەكەت ەتسەك ءجون بولار ەدى. ونداي بيىك ماقساتقا قۇلاش ۇرۋعا مەملەكەت جول اشىپ, بارلىق دەرلىك جاعدايدى جاساپ وتىر. ەندىگى قالعان ءىس – جۇيەنى بارىنشا جەتىلدىرىپ, اۋىل شارۋاشىلىعىنداعى جۇرتتى ءبىر ماقساتقا جۇمىلدىرا ءبىلۋ جانە جاڭا جۇيەمىزدىڭ جەمىسىن قىسقا ۋاقىتتا ەلگە ۇسىنا الۋ», دەدى ءتورايىم.
كۇن بويىنا ۇلاسقان شارادا قاۋىمداستىقتىڭ وتكەن جىلعى جۇمىس قورىتىندىلارى مەن الداعى كەزەڭگە ارنالعان جوسپارى پىسىقتالدى. ءسويتىپ, تاياۋ ۋاقىتتا مەملەكەتتىك ورگاندار مەن مۇددەلى قۇرىلىمداردىڭ تالقىلاۋىنا شىعارىلاتىن نەسيە سەرىكتەستىكتەرىن دامىتۋدىڭ ايتىلعان جاڭا ستراتەگياسى ۇتىمدى ۇسىنىستارمەن تولىقتىرىلدى. جالپى 15 جىل ىشىندە «اگرارلىق نەسيە كورپوراتسياسى» اق قولداۋىمەن ەلىمىزدىڭ 13 وبلىسىنداعى 163 اۋداندا 171 نەسيە سەرىكتەستىگى قۇرىلىپتى. ولاردىڭ اۋدانداردى قامتۋ ۇلەسى رەسپۋبليكا بويىنشا 93 پايىزدان اسقان. ءدال بۇگىنگى كۇنى نس جۇيەسى 12 مىڭعا جۋىق اۋىلشارۋاشىلىق تاۋار وندىرۋشىلەرىنىڭ باسىن بىرىكتىرىپ وتىر. بىلتىردىڭ وزىندە سەرىكتەستىكتىڭ قاتارىنا 2240-تان استام جاڭا قاتىسۋشى تارتىلىپتى. وسى كەزگە دەيىن نس جۇيەسىنە كەلگەن قوجالىقتارعا 160 ملرد. تەڭگەدەن استام نەسيە اقشا بەرىلىپ, 120 مىڭعا جۋىق اۋىل شارۋاسىنىڭ جۇمىس ورنى ساقتالىپ, قوسىمشا قىزمەت كوزدەرى اشىلعان.
قاۋىمداستىق جەتەكشىسى الميرا ساعاتوۆانىڭ پىكىرىن العا شىعارار بولساق, سەرىكتەستىكتىڭ بۇگىنگى ۇلكەن ماقساتى – نس جۇيەسىنىڭ ستراتەگيالىق دامۋ باعدارلاماسىن وزىق ەلدەردىڭ سالاداعى تاجىريبەسى نەگىزىندە جاساپ, ۋاقىت تالابىنا ساي دامىتۋدى كوزدەيدى. ول ءۇشىن نس-تىڭ بىرىڭعاي ستاندارتتارى مەن ەرەجەلەرىن ەنگىزبەك. سونداي-اق, اۋىل شارۋاشىلىعى كووپەراتيۆتەرىن دامىتۋمەن قاتار, نەسيەلەۋ بيۋروسىنا قاتىسپاق. بۇلارمەن ءبىرگە قوجالىقتار اراسىندا ىنتىماقتاستىققا باعىتتالعان ساقتاندىرۋ قورلارىن قالىپتاستىرۋدى جوسپارلاپ وتىر. قۇرىلىمداعى جالپى جيىننىڭ سوڭى مەرەكەلىك شاراعا ۇلاستى. «اگرارلىق نەسيە كورپوراتسياسى» اق جەتەكشىلەرى قۇرىلعانىنا 15 جىل تولعان نس جۇيەسىنىڭ قاتىسۋشىلارىنا گراموتالار تاپسىردى. نس رەيتينگىلەۋ جۇيەسى بويىنشا اقمولا وبلىسىنداعى «تسەلينوگراد» نس پەن سولتۇستىك قازاقستان وڭىرىندەگى «ەسىل» نس كوشباسشى دەپ تانىلدى. ال وتكەن جىلدىڭ قورىتىندىسى بويىنشا ەڭ ۇزدىك سەرىكتەستىك جۇلدەسى وڭتۇستىك قازاقستان وبلىسىنداعى «ياسسى-نەسيە» نس-قا بەرىلدى.
نۇرباي ەلمۇراتوۆ,
«ەگەمەن قازاقستان».